.jpg)
អគ្គលេខាគណបក្សអនាគតឆ្ពោះទៅមុខលោក ភីយ៉ាប៊ុត សែងកាណុកគុល (ស្តាំ)។ BKP
ក្រុងបាងកក៖ គណបក្សអនាគតឆ្ពោះទៅមុខ (FFP) កាលពីថ្ងៃសៅរ៍បានរិះគន់ប្រមុខកងទ័ពលោក Apirat Kongsompong ជុំវិញសុន្ទរកថាប្រឆាំងនឹងក្រុមបញ្ញវន្ត និងអ្នកនយោបាយ ដោយនិយាយថា ពាក្យសម្តីរបស់លោកនឹងបណ្តាលឲ្យមានការបែកបាក់ និងបង្កឲ្យមានការស្អប់គ្នាតែប៉ុណ្ណោះ។
អគ្គលេខាធិការ FFP លោក ភីយ៉ាប៊ុត សែងកាណុកគុល កាលពីថ្ងៃសៅរ៍ បានថ្លែងសុន្ទរកថាពិសេសមួយនៅស្នាក់ការបក្ស ដោយបាននិយាយថា សុន្ទរកថានេះ គឺជាការឆ្លើយតបទៅនឹងសុន្ទរកថារបស់លោកឧត្តមសេនីយ៍ Apirat កាលពីថ្ងៃសុក្រ ទោះបីជាលោកឧត្តមសេនីយ៍ មិនបានលើកឡើងពីគណបក្សនោះ ដោយចំៗនៅក្នុងសុន្ទរកថារបស់លោកក្តី។
លោក ភីយ៉ាប៊ុត បានថ្លែងថាសម្តីរបស់ប្រមុខកងទ័ពនោះ មិនបានដោះស្រាយបញ្ហាអ្វីឡើយ ប៉ុន្តែបានជំរុញឲ្យមានការបែកបាក់ក្នុងសង្គម។ លោកឧត្តមសេនីយ៍ បានខកខានមិនក្តាប់ស្ថានការណ៍នយោបាយដែលកំពុងផ្លាស់ប្តូរនេះទេ ហើយសម្តីរបស់លោកបង្កឲ្យមានការស្អប់គ្នា និងបង្កើតសត្រូវថ្មី។
លោក ភីយ៉ាប៊ុត បានថ្លែងថា ប្រមុខកងទ័ពរូបនេះ មិនគួរចាត់ទុកអ្នកដែលមានទស្សនៈខុសគ្នានោះជាសត្រូវទេ ប៉ុន្តែគួរបើកចិត្តឲ្យទូលាយ និងស្តាប់គណបក្សនយោបាយ និងគោរពទស្សនៈខុសគ្នាទាំងនោះ ដើម្បីទាញប្រទេសនេះចេញឲ្យផុតពីជម្លោះ។
ជាការឆ្លើយទៅនឹងការប្រឆាំងជំទាស់របស់លោកឧត្តមសេនីយ៍ Apirat នៅនឹងសំណើសុំវិសោធនកម្មផ្នែកទី ១ នៃច្បាប់រដ្ឋធម្មនុញ្ញនោះ លោក ភីយ៉ាប៊ុត ថ្លែងថា កង្វល់របស់លោកប្រមុខកងទ័ពអំពីការកែប្រែរដ្ឋធម្មនុញ្ញនេះមិនចាំបាច់ទេ។ លោកបានបញ្ជាក់ថា យុទ្ធនាការកែប្រែរដ្ឋធម្មនុញ្ញរបស់បក្សប្រឆាំងនេះ បានបដិសេធចោលផ្នែកនេះ ដែលចែងថាប្រទេស ថៃ គឺជាព្រះរាជាណាចក្រមួយដែលមិនអាចបំបែកបាន៕ BKP
