.jpg)
អ្នកតវ៉ាគាំទ្រលទ្ធិប្រជាធិបតេយ្យលើកសញ្ញាម្រាមដៃ ៣។ រូបថត AFP
ក្រុងបាងកក៖ គណៈរដ្ឋមន្ត្រីថៃ កាលពីថ្ងៃអង្គារ បានគាំទ្រសំណើមួយឱ្យបើកប្រជុំសភាពិសេស ដើម្បីពិភាក្សារកមធ្យោបាយដោះស្រាយជម្លោះនយោបាយដែលបានកើតចេញពីការតវ៉ាប្រឆាំងរដ្ឋាភិបាលថៃបច្ចុប្បន្ន។
រដ្ឋមន្ត្រីប្រចាំការិយាល័យនាយករដ្ឋមន្ត្រី គឺលោក អានូ-ឆាណាកាសៃ បានប្រកាសថា សភា និងព្រឹទ្ធសភា នឹងបើកកិច្ចប្រជុំរយៈពេល ២ ថ្ងៃ ចាប់ពីថ្ងៃទី ២៦ ខែតុលា។ សំណើនោះត្រូវការឡាយព្រះហស្តលេខាដោយព្រះមហាក្សត្រ។
លោកឧបនាយករដ្ឋមន្ត្រី វីស្សនុ គ្រឿង៉ាម បានថ្លែងកាលពីថ្ងៃចន្ទថា ព្រះរាជក្រឹត្យមួយត្រូវបានចេញរួចរាល់សម្រាប់កិច្ចប្រជុំសភាធម្មតាមួយ ដែលត្រូវចាប់ផ្តើមនៅថ្ងៃទី ១ ខែវិច្ឆិកា ខាងមុខនេះ។
ទោះបីជាយ៉ាងណាក៏ដោយ ក៏ច្បាប់រដ្ឋធម្មនុញ្ញបានអនុញ្ញាតឱ្យគណៈរដ្ឋមន្ត្រីស្នើព្រះមហាក្សត្រអនុម័តឱ្យបើកកិច្ចប្រជុំវិសាមញ្ញមួយ ដើម្បីដោះស្រាយបញ្ហាសំខាន់ៗក្នុងការគ្រប់គ្រងប្រទេស។
ព្រះរាជក្រឹត្យ ក៏អាចត្រូវបានឲ្យបន្តបើកកិច្ចប្រជុំឡើងវិញ ប្រសិនបើសមាជិកសភាចំនួន ១ ភាគ ៣ មកពីស្ថាប័នទាំង ២ បានគាំទ្រញត្តិមួយឱ្យរៀបចំ បើកកិច្ចប្រជុំពិសេសនៅក្នុងសភា។
ការតវ៉ាជាច្រើន បានអំពាវនាវឱ្យលោកនាយករដ្ឋមន្ត្រី ប្រាយុធ ចាន-អូចា ចុះចេញពីតំណែង ហើយពួកគេបានប្រមូលផ្តុំគ្នាយ៉ាងឆាប់រហ័សនៅទូទាំងប្រទេស ចាប់តាំងពីក្រុមមេដឹកនាំនិស្សិត និងសកម្មជនមួយចំនួន ត្រូវបានចាប់ខ្លួន ហើយរថយន្តបាញ់ទឹកជាច្រើនគ្រឿង ត្រូវបានគេប្រើប្រាស់ ដើម្បីបំបែកការប្រមូលផ្តុំមួយនៅក្នុងទីក្រុងបាងកក កាលពីយប់ថ្ងៃសុក្រសប្តាហ៍មុន។
ទោះបីជាយ៉ាងណាក៏ដោយ ក៏ក្រុមស្រឡាញ់ថៃ (Loyal Thai) គាំទ្ររបបរាជាធិបតេយ្យដែលត្រូវបានដឹកនាំដោយអតីតសមាជិកសភាប្រជាធិបតេយ្យ គឺលោក វ៉ារ៉ុង ឌីគីតវីក្រម បានរិះគន់ប្រឆាំងយ៉ាងខ្លាំង ចំពោះកិច្ចប្រជុំសភាពិសេសនោះ។
លោក វ៉ារ៉ុង ឌីគីតវីក្រម បានថ្លែងថា ក្រុមអ្នកតវ៉ាប្រឆាំងរដ្ឋាភិបាលមិនមានបំណងដោះស្រាយបញ្ហានយោបាយនោះទេ ហើយជាការពិតណាស់ ពួកគេបានចាប់អារម្មណ៍យ៉ាងសំខាន់ទៅលើកំណែទម្រង់របបរាជាធិបតេយ្យតែប៉ុណ្ណោះ។
លោក វ៉ារ៉ុង ឌីគីតវីក្រម បានថ្លែងទៀតថា អ្នកនយោបាយខ្លះ បានទទួលផលប្រយោជន៍ពីស្ថានការណ៍នោះ ដើម្បីអំពាវនាវឱ្យបើកកិច្ចប្រជុំសភាពិសេស ស្ថិតនៅក្រោមលេសមួយ ដើម្បីដោះស្រាយជម្លោះនោះ ប៉ុន្តែការពិតទៅ គឺពួកគេចង់កេងចំណេញ ឱ្យសភាបង្កើតជម្លោះកាន់តែខ្លាំងឡើង និងការធ្វើបាតុកម្មដោយស្របច្បាប់នៅក្នុងកិច្ចប្រជុំពិសេសនោះ។
ចលនាយុវជនសេរី កាលពីថ្ងៃអង្គារ បានបង្ហោះសារនៅលើគេហទំព័រហ្វេសប៊ុកថា៖ «រឿងគួរឱ្យភ្ញាក់ផ្អើលបំផុត» ដែលបានប្រកាសកាលពីពេលថ្មីៗនេះ គឺ«មិនមានអ្វីគួរឱ្យភ្ញាក់ផ្អើលនោះទេ»។
សារនៅក្នុងគេហទំព័រហ្វេសប៊ុកបានបង្ហោះថា «ចូរយើងធ្វើបាតុកម្មពេញ ១ ថ្ងៃ»។
សម្រាប់រយៈពេល ១ សប្តាហ៍វិញ យើងបានប្រយុទ្ធជាមួយគ្នាយ៉ាងអង់អាចក្លាហាន ប៉ុន្តែរដ្ឋាភិបាលថៃបច្ចុប្បន្ននេះ មិនបានដឹងច្បាស់ថារបបសក្តិភូមិនិយមប្រហែលជានឹងអាចត្រូវដួលរលំនៅពេលខាងមុខនេះដែរ ឬយ៉ាងណាទេ?»។
«ចាប់តាំងពីពួកគេ មិនបានអើពើជាមួយការអំពាវនាវរបស់ពួកយើងមកនោះ ពួកគេបានទន្ទឹងរង់ចាំសេចក្តីប្រកាសគួរឱ្យភ្ញាក់ផ្អើលមួយយ៉ាងអន្ទះសាកាលពីថ្ងៃពុធម្សិលមិញ»។
គណបក្សប្រឆាំងភឿថៃ បានស្នើឱ្យតុលាការស៊ីវិល ចាត់ទុកបទបញ្ជារបស់លោកនាយករដ្ឋមន្ត្រី ប្រាយុធ ចាន-អូចា ដែលបានប្រើប្រាស់ច្បាប់គ្រាអាសន្ន និងការហាមប្រាមមិនឱ្យមានការប្រមូលផ្តុំជាសាធារណៈនៅក្នុងទីក្រុងបាងកក ជាមោឃៈ ដោយបាននិយាយថា ច្បាប់នោះពិតជាបានរំលោភសិទ្ធិមនុស្ស។
តុលាការស៊ីវិល នឹងអនុវត្តច្បាប់របស់ខ្លួនស្តីពីបញ្ហានោះនៅថ្ងៃព្រហស្បតិ៍នេះ។
លោកឧត្តមសេនីយ៍ ប្រាយុធ ចាន-អូចា បានប្រកាសដាក់ប្រទេសក្នុងគ្រាអាសន្នរយៈពេល ១ ខែ កាលពីថ្ងៃទី ១៥ ខែតុលា ថ្មីៗនេះ។
នេះគឺជាការហាមប្រាមមិនឱ្យមានការប្រមូលផ្តុំមនុស្សចាប់ពី ៥ នាក់ ឬច្រើនជាងនេះ ហើយសារព័ត៌មានបានរាយការណ៍ថា ត្រូវបានគេចាត់ទុកថា ជាការគំរាមកំហែងដល់សន្តិសុខជាតិ និងរំលោភបំពានសិទ្ធិជួបជុំបញ្ចេញមតិយោបល់របស់ពលរដ្ឋ៕ BKP/SK
