គិលានុបដ្ឋាក ១ រូប នៅរដ្ឋ California សហរដ្ឋអាមេរិកបានធ្វើតេស្តវិជ្ជមានជំងឺកូវីដ ១៩ មួយសប្ដាហ៍បន្ទាប់ពី លោកទទួលវ៉ាក់សាំងផលិតដោយក្រុមហ៊ុន Pfizer/BioNTech តែអ្នកជំនាញ និងក្រុមហ៊ុនឱសថនេះបាននិយាយថា រាងកាយត្រូវការពេលវេលាដើម្បីបង្កើតភាពស៊ាំ។
កាលពីថ្ងៃអង្គារទី ២៩ KG-TV ដែលជាសាខារបស់ទូរទស្សន៍ ABC នៅរដ្ឋ California បានរាយការណ៍ថា លោក Matthew W. ដែលជាគិលានុបដ្ឋាកអាយុ ៤៥ ឆ្នាំនៅទីក្រុង San Diego បានទទួលវ៉ាក់សាំងនៅថ្ងៃទី ១៨ ខែធ្នូ ដោយបាននិយាយថា ផលប៉ះពាល់នៃវ៉ាក់សាំងតែមួយគត់ដែលលោកបានជួបប្រទះ គឺការចុកដៃ។
៦ ថ្ងៃ ក្រោយមកលោក Matthew បានធ្លាក់ខ្លួនឈឺដោយមានរោគសញ្ញា គ្រុនញាក់ ឈឺសាច់ដុំ និងអស់កម្លាំង បន្ទាប់ពីលោកបានធ្វើការ ១ វេនក្នុងផ្នែកជំងឺកូវីដ ១៩ នៃមន្ទីរពេទ្យ។ ការធ្វើតេស្តនៅមន្ទីរពេទ្យបានបញ្ជាក់ថា លោក Matthew គឺវិជ្ជមានជំងឺកូវីដ ១៩។
នៅក្នុងសេចក្ដីថ្លែងការណ៍មួយទៅកាន់ទីភ្នាក់ងារព័ត៌មាន Reuters ក្រុមហ៊ុន Pfizer បាននិយាយថា ពួកគេនឹងពិនិត្យមើលរាល់ព័ត៌មានដែលមានលើករណីនេះ និងរាល់ការរាយការណ៍ការរកឃើញករណីតេស្តវិជ្ជមានបន្ទាប់ពីការចាក់វ៉ាក់សាំង។
Pfizer ក៏បានបញ្ជាក់ផងដែរថា៖ «ដោយផ្អែកលើការសិក្សាសុវត្ថិភាព និងប្រសិទ្ធភាពដំណាក់កាលទី ៣ របស់យើង វ៉ាក់សាំងនេះផ្ដល់ភាពស៊ាំខ្លះ ក្នុងរយៈពេលប្រហែល ១០ ថ្ងៃបន្ទាប់ពីការចាក់លើកដំបូង ហើយភាពស៊ាំនឹងត្រូវបានបង្កើនយ៉ាងខ្លាំងបន្ទាប់ពីការចាក់លើកទី២។ នេះគឺជាការគាំទ្រដល់តម្រូវការសម្រាប់ការចាក់វ៉ាក់សាំង ២ ដូស»។
Pfizer បានបន្តទៀតថា ការធ្វើតេស្តវិជ្ជមានអាចដោយសារ «បុគ្គលម្នាក់ៗអាចឆ្លងជំងឺមុនឬភ្លាមៗ ក្រោយពេលចាក់វ៉ាក់សាំងរួច»។
លោកវេជ្ជបណ្ឌិត Christian Ramers ដែលជាអ្នកឯកទេសជំងឺឆ្លងនៅទីក្រុង San Diego បានប្រាប់ KGTV ថា សេណារីយោនេះ គឺមិនមែនជាសេណារីយោមិនបានរំពឹងទុកមុនទេ ដោយលោកលើកឡើងថា ទិន្នន័យការសាកល្បងបង្ហាញថា នេះជាអ្វីដែលគេគិតថា នឹងកើតឡើងបើសិនមានអ្នកប៉ះពាល់នឹងជំងឺ។
«យើងដឹងពីការសាកល្បងវ៉ាក់សាំងថា ត្រូវចំណាយពេលប្រហែល ១០ ទៅ ១៤ ថ្ងៃសម្រាប់អ្នក ដើម្បីចាប់ផ្ដើមបង្កើតការការពារ»។ លោក Ramers បាននិយាយបែប នេះ ហើយបានបន្តទៀតថា៖ «យើងគិតថា ដូសទី១ នឹងផ្ដល់ការការពារដល់អ្នកប្រមាណ ៥០% ហើយអ្នកត្រូវការដូសទី២ ដើម្បីឈានដល់កម្រិតការពារ ៩៥%»។
វេជ្ជបណ្ឌិតរូបនេះ ក៏បានលើកឡើងថាលោក Matthew បានឆ្លងមុនពេលចាក់វ៉ាក់សាំង ដោយសារកូវីដ ១៩ អាចចំណាយពេលរហូតដល់ ១៤ ថ្ងៃទើបចេញរោគសញ្ញា។
លោក Rammers បាននិយាយថា លោកបានដឹងអំពីករណីផ្សេងទៀតក្នុងតំបន់ដែលបុគ្គលិកសុខាភិបាលបានឆ្លងមេរោគនៅក្នុងអំឡុង ពេលដែលពួកគេបានទទួលវ៉ាក់សាំងនេះ។ លោកនិយាយថា គ្រប់ករណីទាំងអស់បង្ហាញពីការពិតដែលថា លទ្ធផលគឺមិនមានភ្លាមៗទេ ហើយបើទោះបីជាមានភាពស៊ាំខ្លះក៏ដោយ ក៏មិនមែនមានភាពស៊ាំពេញលេញនោះទេ។
ព្រឹត្តិការណ៍នេះ បានកើតឡើងខណៈពេលដែលវ៉ាក់សាំងចំនួន ២ ត្រូវបានអនុញ្ញាតឱ្យប្រើប្រាស់នៅចក្រភពអង់គ្លេស និងប្រទេសចិន។
កាលពីថ្ងៃពុធ ទី៣០ ចក្រភពអង់គ្លេសបានអនុញ្ញាតឱ្យប្រើប្រាស់វ៉ាក់សាំង AstraZeneca/Oxford ក្នុងគ្រាអាសន្ន។ វ៉ាក់សាំង AstraZeneca/Oxford គឺមានតម្លៃថោកជាងគេ ងាយស្រួលផលិត និងងាយស្រួលស្តុកទុក ហើយត្រូវបានគេរំពឹងថា នឹងក្លាយជាវ៉ាក់សាំងប្រើប្រាស់ច្រើនជាងគេក្នុងពិភពលោក។
ទិន្នន័យបឋមបានបង្ហាញថា វ៉ាក់សាំងនេះ មានប្រសិទ្ធភាពត្រឹមតែ ៦២% ប៉ុណ្ណោះប៉ុន្តែក្រោយមកបានរកឃើញថាមានប្រសិទ្ធភាព ៩០% ក្នុងជនស្ម័គ្រចិត្តដែលគេច្រឡំផ្ដល់វ៉ាក់សាំងត្រឹមតែពាក់កណ្ដាលដូសក្នុងការចាក់ទី ១ និងដូសពេញក្នុងការចាក់ទី២។ កំហុសនេះបានធ្វើឱ្យមានការមិនទុកចិត្តនៅប្រទេសផ្សេង។ សហរដ្ឋអាមេរិក និងសហភាពអឺរ៉ុបបានបង្ហាញថា ពួកគេទំនងជាមិនអនុញ្ញាតឱ្យចាក់វ៉ាក់សាំងនេះរហូតដល់យ៉ាងហោចណាស់ខែកុម្ភៈ ឆ្នាំ ២០២១។
ក្នុងការប្រកាសដដែលរដ្ឋាភិបាលចក្រភពអង់គ្លេសក៏បានផ្លាស់ប្ដូរយុទ្ធសាស្ត្រមកធ្វើការចាក់វ៉ាក់សាំងដូសទី១ឱ្យមនុស្សឱ្យច្រើនបំផុតជាជាងរក្សាទុកវ៉ាក់សាំងសម្រាប់ការចាក់ដូសទី២ ដើម្បីបង្កើនចំនួនមនុស្សដែលទទួលបានវ៉ាក់សាំង។
រីឯប្រទេសចិន វិញ កាលពីថ្ងៃព្រហស្បតិ៍ ទី ៣១ បានធ្វើការអនុញ្ញាតឱ្យប្រើប្រាស់វ៉ាក់សាំងផលិតដោយក្រុមហ៊ុនរដ្ឋចិន Sinopharm/Beijing Institute of Biological Products ដោយសន្និដ្ឋានថា វ៉ាក់សាំងនេះ មានប្រសិទ្ធភាព ៧៩% ក្នុងការសាកល្បងដំណាក់កាលទី ៣ របស់ពួកគេ។ អត្រាប្រសិទ្ធភាពនេះ គឺខុសពីអត្រាប្រសិទ្ធភាពនៃវ៉ាក់សាំងដដែលនៅប្រទេសអារ៉ាប់រួម ដែលកាលពីដើមខែធ្នូ បានប្រកាសឱ្យប្រើប្រាស់វ៉ាក់សាំងនេះ ក្រោយពីបានសន្និដ្ឋានថា មានប្រសិទ្ធភាព ៨៦%។ មួយវិញទៀត Sinopharm មិនបានបញ្ចេញទិន្នន័យអំពីចំនួនអ្នកសាកល្បង ឬផ្តល់ព័ត៌មានលម្អិតអំពីផលប៉ះពាល់ធ្ងន់ធ្ងរណាមួយទេ។
យ៉ាងណាមិញបើទោះបីជារដ្ឋាភិបាលចិន ទើបធ្វើការអនុញ្ញាតឱ្យប្រើប្រាស់ក៏ដោយ ក៏អាជ្ញាធរមូលដ្ឋានជាច្រើនបានធ្វើការចាក់វ៉ាក់សាំងនេះជូនប្រជាជនអស់ជាច្រើនខែមកហើយ ដែលអ្នកវិភាគមួយចំនួនគិតថា ជាអំពើមិន-ទទួលខុសត្រូវ៕