ក្រុងប៉េកាំងៈ មេដឹកនាំកូរ៉េខាងជើងលោក គីម ជុងអ៊ុន បានសម្តែងទុក្ខព្រួយយ៉ាងខ្លាំងក្រោយពីទេសចរចិនជាច្រើននាក់ បានស្លាប់ នៅពេលរថយន្តក្រុងមួយគ្រឿង បានធ្លាក់ពីលើស្ពានមួយ។
មន្ត្រីចិន និងប្រព័ន្ធផ្សព្វផ្សាយរដ្ឋបានឲ្យដឹងថា ទេសចរចិន៣២នាក់ និងកូរ៉េខាងជើង៤នាក់ បានស្លាប់នៅក្នុងឧប្បត្តិហេតុនោះ នៅខាងត្បូងក្រុងព្យុងយ៉ាង កាលពីរាត្រីថ្ងៃអាទិត្យ។ ចិនពីរនាក់ផ្សេងទៀត បានរងរបួស។
យោងតាមទីភ្នាក់ងារសារព័ត៌មាន KCNA បានឲ្យដឹងនៅថ្ងៃអង្គារនេះថា លោកគីម ជុងអ៊ុនបានជួបឯកអគ្គរដ្ឋទូតចិនដោយផ្ទាល់នៅក្នុងក្រុងព្យុងយ៉ាង និងក្រោយមក បានទៅសួរសុខទុក្ខអ្នកនៅរស់នៅមន្ទីរពេទ្យ។
សារព័ត៌មាន Rodong Sinmun ជាកាសែតរបស់គណបក្សកាន់អំណាច បានដាក់សកម្មភាពរបស់លោកគីម ជុងអ៊ុន នៅលើទំព័រមុខនៅក្នុងនោះ មានរូបថតរបស់លោកពាក់អាវពេទ្យពណ៌សកាន់ដៃរបស់អ្នកនៅរស់ពីរនាក់ ខណៈពួកគេដេក នៅលើគ្រែនៅក្នុងមន្ទីរពេទ្យនោះ៕ PSA