ក្រុងគូឡាឡាំពួៈ មេធាវីម្នាក់បាននិយាយកាលពីថ្ងៃអង្គារថា ការស៊ើបអង្កេតទៅលើករណីឃាតកម្មលើស្ត្រីជំទង់ ម្នាក់ទាក់ទងទៅនឹងអតីតមេដឹកនាំម៉ាឡេស៊ី ត្រូវបានគេបណ្តេញចេញពីតំណែងនោះ អាចត្រូវបានធ្វើឡើងជាថ្មីក្រោយពីមានជំនួបមួយរវាងឪពុកជនរងគ្រោះ និងអគ្គមេធាវី។
នាង Altantuya Shaariibuu ត្រូវបានគេបាញ់សម្លាប់ហើយសាកសពរបស់នាងត្រូវបានបំផ្ទុះដោយគ្រឿងផ្ទុះ។
ការសម្លាប់ជនជាតិម៉ុងហ្គោលីនោះ គឺជាឃាតកម្មមួយគួរឲ្យភ្ញាក់ផ្អើលដែលទាក់ទិននឹងរឿងអាស្រូវមួយ ដែលមានការចោទប្រកាន់ជាច្រើនថា ជំនួយការម្នាក់របស់អតីតនាយករដ្ឋមន្ត្រីលោក ណាជីប រ៉ាហ្សាក់ បានចាត់ចែងប្រាក់សំណូក យ៉ាងច្រើនសម្រាប់ការទិញនាវាមុជទឹករបស់បារាំង កាលពីឆ្នាំ ២០១២។
ករណីឃាតកម្មនោះ ធ្វើឲ្យសាធារណជនម៉ាឡេស៊ី ចាប់អារម្មណ៍ជាច្រើនឆ្នាំហើយ និងមានការចោទប្រកាន់ជាច្រើនថា លោកណាជីប ជារដ្ឋមន្ត្រីការពារជាតិ បានធ្វើកិច្ចព្រមព្រៀងទិញលក់នោះ ហើយប្រពន្ធរបស់លោក គឺលោកស្រី Rosmah Mansor ក៏ជាប់ពាក់ព័ន្ធដែរ។ ពួកគេបានបដិសេធការចោទប្រកាន់យ៉ាងដាច់អហង្ការ។
ការចាញ់ការបោះឆ្នោតកាលពីខែមុនរបស់របបលោកណាជីប ដែលត្រូវរងការចោទប្រកាន់ពីការកប់ចោលរឿងអាស្រូវនោះនាំឲ្យមានការប៉ាន់ស្មានថា ព័ត៌មានលម្អិតអំពីករណីដែលកប់បាត់ឈឹងនោះអាចត្រូវបានលាតត្រដាង។
កាលពីថ្ងៃអង្គារ ឪពុករបស់នាង Altantuya គឺលោក Setev Shaariibuu និងមេធាវីរបស់លោក បានជួបលោក អគ្គមេធាវី Tommy Thomas ដើម្បីពិភាក្សាថាតើក្រុមអាជ្ញាធរ អាចមើលឃើញរឿងអាស្រូវនោះដែរឬទេ៕