ក្រុងម៉ិកស៊ីកូ: រដ្ឋមន្ត្រីក្រសួងមហាផ្ទៃលោក Alfonso Navarrete បានឲ្យដឹងកាលពីថ្ងៃចន្ទថា ជនល្មើសដែលគេចោទប្រកាន់ថានៅពីក្រោយការបាញ់សម្លាប់អ្នកកាសែតម៉ិកស៊ិកឈ្មោះ Javier Valdez អ្នកសហការឆ្លើយឆ្លងសារព័ត៌មាន AFP រយៈពេលយូរ ដែលត្រូវបានសម្លាប់នៅក្នុងខែឧសភា ឆ្នាំ ២០១៧ កំពុងស្ថិតនៅក្នុងការចាប់ឃុំខ្លួនពីក្រុមអាជ្ញាធរប៉ូលិស។
លោក Navarrete បានឲ្យដឹងនៅលើទំព័រធ្វីធើរថា៖ «២ ឬ ៣ ខែកន្លងទៅ (ក្រុមប៉ូលិសនិងក្រុមរដ្ឋអាជ្ញា) បានចាប់ឃុំខ្លួនក្រុមជនអ្នកបង្កឃាតកម្ម ដែលតាមការចោទប្រកាន់លើ រូបអ្នកកាសែតឈ្មោះ Javier Valdez ដែលបានស្លាប់យ៉ាងអកុសលកាលពីឆ្នាំទៅនៅក្នុងរដ្ឋ Sinaloa។
អ្នកនាំពាក្យក្រសួងមហាផ្ទៃ បានឲ្យដឹងថា ពួកគេមិនបានផ្តល់ព័ត៌មានលម្អិតបន្ថែមទៀតឡើយ។ លោក Valdez គឺជាអ្នកកាសែតទទួលបានពានរង្វាន់ដែលបានព្យាយាមតាមដាននិងផ្សព្វផ្សាយអំពីក្រុមសង្គមឈ្មួញគ្រឿងញៀនដ៏មានអំណាចខ្លាំងនៅក្នុងទឹកដីម៉ិកស៊ិក ត្រូវបានបាញ់សម្លាប់ទាំងកណ្តាលថ្ងៃនៅខាងក្រៅការិយាល័យរបស់កាសែត Riodoce ជាកាសែតមួយ ដែលលោករួមបង្កើតឡើងនៅក្នុងទីក្រុង Culiacan ជារដ្ឋធានីរបស់រដ្ឋ Sinaloa ជាស្រុកកំណើតរបស់លោក។ លោកមានអាយុ ៥០ ឆ្នាំ ខណៈត្រូវបានគេធ្វើឃាត។
លោក គឺជាមនុស្សម្នាក់ក្នុងចំណោមអ្នកសរសេរនិពន្ធដ៏ល្បីល្បាញបំផុតអំពីសង្គ្រាមគ្រឿង ញៀនដ៏សាហាវនៅម៉ិកស៊ិកនៅក្នុងរដ្ឋមួយជាទីដែលបុរសម្នាក់ឈ្មោះ Joaquin “El Chapo” Guzman ដែលពេលនេះកំពុងជាប់ពន្ធនាគារនៅអាមេរិកធ្លាប់បានគ្រប់គ្រងអំណាច។
កាលពីឆ្នាំ ២០១១ គណៈកម្មាធិការការពារអ្នកកាសែត (CPJ) មានមូលដ្ឋានក្នុងបុរីញូវយ៉ក បានផ្តល់កិត្តិយសដល់លោក Valdez ចំពោះកិច្ចការរបស់លោក ជាមួយពានរង្វាន់សេរីភាពបញ្ចេញមតិ (FEA) ដ៏ប្រកបដោយកិត្យានុភាព។ លោកស្ថិតក្នុងចំណោមអ្នកកាសែត ១១ នាក់ដែលត្រូវគេធ្វើឃាត៕