.jpg)
កាលពីថ្ងៃសៅរ៍ ទី ១០ តុលា កងទ័ពរំដោះប្រជាជនចិនបានធ្វើសមយុទ្ធខ្នាតធំ ១ ក្នុងទម្រង់វាយគ្រប់គ្រងដីកោះក្រោមប្រធានបទ «ពង្រឹងសមត្ថភាពប្រយុទ្ធ និងការពារបូរណភាពទឹកដី»។ សមយុទ្ធនេះធ្វើឡើងស្របពេលដែលកោះតៃវ៉ាន់ កំពុងតែអបអរគម្រប់ខួបនៃការបង្កើតរបបសាធារណរដ្ឋចិនឆ្នាំ ១៩១១។
យោងតាមប៉ុស្តិ៍ទូរទស្សន៍រដ្ឋចិន CCTV បានរាយការណ៍ថា សមយុទ្ធធ្វើឡើងនៅពេលយប់ ជាការហ្វឹកហាត់ប្រតិបត្តិការយោធារួម (អាកាស គោក និងជើងទឹក) និងមានចល័ត យន្តហោះដ្រូន កងកម្លាំងពិសេស និងកងកម្លាំងឆត្រយោងចេញពីតំបន់មាត់សមុទ្រនៃខេត្តក្វាងទុង និងហ្វូជាន។
CCTV បានឱ្យដឹងទៀតថា៖ «សមយុទ្ធដែលមានការធ្វើសមាហរណកម្មប្រកបដោយប្រសិទ្ធភាពនៃកម្លាំងប្រយុទ្ធថ្មីជាច្រើននេះបានបង្កើនសមត្ថភាពប្រយុទ្ធជាក់ស្តែងរបស់កងទ័ពរំដោះចិនក្នុងការរួមគ្នាវាយប្រយុទ្ធឡើងគោក (Landing) ជាបីវិជ្ឈមាត្រ (three dimensional assault)»។
ដោយឡែកនៅថ្ងៃអង្គារ ទី ១៣ ខែតុលា កងទ័ពរំដោះប្រជាជនចិនបានធ្វើសមយុទ្ធម្ដងទៀតក្នុងដែនដីនៃខេត្តហ្វូជាន។
គួរកត់សម្គាល់ថា សមយុទ្ធរបស់កងទ័ពរំដោះប្រជាជនចិនធ្វើឡើងក្រោយពីភាពតានតឹងបានកើនឡើងជាបន្តបន្ទាប់ក្នុងរយៈពេលប៉ុន្មានសប្ដាហ៍ចុងក្រោយនេះ។ ទីក្រុងប៉េកាំងបានបង្កើនសម្ពាធយោធាស្ទើរតែរាល់ថ្ងៃទៅលើតៃវ៉ាន់ដោយបានបញ្ជូនយន្តហោះចម្បាំងឆ្លងកាត់ «ខ្សែបន្ទាត់មេដ្យាន» ដែលពុះច្រកសមុទ្រតៃវ៉ាន់ជា ២។ ក្រសួងការពារជាតិតៃវ៉ាន់បាននិយាយថា តាំងពីថ្ងៃទី ១៦ ខែកញ្ញា មក ចិនបានឆ្លងកាត់ខ្សែបន្ទាត់មេដ្យានចំនួន ១៧ ដង។
ថ្លែងនៅឯពិធីបុណ្យជាតិនៃការបង្កើតសាធារណរដ្ឋចិន ១៩១១ លោកស្រីប្រធានាធិបតី Tsai Ing-wen បានពណ៌នាពីស្ថានភាពច្រកសមុទ្រតៃវ៉ាន់ថា ពិតជាមានភាពតានតឹង ហើយបានអំពាវនាវឱ្យមានកិច្ចសន្ទនាប្រកបដោយខ្លឹមសារ (meaningful dialogue) ជាមួយទីក្រុងប៉េកាំង ដោយឈរលើមូលដ្ឋានស្មើភាពគ្នា។
ជាការឆ្លើយតបនឹងសម្តីរបស់លោកស្រី Tsai អ្នកនាំពាក្យការិយាល័យកិច្ចការតៃវ៉ាន់របស់ក្រុងប៉េកាំង លោក Zhu Fenglian បាននិយាយថា៖ «ផ្លូវទៅរកឯករាជភាពរបស់កោះតៃវ៉ាន់ គឺជាផ្លូវទាល់ រីឯការប្រឈមមុខដាក់គ្នាក៏មិនអាចទម្លាយផ្លូវទាល់នេះទេ»។
ទន្ទឹមនឹងការរាយការណ៍អំពីសមយុទ្ធ CCTV ក៏បានចាក់បញ្ចាំងនូវចម្លើយសារភាពរបស់បុរសសញ្ជាតិតៃវ៉ាន់ ១ រូប ដែលអាជ្ញាធរប៉េកាំងបានចោទថា បានធ្វើចារកម្មនៅហុងកុង និងសិនជិន។
លោក Lee Meng-Chu មានឈ្មោះជាភាសាអង់គ្លេសថា Morris Lee ត្រូវបានចាប់ខ្លួននៅតំបន់ព្រំដែនហុងកុង-សិនជិន កាលពីខែកញ្ញា ឆ្នាំមុន ពីបទធ្វើសកម្មភាពបង្កគ្រោះថ្នាក់ដល់សន្តិសុខរដ្ឋ។ អាជ្ញាធរចិនបាននិយាយថា លោក Lee បានទៅហុងកុង ដើម្បីគាំទ្របាតុករប្រឆាំងចិនហើយក៏បានរកឃើញថា លោកបានលួចថតរូបភាព និងវីដេអូ នៃប៉ូលិសប៉េអឹមចិន ដែលរូបភាព និងវីដេអូនោះ អាចប្រើសម្រាប់វិភាគអំពីយុទ្ធជនឧបករណ៍យោធា និងកម្លាំងយោធា។
លោក Lee ស្លៀកពាក់ឯកសណ្ឋានអ្នកទោសបាននិយាយថា៖ «ខ្ញុំសុំទោស ខ្ញុំបានធ្វើរឿងអាក្រក់ជាច្រើនកាលពីអតីតកាល ប្រហែលជាខ្ញុំធ្វើឱ្យប៉ះពាល់ដល់មាតុភូមិ និងប្រទេស»។
ចិនបានហៅការចាប់ខ្លួនក្រុមចារកម្មតៃវ៉ាន់ថា ជាផ្នែកមួយនៃបេសកកម្មពិសេស ឬហៅថា «រន្ទះ ២០២០ (Thunder 2020)» ដោយបានបង្ក្រាបក្រុមចារកម្មតៃវ៉ាន់រាប់រយនាក់។ ជាមួយគ្នានេះ ចិនក៏បានចោទក្រុងតៃប៉ិថា បានផ្ដល់ការគាំទ្រដល់ចលនាតវ៉ារបស់ហុងកុងហើយលើកឡើងថា ចលនាឯករាជ្យតៃវ៉ាន់ និងហុងកុង កំពុងតែឃុបឃិតគ្នា។
ការចាក់ផ្សាយចម្លើយសារភាពរបស់លោក Lee ត្រូវបានក្រុមប្រឹក្សាកិច្ចការចិនដីគោករបស់ក្រុងតៃប៉ិនិយាយថា ជាការផ្សព្វផ្សាយព្យាបាទផ្នែកនយោបាយដោយភាគីម្ខាងទៀត ក្នុងបំណងបំផ្លាញទំនាក់ទំនងដោយចេតនានៅច្រកសមុទ្រតៃវ៉ាន់ តាមរយៈការដាក់អន្ទាក់តៃវ៉ាន់ឱ្យចូលរួមក្នុងសកម្មភាពធ្វើចារកម្ម។ ក្រុមប្រឹក្សាបានបន្តទៀតថា ចិនគួរតែបញ្ឈប់ការព្យាយាមធ្វើការចោទប្រកាន់មិនពិតទៅលើពលរដ្ឋរបស់តៃវ៉ាន់។
ទំនាក់ទំនងរវាងតៃវ៉ាន់ និងចិនដីគោកប្រែជាអាក្រក់ទៅៗ ជាពិសេសក្រោយពីលោកស្រី Tsai មកពីគណបក្សវឌ្ឍនភាពប្រជាធិបតេយ្យដែលមានគោលនយោបាយធ្វើឱ្យតៃវ៉ាន់មានឯករាជភាព និងមិនទទួលយកគោលការណ៍ចិនតែមួយឈ្នះឆ្នោតនៅឆ្នាំ ២០១៦៕
