.jpg)
លោក ស៊ី ជីនភីង (ទី២ ស្តាំ) ថតជាមួយគណៈប្រតិភូទៅចូលរួមជំនួបនៅមហាកំពែងប្រជាជនចិន។ AFP
ក្រុងស៊ីដនី៖ យោងតាមការសិក្សាមួយត្រូវបានបោះពុម្ពផ្សាយកាលពីថ្ងៃពុធ ដែលផ្តល់ភ័ស្តុតាងថ្មីអំពីមហិច្ឆតាជាសកលរបស់ក្រុងប៉េកាំង បានឲ្យដឹងថា សម្រាប់ជាលើកដំបូងហើយ ប្រទេស ចិន មានស្ថានកុងស៊ុលការទូតនៅជុំវិញពិភពលោកច្រើនជាងអាមេរិក។
វិទ្យាស្ថាន Lowy របស់អូស្ត្រាលី បានរាយការណ៍ថា ការកើនឡើងយ៉ាងឆាប់រហ័សនៃលំដាប់ថ្នាក់បណ្តាញការទូតរបស់ប្រទេស ចិន បានបន្តនៅក្នុងឆ្នាំ ២០១៩ ដោយត្រូវបានជំរុញឲ្យបើកស្ថានកុងស៊ុលការទូតជាច្រើននៅក្នុងបណ្តាប្រទេសដែលធ្លាប់ទទួលស្គាល់កោះតៃវ៉ាន់។
ក្រុមអ្នកនិពន្ធនៃសន្ទស្សន៍ការទូតពិភពលោករៀងរាល់ ២ ឆ្នាំម្តង បាននិយាយថា ដោយមានកុងស៊ុលចំនួន ២៧៦ កន្លែង នៅទូទាំងពិភពលោកសម្រាប់លើកដំបូង ហើយប្រទេស ចិន បានលើសបណ្តាញទំនាក់ទំនងការទូតរបស់អាមេរិកត្រឹមតែ ៣ ស្ថានកុងស៊ុលការទូតប៉ុណ្ណោះ។
នៅក្នុងលទ្ធផល ដែលទំនងជាត្រូវបានគេចាត់ទុកជាការចង្អុលបង្ហាញចំពោះការផ្លាស់ប្តូរភូមិសាស្ត្រនយោបាយនោះ ក្រុមអ្នកនិពន្ធបាននិយាយថា ការទូតរបស់អាមេរិក បានធ្លាក់ចូលក្នុងស្ថានភាពមិនប្រាកដប្រជាមួយ ដោយសារលោកប្រធានាធិបតី ដូណាល់ ត្រាំ កាត់បន្ថយថវិកា និងបញ្ហាជាច្រើនក្នុងការរក្សាទុកក្រុមអ្នកការទូតអាជីពនោះ។
លោក វ៉ាង យី (ស្តាំ) ជួបពិភាក្សាជាមួយអតីតរដ្ឋមន្ត្រីការបរទេសអុីរ៉ាក់លោក Ayad Allawi។ រូបថត AFP
អាមេរិកមិនបានបើកស្ថានកុងស៊ុលថ្មីទេ និងបានបង្ខំបិទស្ថានកុងស៊ុលនៅក្នុងក្រុង Saint Petersburg ស្របពេលមានការបណ្តេញអ្នកការទូត បន្ទាប់ពីមានការបំពុលអតីតចារបុរសរុស្ស៊ី លោក Sergei Skripal នៅក្នុងចក្រភពអង់គ្លេសនោះ។
ប៉ុន្តែអាមេរិកនៅតែជាកន្លែងដ៏ពេញនិយមបំផុត ដែលមានស្ថានទូត ឬស្ថានកុងស៊ុលដោយប្រទេសចំនួន ៦១ មានស្ថានកុងស៊ុល ៣៤២ ទល់នឹងស្ថានកុងស៊ុលការទូតបរទេស ២៥៧ នៅក្នុងប្រទេស ចិន។
នៅពេលជាមួយគ្នានោះ ទំនាក់ទំនងរបស់ក្រុងប៉េកាំង បានបន្តរីកចម្រើន ដោយស្ថានកុងស៊ុលត្រូវបានបង្កើតឡើងនៅប្រទេស បួគីណាហ្វាសូ សាធារណរដ្ឋដូមីនីក អែល- សាល់វ៉ាឌ័រ ហ្គំប៊ី និងសៅតូមេ និងប្រាំងស៊ីប ដែលប្រទេសទាំងអស់នេះ គឺជាអតីតមិត្តរបស់ក្រុងតៃប៊ិ។
សន្ទស្សន៍នេះ អាចជាការចង្អុលបង្ហាញឲ្យឃើញឥទ្ធិពលយ៉ាងច្បាស់ ជាចំនួននៃអគារទាំងអស់នៅជុំវិញពិភពលោកផ្តល់ការចង្អុលឲ្យឃើញថាតើអ្នកការទូតធ្វើការនៅទីនោះនឹងមានប្រសិទ្ធភាពប៉ុនណា?
ប៉ុន្តែការសិក្សានេះ ផ្តល់ឲ្យរបាយការណ៍អំពីនិន្នាការនយោបាយប្រែប្រួលយ៉ាងទូលំទូលាយ។
ទោះបីជាមានការសន្យាបង្កើត «ចក្រភពអង់គ្លេសសកលមួយ» ដោយគ្មាន សមាជិកភាពរបស់សហភាពអឺរ៉ុបក្តី ក៏អង់គ្លេសបានធ្លាក់ចំណាត់ថ្នាក់ដល់ទី ១១ នៅក្រោមប្រទេស អ៊ីតាលី អេស្ប៉ាញ និងប្រេស៊ីល។
ទន្ទឹមគ្នានោះ ប្រទេស អៀរឡង់ និងហូឡង់ បានបង្កើនបណ្តាញទំនាក់ទំនងការទូតរបស់ពួកគេដែរ ដោយមានស្ថានកុងស៊ុល ៦ ប៉ុណ្ណោះ ជាផ្នែកនៃយុទ្ធសាស្ត្រ Brexit របស់ពួកគេ ដើម្បីទាញយកផលប្រយោជន៍ពីការចាកចេញរបស់អង់គ្លេស៕ AFP/PSA
