.jpg)
កាលពីថ្ងៃសៅរ៍ ទី ១៦ ខែមករា ប្រទេសចិន បានបង្ហើយការសាងសង់មន្ទីរពេទ្យដែលមានបន្ទប់ចំនួន ១ ៥០០ សម្រាប់អ្នកជំងឺកូវីដ ១៩ បន្ទាប់ពីចាប់ផ្ដើមសាងសង់កាលពី ៥ ថ្ងៃមុន។
មន្ទីរពេទ្យនេះ គឺក្នុងចំណោមមន្ទីរពេទ្យចំនួន ៦ ដែលរដ្ឋាភិបាលចិនកំពុងសាងសង់ក្នុងទីក្រុង Nangong ខេត្ត Hebei គឺដើម្បីប្រយុទ្ធប្រឆាំងនឹងការរីករាលដាលជាថ្មី នូវជំងឺកូវីដ ១៩ នៅភាគខាងត្បូងនៃរដ្ឋធានីប៉េកាំង។
អ្នកជំងឺប្រមាណចំនួន ៦៤៥ នាក់ កំពុងសម្រាកព្យាបាលនៅ Nangong។ កាលពីថ្ងៃសុក្រ ប្រទេសចិន បានប្រឈមនឹងកម្រិតឆ្លងខ្ពស់បំផុតក្នុងរយៈពេលជាច្រើនខែ ដោយបានរកឃើញប្រមាណ ១៣០ ករណី ក្នុងរយៈពេល ២៤ ម៉ោង។ រដ្ឋាភិបាលចិនបានចោទប្រកាន់ការឆ្លងថ្មីនេះ គឺបង្កដោយអ្នកធ្វើដំណើរ ឬទំនិញមកពីបរទេស៕
