ក្រុងប៉េកាំង៖ មេដឹកនាំប្រទេស ចិន លោក ស៊ី ជីនភីង និងប្រធានាធិបតីបារាំងលោក អេម៉ានុយអែល ម៉ាក្រុង បានប្រកាសកាលពីថ្ងៃពុធថា កិច្ចព្រមព្រៀងអាកាសធាតុក្រុងប៉ារីស «មិនអាចប្រែប្រួល» បានទេ ដោយបានបង្ហាញអំពីរណសិរ្សរួបរួម ក្រោយពីក្រុងវ៉ាស៊ីនតោន បានដកខ្លួនចេញពីកិច្ចព្រមព្រៀងនេះ ជាផ្លូវការនៅសប្តាហ៍នេះ។
សេចក្តីប្រកាសរួមគ្នានោះ បានធ្វើឡើងនៅពេលបញ្ចប់ទស្សនកិច្ចលើកទី ២ របស់លោក ម៉ាក្រុង ទៅកាន់ប្រទេស ចិន ដែលបានចាប់ផ្តើមកាលពីថ្ងៃចន្ទនៅក្រុងស៊ាងហៃ ហើយរួមមានកិច្ចពិភាក្សាស្តីពីពាណិជ្ជកម្ម និងបញ្ហាកម្មវិធីអាវុធនុយក្លេអ៊ែររបស់អ៊ីរ៉ង់ផងដែរនោះ។
មេដឹកនាំបារាំងបានថ្លែងថា លោកបានប្រាប់លោក ស៊ី ជីនភីង ថា មានតម្រូវការមួយដើម្បីពិភាក្សាដោះស្រាយចលាចលអស់ជាច្រើនខែនៅក្នុងទីក្រុងហុងកុង ដោយមិនអើពើទៅនឹងការព្រមានមុនរបស់ក្រុងប៉េកាំងថា បញ្ហាពិបាកបែបនេះនឹងមិនត្រូវដាក់នៅក្នុងរបៀបវារៈនោះទេ។
ប៉ុន្តែលោក ស៊ី ជីនភីង និងលោក ម៉ាក្រុង បានស្វែងរកកិច្ចពិភាក្សារួមគ្នាស្តីពីការប្រែប្រួលអាកាសធាតុ។
ប្រទេសមហាអំណាចទាំង ២ បានសម្តែងការសោកស្តាយ និងព្រួយបារម្ភ ក្រោយពីលោកប្រធានាធិបតី ដូណាល់ ត្រាំ បានបន្តដំណើរការដកអាមេរិកពីកិច្ចព្រមព្រៀងក្រុងប៉ារីស នេះ ទោះបីជាមានការបង្ហាញភ័ស្តុតាងអំពីការពិត និងផលប៉ះពាល់ពីការប្រែប្រួលអាកាសធាតុក្តី។
ក្រុងវ៉ាស៊ីនតោន បានដាក់លិខិតដកខ្លួនចេញរបស់ខ្លួនទៅ UN កាលពីថ្ងៃចន្ទ កាលបរិច្ឆេទលទ្ធភាពដំបូងស្ថិតនៅក្រោមកិច្ចព្រមព្រៀង ដែលបានចរចាដោយប្រធានាធិបតីមុន គឺ បារ៉ាក់ អូបាម៉ា ដោយធ្វើឲ្យសេដ្ឋកិច្ចធំជាងគេរបស់ពិភពលោកនេះចាកចេញពីកិច្ចព្រមព្រៀងនេះ៕ AFP/SK