កាលពីថ្ងៃសៅរ៍ ២១ វិច្ឆិកា ចៅក្រមសហព័ន្ធ ១ រូប នៅរដ្ឋ Pennsylvania បានច្រានចោលពាក្យបណ្ដឹងដ៏សំខាន់មួយរបស់ក្រុមរៀបចំយុទ្ធនាការបោះឆ្នោតលោក Donald Trump ក្នុងការតវ៉ាលទ្ធផលនៃការបោះឆ្នោតប្រធានាធិបតី ៣ វិច្ឆិកា ដែលប្រធានាធិបតីជាប់ឆ្នោតលោក Joe Biden ត្រូវបានគេសន្មតថា បានទទួលជ័យជម្នះ។
ពាក្យក្រុមលោក Trump គឺដើម្បីរារាំងមន្ត្រីរដ្ឋ Pennsylvania ពីការធ្វើការបញ្ជាក់លទ្ធផលនៃការបោះឆ្នោតនៅក្នុងរដ្ឋនេះ ដោយបានអះអាងថា រដ្ឋមួយនេះបានរំលោភលើការធានាការពារស្មើភាពគ្នារបស់រដ្ឋធម្មនុញ្ញអាមេរិក នៅពេលបណ្ដាស្រុកមួយចំនួនបានចាត់វិធានការផ្សេងៗ ដើម្បីជូនដំណឹងអ្នកបោះឆ្នោតអំពីបញ្ហាបច្ចេកទេសនៅលើសន្លឹកឆ្នោតផ្ញើតាមប្រអប់សំបុត្រ ខណៈស្រុកផ្សេងទៀតមិនបានធ្វើបែបនេះ ធ្វើឱ្យសន្លឹកឆ្នោតចំនួន ២ ត្រូវបានចាត់ទុក្ខជាមោឃៈ។
លោកចៅក្រម Matthew Brann ដែលជាចៅក្រមអភិរក្សនិយម បានសរសេរក្នុងការសម្រេចរបស់លោកថា៖ «ដើមបណ្ដឹងបានស្នើឱ្យតុលាការនេះដកសិទ្ធិអ្នកបោះឆ្នោតជិត ៧ លាននាក់។ តុលាការនេះមិនអាចរកឃើញរឿងក្ដីណាដែលដើមបណ្ដឹងបានស្នើវិធីដោះស្រាយយ៉ាងខ្លាំងបែបនេះ ក្នុងការចូលរួមប្រកួតប្រជែងការបោះឆ្នោតនោះទេ បើសិននិយាយអំពីបរិមាណអ្នកបោះឆ្នោត ដែលត្រូវបានស្នើឱ្យទុកជាមោឃៈ។ គេអាចរំពឹងថា នៅពេលដែលធ្វើការស្នើដ៏ភ្ញាក់ផ្អើលបែបនេះ ដើមបណ្ដឹងនឹងត្រូវនាំយកនូវអំណះអំណាង និងភ័ស្តុតាងច្បាស់លាស់នៃអំពើពុករលួយ។ បើសិនបែបនេះ តុលាការនឹងគ្មានជម្រើសអ្វីក្រៅពីផ្ដល់តាមសំណើនេះ បើទោះបីវាមានផលប៉ះពាល់ដល់ពលរដ្ឋមួយក្រុមធំបែបនេះក៏ដោយ។ រឿងនោះមិនបានកើតឡើងទេ»។
លោកចៅក្រម Brann បានបន្តទៀតថា៖ «ផ្ទុយទៅវិញតុលាការត្រូវបានបង្ហាញអំណះអំណាងគ្មានគុណសម្បត្តិ ការចោទប្រកាន់តាមការប៉ាន់ស្មាន និងភ័ស្តុតាងមិនមានការគាំទ្រ។ នៅក្នុងសហរដ្ឋអាមេរិក នេះមិនអាចធ្វើជាហេតុផលសម្រាប់ការដកសិទ្ធិអ្នកបោះឆ្នោតម្នាក់ ដោយមិនបាច់និយាយពលរដ្ឋទាំងអស់របស់រដ្ឋដែលមានប្រជាជនច្រើនជាងគេទី៦។ ប្រជាជន ច្បាប់ និងស្ថាប័នរបស់យើងទាមទារច្រើនជាងនេះ»។
លោក Rudy Giuliani ដែលជាមេធាវីផ្ទាល់ខ្លួនរបស់លោក Trump បានបង្ហាញក្នុងសេចក្ដីថ្លែងការណ៍មួយថា លោកមានការខកចិត្តទៅនឹងសេចក្ដីសម្រេចរបស់តុលាការ ហើយនឹងធ្វើការប្ដឹងបន្តទៅតុលាការឧទ្ធរណ៍។
លោក Giuliani ក៏បានសរសេរផងដែរថា៖ «ការសម្រេចចិត្តថ្ងៃនេះ នឹងជួយយើងក្នុងយុទ្ធសាស្ត្ររបស់យើង ដើម្បីពន្លឿនពាក្យបណ្ដឹងទៅកាន់តុលាការកំពូលរបស់អាមេរិក»។
ក្រៅពីរដ្ឋ Pennsylvania ក្រុមរបស់លោក Trump និងសហការីមួយចំនួន ក៏បានដាក់ពាក្យបណ្ដឹងរារាំងការបញ្ជាក់លទ្ធផលការបោះឆ្នោតនៅរដ្ឋមួយចំនួនទៀតដូចជា រដ្ឋ Arizona, Georgia, Michigan និង Nevada ដែលពាក្យបណ្ដឹងទាំងនេះ គឺសុទ្ធតែទាក់ទងជាមួយនឹងការបោះឆ្នោតតាមប្រអប់សំបុត្រ។ ក្រុមលោក Trump បានចាញ់ ឬដកពាក្យបណ្ដឹងនៅរដ្ឋទាំងនេះ ហើយនៅរដ្ឋ Georgia វិញ អភិបាលរដ្ឋនេះបានតែងតាំងអង្គបោះឆ្នោតរួចស្រេចកាលពីថ្ងៃសុក្រ។
ការរាប់សន្លឹកឆ្នោតឡើងវិញ គឺកំពុងប្រព្រឹត្តនៅស្រុកចំនួន ២ នៃរដ្ឋ Wisconsin ក្រោមការស្នើសុំរបស់ក្រុមលោក Trump ដែលគេប៉ាន់ស្មានថានឹងអាចចប់ថ្ងៃទី ២៥ វិច្ឆិកា។ លោក Biden ត្រូវបានសន្មតថា ទទួលជ័យជម្នះនៅរដ្ឋ Wisconsin ហើយការរាប់ឡើងវិញ គឺកំពុងធ្វើឡើងនៅស្រុកដែលនៅសល់សន្លឹកឆ្នោតផ្ញើតាមប្រអប់សំបុត្រដែលមិនទាន់បានរាប់ ដែលគេគិតថា លោក Trump អាចនឹងព្យាយាមធ្វើឱ្យសន្លឹកឆ្នោតទាំងនេះក្លាយជាមោឃៈ។
ដើម្បីទទួលជ័យជម្នះបេក្ខជនត្រូវការអង្គបោះឆ្នោតចំនួន ២៧០។ មកដល់ពេលនេះលោក Biden ត្រូវគេសន្មតថា ទទួលបានអង្គបោះឆ្នោតចំនួន ៣០៦ ធៀបនឹង ២៣២របស់លោក Trump។ បើសិនលោក Trump ចង់ដណ្ដើមយកជ័យជម្នះ លោកត្រូវទាញយកអង្គបោះឆ្នោត ៣៨ ពីលោក Biden តែអ្នកវិភាគមួយចំនួនគិតថា លោកមិនអាចធ្វើបាននោះទេ៕