.jpg)
រដ្ឋាភិបាលកូរ៉េខាងត្បូងបានឱ្យដឹងនាពេលថ្មីៗនេះថា ចំនួនប្រជាជនបានធ្លាក់ចុះជាលើកដំបូងក្នុងឆ្នាំ ២០២០ ដោយមានមនុស្សស្លាប់ច្រើនជាងកើត ដោយបង្ហាញថា ទីប្រជុំជនក្នុងតំបន់ក្រីក្រគឺប្រឈមនឹង «វិបត្តិនៃការផុតពូជ»។
តួលេខជំរឿនចុងក្រោយដែលបានចេញផ្សាយនៅចុងសប្ដាហ៍មុន បានបង្ហាញថា ចំនួនប្រជាជនមាន ៥១ ៨២៩ ០២៣ នាក់ នៅចុងខែធ្នូ ២០២០ ដែលទាបជាងឆ្នាំមុនចំនួន ២០ ៨៣៨ នាក់។ ប្រជាជនកូរ៉េខាងត្បូងបានកើនឡើងជារៀងរាល់ឆ្នាំក្នុងរយៈពេល ១ ទសវត្សរ៍ចុងក្រោយនេះ បើទោះបីជាអត្រាកំណើនបានធ្លាក់ចុះពី ១,៤៩% ក្នុងឆ្នាំ ២០១០ ដល់ ០,០៥% នៅឆ្នាំ ២០១៩។
ស្រដៀងនឹងប្រទេសជប៉ុន ដែរ ប្រទេសកូរ៉េខាងត្បូង ក៏កំពុងជួបប្រទះនូវការកើនឡើងនៃចំនួនមនុស្សវ័យចំណាស់ ដែល ២៤% នៃចំនួនប្រជាជនសរុបមានអាយុ ៦០ ឆ្នាំឡើងទៅ។
រដ្ឋបាលប្រធានាធិបតី លោក Moon Jae-in ថ្មីៗនេះ បានប្រកាសកម្មវិធីលើកទឹកចិត្តគូស្វាមីភរិយាឱ្យមានគ្រួសារធំៗ ដែលធ្វើការបង់ប្រាក់ ១ លានវ៉ុន សម្រាប់ស្ត្រីមានផ្ទៃពោះ និងប្រាក់ឧបត្ថម្ភប្រចាំខែសម្រាប់កុមារដែលមានអាយុក្រោម ១២ ខែ។ ប៉ុន្តែអ្នករិះគន់និយាយថា វិធានការនេះមិនបានធ្វើការដោះស្រាយឧបសគ្គហិរញ្ញវត្ថុធំក្នុងការចិញ្ចឹមកូន ដូចជាការអប់រំ និងតម្លៃគេហដ្ឋាន៕
