ក្រុងបេរូត៖ គណៈរដ្ឋមន្ត្រីលីបង់ កាលពីថ្ងៃពុធបានប្រកាសដាក់ប្រទេសក្នុងគ្រាអាសន្ន នៅក្នុងទីក្រុងបេរូតរយៈពេល ២ សប្តាហ៍ ខណៈចំនួនអ្នកស្លាប់ដោយសារការផ្ទុះឃ្លាំងស្តុកសារធាតុគីមី នៅឯកំពង់ផែនៃទីក្រុងបេរូតបានផ្តាច់ជីវិតមនុស្សរហូតដល់ ១៣៥ នាក់ នៅក្នុងប្រទេសលីបង់ មួយនេះ។
ការផ្ទុះទ្រង់ទ្រាយធំ ២ បានធ្វើឲ្យកក្រើកកំពង់ផែ នៃទីក្រុងបេរូតកាលពីថ្ងៃអង្គារ នៅម៉ោងប្រហែល ៦ និង ១០ នាទីយប់ ដោយបានធ្វើឲ្យរញ្ជួយអគារទាំងអស់ នៅទូទាំងរដ្ឋធានីលីបង់ ដោយបានបង្កឲ្យមានការខូចខាតយ៉ាងធ្ងន់ធ្ងរ នៅក្នុងទីក្រុងបេរូតនេះ។
រដ្ឋមន្ត្រីសុខាភិបាល គឺលោក ហាម៉េដ សាស់សាន់ បានប្រកាសថា រហូតមកទល់ពេលនេះ ការផ្ទុះនោះបានបណ្តាលឲ្យមនុស្ស ១៣៥ នាក់ ស្លាប់ និងមនុស្ស ៥ ០០០ នាក់ផ្សេងទៀតបានរងរបួស។
ការដាក់ប្រទេសក្នុងគ្រាអាសន្ន នោះនឹងស្ថិតនៅក្រោមការគ្រប់គ្រងរបស់យោធាលីបង់ ដែលនឹងរក្សាសន្តិសុខក្នុងទីក្រុង។
ព័ត៌មានបឋមបានបង្ហាញថា សារធាតុគីមីអាម៉ូញ៉ូម បានស្តុកទុកចាប់តាំងពីឆ្នាំ ២០១៤ នៅក្នុងឃ្លាំងលេខ ១២ នៅកំពង់ផែនៃទីក្រុងបេរូត អាចបានបង្កឲ្យមានការផ្ទុះយ៉ាងខ្លាំងក្លានៅទីនោះ។
គណៈរដ្ឋមន្ត្រីបានសម្រេចចិត្តឲ្យចាប់ខ្លួនរដ្ឋមន្ត្រីកំពង់ផែមួយចំនួន ដែលដឹងនិងជាប់ពាក់ព័ន្ធនៅក្នុងឃ្លាំងដែលមានសារធាតុគីមីអាម៉ូញ៉ូមចំនួនជាង ២ ៧០០ តោន នៅកំពង់ផែនៃទីក្រុងបេរូត។
គណៈរដ្ឋមន្ត្រីក៏បានស្នើឲ្យក្រសួងការងារសាធារណៈ ដើម្បីធានាឲ្យមានសកម្មភាពនាំចូល និងនាំចេញទំនិញឆ្លងកាត់តាមកំពង់ផែនៃក្រុងទ្រីប៉ូលី នៃប្រទេសលីប៊ី សិន៕ Xinhua/SK