ក្រុងម៉ុងតេវីដេអូ៖ យោងតាមចំនួនសរុបរបស់ AFP ផ្អែកលើតួលេខផ្លូវការបានឲ្យដឹងថា អាមេរិកឡាទីន និងតំបន់ការីប៊ីនកាលពីថ្ងៃសៅរ៍ មានករណីឆ្លងវីរុសផ្លូវដង្ហើមកូរ៉ូណាជាង ២ លាននាក់ ដោយប្រទេសប្រេស៊ីល មានករណីឆ្លងវីរុសនេះ ជាងពាក់កណ្តាលនៃករណីឆ្លងទាំងអស់នេះ។
វីរុសផ្លូវដង្ហើមនេះ កំពុងឆ្លងរាលដាលយ៉ាងឆាប់រហ័សនៅក្នុងតំបន់នេះ ជាតំបន់ដែលផ្ទុះឆ្លងវីវុសនេះ មានអ្នកឆ្លងជាង ២ ០០៧ ៦២១ នាក់។
ប្រេស៊ីលជាប្រទេសធំជាងគេបំផុតនៅអាមេរិកឡាទីនមានចំនួនករណីឆ្លង និងអ្នកស្លាប់ច្រើន បន្ទាប់ពីអាមេរិក។ ប្រទេសនេះ បានកត់ត្រាករណីឆ្លង ១ ០៦៧ ៥៧៩ នាក់ និងអ្នកស្លាប់ដោយសារជំងឺកូវីដ ១៩ ចំនួន ៤៩ ៩៧៦ នាក់។
ម៊ិកស៊ិក គឺជាប្រទេសដែលរងប៉ះពាល់ខ្លាំងបំផុតទី២ នៅក្នុងតំបន់នេះ ដោយមានអ្នកឆ្លង ១៧០ ០០០ នាក់ និងស្លាប់ ២០ ៣៤៩ នាក់។
ក្រុងម៊ិកស៊ីកូ បានគ្រោងបើកផ្សារ ភោជនីយដ្ឋាន និងអាជីវកម្មដទៃទៀតនៅថ្ងៃចន្ទនេះ ប៉ុន្តែអាជ្ញាធរបានពន្យារពេល ១ សប្តាហ៍ទៀត ដោយសារវីរុសផ្លូវដង្ហើមនេះ បន្តឆ្លងរាលដាល។
ចំនួនអ្នកឆ្លងវីរុសកូរ៉ូណានៅប្រទេសស៊ីលី បានកើនឡើងជិត ២ ដង ដោយកាលពីថ្ងៃសៅរ៍មានអ្នកស្លាប់ ៧ ១៤៤ នាក់ នៅក្រោមវិធីសាស្រ្តរាប់ចំនួនថ្មី ដែលរាប់បញ្ចូលអ្នកស្លាប់ជាច្រើន ដែលបានបណ្តាលមកពីជំងឺកូវីដ ១៩។
លោក Rafael Araos នៃក្រសួងសុខាភិបាលបានថ្លែង ខណៈដែលលោកពន្យល់អំពីវិធីសាស្ត្ររាប់ចំនួនថ្មីរបស់រដ្ឋាភិបាលថា ចំនួនសរុបបានកើនឡើងដល់ ៣ ០៦៩ នាក់។
នៅប្រទេសប៉េរូ វិញ ករណីឆ្លងវីរុសកូរ៉ូណាបានកើនឡើងដល់ ២៥០ ០០០ នាក់ ដោយមានអ្នកស្លាប់ ៧ ៨៦១ នាក់។ ប្រទេសនេះបានកត់ចំនួនអ្នកស្លាប់ ២០១ នាក់ ក្នុងរយៈពេល ២៤ ម៉ោងចុងក្រោយនេះ ជាចំនួនប្រចាំថ្ងៃខ្ពស់បំផុតទី២ តាំងពីស្ថានភាពគ្រាអាសន្នសុខភាពត្រូវបានប្រកាសនៅក្នុងខែមីនា។
ចំណែកនៅប្រទេសចិន វិញ ក្រុងប៉េកាំងបានរាយការណ៍ករណីឆ្លងថ្មី ២២ នាក់កាលពីថ្ងៃអាទិត្យ ក្រោយពីកិច្ចប្រឹងប្រែងធ្វើតេស្តទ្រង់ទ្រាយធំមួយដែលបានប្រមូលយកសំណាកជាង ២ លាននាក់ ជាកិច្ចខិតខំប្រឹងប្រែង ដើម្បីទប់ស្កាត់ការឆ្លងរាលដាលថ្មី។
ក្រុមឆ្លងថ្មីនៅក្នុងក្រុងប៉េកាំងនេះ បានបង្កឲ្យមានការភ័យខ្លាចកើតឡើងនៃវីរុសនេះនៅប្រទេសចិន ដែលបាននាំយកវីរុសនេះដាក់នៅក្រោមការគ្រប់គ្រងប៉ុន្មានខែថ្មីៗនេះ។
សហគមន៍ជាច្រើននៅក្នុងក្រុងនេះ ត្រូវបានបិទ ដើម្បីទប់ស្កាត់ការឆ្លងរាលដាលនៃវីរុសនេះដោយក្រុមអ្នកស្រុក ត្រូវបានប្រាប់មិនឲ្យធ្វើដំណើរ ដែលមិនចាំបាច់ និងបិទសាលារៀន។
ករណីឆ្លងថ្មីដែលត្រូវបានរាយការណ៍កាលពីថ្ងៃអាទិត្យរាប់បញ្ចូលគិលានុបដ្ឋាកម្នាក់ជាអ្នកធ្វើការផ្នែកសុខភាពទី១ ដែលត្រូវធ្វើតេស្តរកឃើញឆ្លងចាប់តាំងពីជំងឺនេះ កើតឡើងជាថ្មី ១ សប្តាហ៍កន្លងទៅ។
មនុស្សជាង ២២០ នាក់ ត្រូវបានធ្វើតេស្តរកឃើញឆ្លងជំងឺកូវីដ ១៩ នៅក្នុងក្រុមថ្មីនេះ។
ទីភ្នាក់ងារសារព័ត៌មានស៊ីនហួ បានរាយការណ៍ថា អាជ្ញាធរតំបន់ បានរៀបចំកន្លែងធ្វើតេស្តជាង ២ ០០០ កន្លែងនៅទៅទូទាំងក្រុងនេះ ដែលបានយកសំណាកពីមនុស្សជាង ២,៣ លាននាក់។
ការផ្ទុះឆ្លងរាលដាលនៃវីរុសផ្លូវដង្ហើមកូរ៉ូណាថ្មីបំផុតនេះបានកើតឡើងនៅផ្សារលក់ម្ហូបអាហារបោះដុំមួយ ដោយបានជំរុញឲ្យមានការភ័យខ្លាចយ៉ាងខ្លាំង ជុំវិញសុវត្ថិភាពនៃការផ្គត់ផ្គង់ម្ហូបអាហារនៅក្នុងក្រុងប៉េកាំង៕ AFP/PSA