ក្រុងនីហ្គោមបូៈ មនុស្សជាង ២៩០ នាក់ ត្រូវបានគេដឹងថា បានបាត់បង់ជីវិតនៅក្នុងការវាយប្រហារគ្រាប់បែកជាបន្តបន្ទាប់ទៅលើព្រះវិហារ និងសណ្ឋាគារប្រណីតៗជាច្រើនកន្លែងនៅស្រីលង្កា នៅក្នុងអំពើហិង្សាដ៏អាក្រក់បំផុត នៅលើកោះនេះ ចាប់តាំងពីសង្គ្រាមស៊ីវិលដែលបានបំផ្លិចបំផ្លាញនៅក្នុងប្រទេសនេះ បានបញ្ចប់ ១ ទសវត្សរ៍ហើយនោះ។
ជាការពិតណាស់ ការបំផ្ទុះគ្រាប់បែកចំនួន ៨ គ្រាប់ បានយកក្រុមអ្នកកាន់សាសនាគ្រិស្ត និងសណ្ឋាគារល្បីៗជាច្រើនកន្លែង រួមជាមួយភ្ញៀវអន្តរជាតិមួយចំនួនជាគោលដៅ។
មនុស្សយ៉ាងតិច ២៩០ នាក់បានស្លាប់ នៅក្នុងចំណោមពួកគេមានជនជាតិបរទេសរាប់សិបនាក់ និងរបួសជាង ៥០០ នាក់។
ប៉ូលិស បាននិយាយថា គ្រាប់បែកច្នៃមួយគ្រាប់ ដែលត្រូវបានគេរកឃើញនៅឯព្រលានយន្តហោះដ៏សំខាន់មួយ នៅក្រុងកូឡុំបូ ត្រូវបានគេដោះចេញហើយកាលពីល្ងាចថ្ងៃអាទិត្យ។
ការដាក់បម្រាមគោចរនៅទូទាំងប្រទេស ត្រូវបានធ្វើឡើងក្នុងរយៈពេលដ៏ខ្លី កាលពីថ្ងៃអាទិត្យ ក្រោយពីគ្រាប់បែកទាំងនោះត្រូវបានគេយកចេញកាលពីថ្ងៃព្រឹកថ្ងៃចន្ទ ដោយមានក្រុមអ្នកកាសែត AFP ដែលបានធ្វើការរាយការណ៍នៅក្នុងចំណោមហ្វូងមនុស្ស និងនៅលើម៉ូតូកង់បីនៅតាមផ្លូវនៃក្រុងនីហ្គោមបូនោះ។
នៅតែមានវត្តមានកងកម្លាំងសន្តិសុខយ៉ាងច្រើន ឈរការពារនៅឯព្រះវិហារ St Sebastien នៅក្រុងហ្គោបូ ជាទីកន្លែងមួយនៅក្នុងចំណោមកន្លែងផ្ទុះគ្រាប់បែកដែលរងប៉ះពាល់ខ្លាំង។
ប្រមុខប៉ូលិស បានផ្តល់ព័ត៌មានដល់ក្រុមមន្ត្រីជាន់ខ្ពស់កាលពី ថ្ងៃទី ១១ ខែមេសា ដោយព្រមានអំពីការវាយប្រហារអត្តឃាតពីក្រុមមួយហៅថាក្រុម Thowheeth Jamaath (NTJ) ជាក្រុមបដិវត្តន៍មូស្លីម៕