.jpg)
ក្រុមអ្នកស្ម័គ្រចិត្ត កំពុងកប់សាកសពររបស់អ្នករុករករ៉ែក្នុងរណ្តៅធំមួយ។AFP
តំបន់ប៉ាកានធ៍៖ អ្នករុករករ៉ែថ្លើមថ្មរាប់សិបនាក់ ត្រូវបានកប់នៅក្នុងរណ្តៅមួយយ៉ាងធំកាលពីថ្ងៃសុក្រ ក្រោយពីបាក់ដីនៅមីយ៉ាន់ម៉ាភាគខាងជើង បណ្តាលឲ្យមនុស្សជាង ១៧០ នាក់ស្លាប់ ភាគច្រើនពួកគេ គឺជាពលករចំណាកស្រុក ដែលស្វែងរកសំណាងនៅក្នុងតំបន់អណ្តូងរ៉ែនៅក្បែរព្រំដែនចិន។
ស្ត្រីជាច្រើនបានយំនៅក្បែរក្តារមឈូសចំហ មឈូសខ្លះមានត្រឹមឈ្មោះមនុស្សម្នាក់ ខ្លះទៀតមានរូបថតរួម ១ សន្លឹកមុននឹងសាកសពទាំងនោះ ត្រូវសែងចេញពីរណ្តៅធំ ១ ដែលនៅក្បែរកន្លែងបាក់ដី។
នេះ គឺជាគ្រោះថ្នាក់ដ៏អាក្រក់ដែលបានកើតឡើងនៅតំបន់រ៉ែថ្លើមថ្មដ៏គ្រោះថ្នាក់បំផុតនៅក្នុងប្រទេសមីយ៉ាន់ម៉ា។
សោកនាដកម្មនេះ បានកើតឡើងកាលពីថ្ងៃព្រហស្បតិ៍ នៅពេលដែលជើងភ្នំមួយបានស្រុតបាក់បង្កឡើងដោយភ្លៀងរដូវវស្សាធ្លាក់ខ្លាំង ដោយបានបណ្តាលឲ្យផ្ទាំងភក់កប់ទៅលើកម្មករដែលជីកកាយដី ដើម្បីរករ៉ែថ្លើមថ្ម។
នាយកដ្ឋានសេវាពន្លត់អគ្គិភ័យបាននិយាយនៅក្នុងការបង្ហោះលើគេហទំព័រហ្វេសប៊ុកថា៖ «បេសកកម្មស្វែងរក និងជួយសង្គ្រោះ បានបន្តហើយសាកសព ១៧៤ នាក់ ត្រូវបានរកឃើញ»។
ពួកគេជាច្រើននាក់បានស្លាប់ក្នុង ១ ឆ្នាំៗ នៅក្នុងតំបន់ប៉ាក់កាន់ធ៍ ជាតំបន់មួយស្ថិតនៅក្បែរព្រំដែនចិន នៅក្នុងរដ្ឋកាឈីន ជាទីដែលថ្មមានតម្លៃរាប់លានដុល្លារ ត្រូវបានគេជឿថា ត្រូវបានគេជីកកាយចេញក្នុង ១ ឆ្នាំៗពីជើងភ្នំ ដោយពលករចំណាកស្រុក ដែលស្វះស្វែងរក ដើម្បីក្លាយជាអ្នកមាន។
ខណៈរូបថតរបស់អ្នកស្លាប់ត្រូវបានចែករំលែកនៅលើបណ្តាញសង្គម អ្នកប្រើប្រាស់ហ្វេសប៊ុកបានចាប់ផ្តើមកំណត់អត្តសញ្ញាណកម្មករ ដែលមានចម្ងាយរាប់ពាន់គីឡូម៉ែត្រពីផ្ទះសំបែងរបស់ពួកគេ ដោយបានបញ្ជូនភិនភាគសាកសពទៅកាន់មិត្តភក្តិ និងសមាជិកគ្រួសាររបស់ពួកគេ។
អ្នកស្រី Hnin Wati បាននិយាយថា៖ «សូមមេត្តាជួយនាំឪពុករបស់ខ្ញុំត្រឡប់មកវិញផង»។ «បេះដូងរបស់កូនកំពុងញាប់ញ័រ ដោយការភ័យព្រួយបារម្ភ»៕ AFP/PSA
