.jpg)
ផ្ទះរបស់ប្រជាជនត្រូវបានបំផ្លាញខ្ទេចខ្ទីដោយសារព្យុះសុីក្លូនអុីដៃ។ AFP
ក្រុងបេរ៉ាៈ ចំនួនអ្នកស្លាប់ដោយសារខ្សល់ព្យុះស៊ីក្លូន មានឥទ្ធិពលខ្លាំងក្លា ដែលបានវាយប្រហារប្រទេសជាច្រើននៅអាហ្រ្វិកខាងត្បូង ដោយជន់លិចផ្ទៃដីរាប់ពាន់គីឡូម៉ែត្រការ៉េកាលពីថ្ងៃសៅរ៍ បានកើនឡើងដល់ជាង ៦០០ នាក់ ខណៈជំងឺបានរាតត្បាត ទៅលើក្រុមអ្នកនៅរស់ពីខ្សល់ព្យុះស៊ីក្លូនរាប់ម៉ឺននាក់។
យោងតាមរដ្ឋាភិបាលបានឲ្យដឹងថា មនុស្សយ៉ាងតិច ៤១៧ នាក់បានស្លាប់នៅក្នុងប្រទេស ម៉ូសំប៊ិក ដោយនាំឲ្យចំនួនអ្នកស្លាប់កើនដល់ ៦៧៦ នាក់នៅពេលរួមបញ្ចូលជាមួយអ្នកស្លាប់មកពីប្រទេស ហ្ស៊ីមបាវ៉េ ដែលនៅជិតខាង។
ព្យុះស៊ីក្លូនអ៊ីដៃ បានបោកបក់ទៅកាន់ឆ្នេរសមុទ្រនៃប្រទេស ម៉ូសំប៊ិក ភាគកណ្តាលកាលពីថ្ងៃសុក្រសប្តាហ៍មុន ដោយមានល្បឿនយ៉ាងលឿននិងនាំឲ្យភ្លៀងធ្លាក់ខ្លាំង ដែលបានបណ្តាលឲ្យជន់លិចតំបន់នៅឆ្ងាយពីទីក្រុង និងបានជន់លិចប្រទេស ហ្ស៊ីមបាវ៉េ ភាគខាងកើតដែលរងការបំផ្លិចបំផ្លាញយ៉ាងធ្ងន់ធ្ងរនោះ។
កិច្ចខំប្រឹងប្រែងផ្តល់ជំនួយ និងជួយសង្គ្រោះបានឈានដល់សប្តាហ៍ទី២ ហើយ នៅក្នុងផ្នែកជាច្រើននៅក្នុងប្រទេសដ៏ក្រីក្រមួយនេះ។
អង្គការសហប្រជាជាតិ ដែលបានព្រមានអំពីការរងប៉ះពាល់កាន់តែខ្លាំងឡើង បានបង្កើនការអំពាវនាវឲ្យជួយសង្គ្រោះប្រទេសម៉ូសំប៊ិក ខណៈក្រុមទីភ្នាក់ងារជំនួយមនុស្សធម៌ បានខិតខំជួយមនុស្សរាប់ម៉ឺននាក់ ដែលរងការវាយប្រហារពីព្យុះស៊ីក្លូនដ៏កំណាចបំផុតនៅអាហ្រ្វិកខាងត្បូង។
បុរសឈ្មោះ Manuel Machcawa (ស្ដាំ)អាយុ ៧៦ឆ្នាំ ទួញយំ ខណៈគាត់ជួបកូនគាត់ក្រោយពីជម្លៀសមកពីតំបន់Buzi។ AFP
១ សប្តាហ៍ក្រោយពីព្យុះនោះបានវាយប្រហារប្រទេស ម៉ូសំប៊ិក ដែលមានល្បឿនជិត ២០០ គីឡូម៉ែត្រក្នុង ១ ម៉ោង ក្រុមអ្នកនៅរស់កំពុងតស៊ូនៅក្នុងស្ថានភាពដ៏ធ្ងន់ធ្ងរ មនុស្សមួយចំនួនបានជាប់គាំងនៅលើដំបូលផ្ទះ ហើយក្រុមអ្នកទាំងនោះកំពុងត្រូវការស្បៀងអាហារ និងកំពុងប្រឈមមុខគ្រោះថ្នាក់នៃការផ្ទុះឡើងនៃជំងឺអាសន្នរោគ។
នាយិកាប្រតិបត្តិអង្គការ UNICEF លោកស្រី Henrietta Fore បានថ្លែងថា៖ «ស្ថានការណ៍នោះនឹងធ្វើឲ្យខូចខាតយ៉ាងធ្ងន់ធ្ងរ។
លោកស្រីបានបន្ថែមទៀតថា៖ «ទីភ្នាក់ងារជំនួយមនុស្សធម៌កំពុងចាប់ផ្តើមត្រួតពិនិត្យមើលទំហំនៃការខូចខាតបង្ក ឡើងដោយព្យុះនោះ»។ «ភូមិទាំងមូលត្រូវបានជន់លិច អគារជាច្រើនបានដួលរលំគ្មានសល់ សាលារៀន និងមន្ទីរពេទ្យត្រូវបានបំផ្លាញស្ទើរទាំងស្រុង»។
ព្យុះស៊ីក្លូននេះ បានបំផ្លិចបំផ្លាញតំបន់មួយដែលមាន ផ្ទៃដីប្រហែល ៣ ពាន់គីឡូម៉ែត្រក្រឡា។
កម្មវិធីស្បៀងអាហារពិភពលោក កាលពីយប់ថ្ងៃសុក្រ បានប្រកាសវិបត្តិទឹកជំនន់ជាកម្រិតគ្រាអាសន្នកម្រិត ៣ ដោយដាក់វិបត្តិនេះស្មើគ្នាជាមួយវិបត្តិនៅយេម៉ែន ស៊ីរី និងស៊ូដង់ខាងត្បូង៕ AFP/SK
