.jpg)
ប្រជាជនដើរតាមបណ្តោយផ្លូវពាណិជ្ជកម្មមួយនៅក្នុងក្រុងសៅប៉ូឡូក្រោយពីប្រេស៊ីលបើកឡើងវិញកាលពីថ្ងៃទី ១០ ខែមិថុនា។ AFP
ក្រុងសៅប៉ូឡូ៖ ល្បឿននៃវីរុសរាតត្បាតកូរ៉ូណា នៅថេរកាលពីថ្ងៃពុធ នៅទូទាំងអាមេរិកឡាទីន ជាទីដែលចំនួនអ្នកស្លាប់បានកើនឡើងជាង ៧ ម៊ឺននាក់ ខណៈដែលអឺរ៉ុបគ្រោងបើកព្រំដែនខាងក្រៅរបស់ខ្លួនឲ្យបរទេសចេញ-ចូលនៅក្នុងខែកក្កដា ខាងមុខនេះ។
យោងតាមតួលេខសរុបរបស់ AFP ដែលត្រូវបានចេញផ្សាយដោយក្រសួងសុខាភិបាលជាតិបានឲ្យដឹងថា អាមេរិកខាងជើង និងខាងត្បូង នៅតែជាចំណុចកណ្តាលនៃវិបត្តិសុខភាពសកលដែលមានជិតពាក់កណ្តាលនៃចំនួនមនុស្សស្លាប់ទាំង ៤១២ ៩២៦ នាក់ និងអ្នកឆ្លងវីរុសនេះចំនួន ៧,៣ លាននាក់នៅទូទាំងពិភពលោក។
ប្រទេសប្រេស៊ីល មានអ្នកស្លាប់ដោយសារវីរុសកូរ៉ូណាជិត ៤ ម៊ឺននាក់ ឬជាងពាក់កណ្តាលនៃចំនួនអ្នកស្លាប់សរុបនៅអាមេរិកឡាទីន ដោយបានកត់ត្រាចំនួនអ្នកស្លាប់ ១ ២៧៤ នាក់ ក្នុងរយៈពេល ២៤ ម៉ោងចុងក្រោយ។
ទោះបីជាវីរុសនេះ បន្តឆ្លងរាលដាលនៅទូទាំងប្រទេសនេះក្តី ក៏ក្រុងសេដ្ឋកិច្ចសៅប៉ូឡូបានចាប់ផ្តើមបើកហាងលក់ទំនិញឡើងវិញ កាលពីថ្ងៃពុធ ជាផ្នែកនៃការបន្តសកម្មភាពជាបណ្តើរៗឡើងវិញ។
ផ្សារលក់ទំនិញធំៗ ត្រូវបានបើកឡើងវិញនៅក្នុងក្រុងធំៗ កាលពីថ្ងៃព្រហស្បតិ៍ ១ ថ្ងៃមុនប្រជាជនប្រេស៊ីលរៀបចំប្រារព្ធពិធីបុណ្យនៃក្តីស្រឡាញ់។
ប្រទេសម៊ិកស៊ិក ដែលមានអ្នកស្លាប់ដោយសារជំងឺកូវីដ ១៥ ០០០ នាក់ និងប៉េរូមានអ្នកស្លាប់ជិត ៦ ពាន់នាក់ និងអ្នកឆ្លងចំនួន ២០៨ ០០០ នាក់ ក៏កំពុងខិតខំប្រឹងប្រែងប្រយុទ្ធប្រឆាំងនឹងជំងឺនេះដែរ។
ដោយមានចំនួនអ្នកស្លាប់ ៤៨៧ នាក់ ក្រុមសមាជិកសភានៅប្រទេសបូលីវី កាលពីថ្ងៃពុធ បានអនុម័តកាលបរិចេ្ឆទថ្ងៃទី ៦ ខែកញ្ញា សម្រាប់ការបោះឆ្នោតទូទៅរបស់ប្រទេសនេះដែលត្រូវពន្យារពេលដោយសារជំងឺកូវីដ ១៩ នេះ។
នៅកន្លែងផ្សេងទៀត ក្រុងម៉ៃអាមីដែលពឹងផ្អែកលើវិស័យទេសចរណ៍បានបើកឆ្នេរសមុទ្ររបស់ខ្លួនជាលើកដំបូង ក្នុងរយៈពេល ៣ ខែ ស្របពេលមានភ័ស្តុតាងដែលថា ទោះបីជាមានករណីឆ្លងជិត ២ លាននាក់ និងស្លាប់ ១១២ ០០០ នាក់ ដោយសារជំងឺកូវីដ ១៩ នៅអាមេរិក និងស្ថានភាពដ៏អាក្រក់អាចធ្វើឲ្យសេដ្ឋកិច្ចកាន់តែធ្លាក់ដុនដាប។
ភ្នាក់ងារទេសចរលោក Julie Isaacson មានវ័យ ៦៣ ឆ្នាំ បាននិយាយថា៖ «ខ្ញុំទើបតែចាប់ផ្តើមស្រែកភ្លាមៗ នៅពេលខ្ញុំចេញទៅដល់ឆ្នេរសមុទ្រ»។
ក្រុមប្រឹក្សាប្រាក់បម្រុងទុកសហព័ន្ធរបស់អាមេរិកបានរៀបចំគម្រោងស្តារសេដ្ឋកិច្ច US នៅឆ្នាំក្រោយ។
ទោះបីជាយ៉ាងណាក៏ដោយ ក៏លោកប្រធានសហព័ន្ធ Jerome Powell បានបញ្ជាក់ថា ទស្សនវិស័យនេះ នៅតែមិនទាន់ប្រាកដប្រជាហើយធនាគារកណ្តាល និងសភា ត្រូវធ្វើការជាច្រើនថែមទៀត ដើម្បីជួយទ្រទ្រង់ដល់ការស្តារសេដ្ឋកិច្ចប៉ះពាល់ដោយជំងឺកូវីដ ១៩។
ចំពោះការឆ្លងកាត់មហាសមុទ្រអាត្លង់ទិក សហភាពអឺរ៉ុបបានថ្លែងថា ខ្លួននឹងបើកព្រំដែនខាងក្រៅឲ្យបរទេសចេញចូលនៅក្នុងខែកក្កដា ខាងមុខនេះ ខណៈដែលក្រុមមេដឹកនាំបន្ធូរបន្ថយការបិទ ដោយសារវីរុសនេះ ដើម្បីស្តារសេដ្ឋកិច្ចដែលធ្លាក់ចុះនេះឡើងវិញ។
អ្នកការទូតជាន់ខ្ពស់សហភាពអឺរ៉ុប លោក ចូសេប បូរែលល៍ បានថ្លែងកាលពីថ្ងៃពុធថា ប្រទេសសមាជិក EU បានសម្រេចបើកព្រំដែនចាប់ពីថ្ងៃទី ១ កក្កដា តទៅ៕ AFP/PSA
