.jpg)
លោកដូណាល់ ត្រាំ ថ្លែងនៅក្នុងអំឡុងសន្និសីទកាសែតអំពីវីរុសកូរ៉ូណា។ AFP
ក្រុងវ៉ាស៊ីនតោន៖ យោងតាមទិន្នន័យដែលបានបោះពុម្ពផ្សាយដោយសាកលវិទ្យាល័យ Johns Hopkins បានឲ្យដឹងថា អាមេរិកបានកត់ត្រាថា ចំនួនស្លាប់ថ្មីដោយសារឆ្លងវីរុសកូរ៉ូណាប្រភេទថ្មី គឺ ៥១៨ នាក់ នៅក្នុងរយៈពេល ២៤ ម៉ោង។
ចំនួនអ្នកស្លាប់នេះ ខ្ពស់ជាងការកើនឡើងកាលពីប៉ុន្មានថ្ងៃកន្លងមក ដែលមាន ៤៥៣ នាក់ ដោយបាននាំឲ្យចំនួនអ្នកស្លាប់សរុបនៅក្នុងប្រទេសនេះ ចាប់តាំងពីមេរោគផ្លូវដង្ហើមកូរ៉ូណាបានចាប់ផ្តើមឆ្លងរីករាលដាលរហូតដល់ ២ ៤០៩ នាក់។
ទិន្នន័យនោះ បានបង្ហាញថា ចំនួនករណីឆ្លងបានកើនឡើងរហូតដល់ ២១ ៣៣៣ នាក់ ក្នុងរយៈពេល ១ ថ្ងៃ នៅអាមេរិក។
ចំនួននោះ គឺប្រហែលគ្នាទៅនឹងការកើនឡើងកាលពីថ្ងៃសៅរ៍មានចំនួន ២១ ៣០៩ នាក់ ប៉ុន្តែចំនួនអ្នកឆ្លងត្រូវបានគេរាប់បញ្ចូលនៅក្នុងពេលវេលាពិតប្រាកដ របស់សាកលវិទ្យាល័យ Johns Hopkins ហើយត្រូវធ្វើឡើងដោយប្រុងប្រយ័ត្ន។
ដោយមានករណីឆ្លងសរុបចំនួន ១៣៦ ៨៨០ នាក់ អាមេរិកមានចំនួនអ្នកឆ្លងខ្ពស់ជាងគេបំផុតនៅក្នុងពិភពលោក បាននាំមុខអ៊ីតាលី ចិន និងប្រទេស អេស្ប៉ាញ។
យោងតាមសេចក្តីថ្លែងការណ៍មួយចេញផ្សាយកាលពីថ្ងៃអាទិត្យ ដោយលោកអភិបាលរដ្ឋ អេនដ្រូ កូម៉ូ បានឲ្យដឹងថា រដ្ឋញូវយ៉កដែលបានក្លាយជារដ្ឋមានឆ្លងជំងឺកូវីដ ១៩ នៅអាមេរិក គឺជាតំបន់បានរងការវាយប្រហារយ៉ាងធ្ងន់ធ្ងរបំផុត ដោយមានករណីឆ្លងជិត ៦ ម៊ឺននាក់ និង ៩៦៥ នាក់ផ្សេងទៀតបានស្លាប់។
អ្នកវិទ្យាសាស្ត្រអាមេរិកលោក អានថូនី ហ្វូស៊ី ជាអ្នកជំនាញជំងឺឆ្លង និងជាទីប្រឹក្សារបស់លោកប្រធានាធិបតី ដូណាល់ ត្រាំ ក្នុងអំឡុងវិបត្តិនេះ បានព្យាករកាលពីថ្ងៃអាទិត្យថា វីរុសកូរ៉ូណានេះអាចបង្កឲ្យមនុស្សស្លាប់ពី ១០ ម៊ឺន ទៅ ២០ ម៊ឺននាក់ នៅអាមេរិក។
លោក ត្រាំ បានថ្លែងក្រោយលោក អានថូនី ហ្វូស៊ី ដែលបានដឹកនាំការស្រាវជ្រាវជំងឺឆ្លងនៅវិទ្យាស្ថានសុខភាពជាតិថា លោកជឿថា ប្រជាជន US ចន្លោះពី ១០ ម៊ឺន ទៅ ២០ ម៊ឺននាក់ អាចស្លាប់ដោយសារវីរុសកូរ៉ូណា និងរាប់លាននាក់អាចឆ្លងមេរោគនេះ៕ AFP/SK
