ក្រុងកាណូ៖ ប្រភពសន្តិសុខ និងក្រុមពលរដ្ឋបានថ្លែងកាលពីថ្ងៃពុធថា ចំនួនអ្នកស្លាប់ពីការវាយប្រហារមួយរបស់ក្រុមជីហាដនិយមដែលមានទំនាក់ទំនងជាមួយក្រុមរដ្ឋអ៊ិស្លាម ទៅលើភូមិមួយនៅនីហ្សេរីយ៉ាភាគឦសាន បានកើនឡើងរហូតដល់ ៦៩ នាក់។
ក្រុមយុទ្ធជនដែលត្រូវបានគេជឿថា មកពីក្រុមប្រឆាំងរដ្ឋអ៊ិស្លាមនៅខេត្តភាគខាងលិចប្រទេសអាហ្វ្រិក (ISW-AP) បានបាញ់រះទៅលើក្រុមពលរដ្ឋជាមួយរថយន្តជាច្រើនគ្រឿង នៅក្នុងការវាយប្រហារទៅលើភូមិជនបទហ្វីឡូ កាលពីថ្ងៃអង្គារ។
ប្រភពដដែលនោះ បានប្រាប់កាសែត AFP ថា ចំនួនអ្នកស្លាប់បានកើនឡើងចាប់ពី ៥៩ នាក់ ក្រោយមកមានសាកសព ១០ នាក់បន្ថែមទៀត ត្រូវបានគេរកឃើញនៅក្នុងតំបន់ជនបទនៅជុំវិញសហគមន៍ចិញ្ចឹមសត្វ។
មន្ត្រីយោធាជាន់ខ្ពស់ម្នាក់បានថ្លែងថា៖ «ជាការពិតណាស់ ពួកគេបានសម្លាប់មនុស្ស ៦៩ នាក់ ដោយសាកសពជាច្រើនបន្ថែមទៀត ត្រូវបានគេរកឃើញដេករាយប៉ាយនៅទីវាលចិញ្ចឹមសត្វនោះ»។
លោក អ៊ីប្រាហ៊ីម លីម៉ែន ជាសមាជិកម្នាក់របស់ក្រុមជីវពលប្រឆាំងជីហាដ ដែលគាំទ្រដោយរដ្ឋាភិបាលបានផ្តល់តួលេខសរុបស្រដៀងគ្នា។
លោកបានថ្លែងថា៖ «សាកសពទាំងនោះ បានដេករាយប៉ាយនៅពាសពេញតំបន់ធំល្វឹងល្វើយ ១ កន្លែង ខណៈក្រុមបះបោរបានដេញចាប់ជនរងគ្រោះ ដោយបានបាញ់សម្លាប់ពួកគេ និងកម្ទេចពួកគេជាមួយរថយន្តបំពាក់ដោយកាំភ្លើងយន្តជាច្រើនគ្រឿង»។
មេដឹកនាំសហគមន៍ ដែលបានស្នើសុំមិនបញ្ចេញឈ្មោះបានថ្លែងថា ក្រុមវាយប្រហារទាំងនោះ បានបាញ់រះទៅលើ «បុរស និងក្មេង» ចំនួន ៦៩ នាក់ ខណៈពួកគេបានឃ្វាលគោក្របី នៅទឹកត្រពាំងមួយខាងក្រៅភូមិនោះ។
មេដឹកនាំនោះបានថ្លែងថា៖ «ពលរដ្ឋរបស់យើងបានភ័យខ្លាចយ៉ាងខ្លាំង៕ AFP/SK