រដ្ឋាភិបាលបារាំងបានបង្ហាញ សេចក្តីព្រាងច្បាប់ថ្មីមួយកាលពីថ្ងៃពុធ ក្នុងគោលបំណងធ្វើយ៉ាងណារៀបចំយោធាបារាំងឱ្យប្រសើរជាងមុន ក្នុងការទប់ទល់នឹងក្រុមអ៊ិស្លាមនិយម ក្រោមគំនិតផ្ដួចផ្ដើមរបស់ប្រធានាធិបតីបារាំងលោក Emmanuel Macron ប៉ុន្ដែត្រូវបានគេរិះគន់ថា បង្កឱ្យមានការរើសអើងសាសនា និងការបែងចែកប្រទេសជា ២ ផ្នែក។
សេចក្ដីព្រាងច្បាប់នេះត្រូវបានលើកឡើងយកមកពិភាក្សាក្រោយពេលដែលបារាំងទទួលរងការវាយប្រហារភេរវកម្មពីក្រុមអ៊ិស្លាមនិយមជាច្រើនដង រួមមានការកាត់ក្បាលគ្រូបង្រៀនម្នាក់ដែលបានបង្ហាញរូបតុក្កតាប្រមាថដល់ព្យាការីអ៊ិស្លាមក្នុងថ្នាក់កាលពីខែតុលា និងការវាយប្រហារនៅក្នុងព្រះវិហារធំជាងគេបណ្ដាលឱ្យស្លាប់មនុស្ស ៣ នាក់ផងដែរ។
ច្បាប់នេះត្រូវបានគេដាក់ឈ្មោះជាផ្លូវការថា «ការពង្រឹងគោលការណ៍របស់សាធារណរដ្ឋ» រួមបញ្ចូលការដាក់គោលការណ៍តម្រូវឱ្យសិស្សសាលាជនជាតិមូស្លីមរៀននៅសាលាសាសនា ដែលលោក Macron និយាយថា នៅទីនោះ «ការអប់រំរួមបញ្ចូលទាំងការគោរពបូជាព្រះ និងមុខវិជ្ជាផ្សេងៗទៀត» សម្រាប់សិស្សមូស្លីម។
លោក Macron បានបន្តថា៖ «សាលារៀន គឺជាកន្លែងដែលត្រូវតែពង្រឹងគោលការណ៍របស់ប្រទេសសាធារណរដ្ឋជាអាទិភាពបំផុត មិនមែនជាកន្លែងសម្រាប់គោរពសាសនាទេ ជាកន្លែងអប់រំពលរដ្ឋមិនមែនជាកន្លែងសម្រាប់អ្នកគោរពបូជាព្រះទេ»។
មាត្រាមួយទៀតនៃច្បាប់ដដែលនេះ បានលើកទឹកចិត្តឱ្យវិហារអ៊ិស្លាមចុះឈ្មោះជាកន្លែងគោរពបូជា ដើម្បីកំណត់អត្តសញ្ញាណបានកាន់តែច្បាស់ថា ជាវិហារសាសនាអ៊ិស្លាម។ វិហារអ៊ិស្លាមជាង ២ ៦០០ នៅក្នុងប្រទេសដែលភាគច្រើនមានសាលាគម្ពីរគរុពេលបច្ចុប្បន្នបានដំណើរការស្ថិតក្រោមការគ្រប់គ្រងរបស់សមាគមប៉ុណ្ណោះ។
នាយករដ្ឋមន្រ្តី Jean Castex បានសង្កត់ធ្ងន់កាលពីថ្ងៃពុធ ថា៖ «ច្បាប់នេះមិនមែនជាច្បាប់ប្រឆាំងនឹងសេរីភាពសាសនា ជាពិសេសសាសនាមូស្លីមទេ តែវាជាច្បាប់នៃ «ការរំដោះខ្លួននៅចំពោះមុខលទ្ធិអ៊ិស្លាមជ្រុលនិយម»។ លោក Castex ពិពណ៌នាច្បាប់នេះ ថា «ជាច្បាប់សេរីភាព ការពារ និងរំដោះខ្លួននៅចំពោះមុខលទ្ធិសាសនាជាមូលដ្ឋាន»។
បច្ចុប្បន្នចំនួនប្រជាជនមូស្លីមនៅប្រទេសបារាំង មានចំនួនប្រមាណ ៥ លាននាក់ ដែលអាចនឹងត្រូវប្រឈមមុខ និងទទួលរងសម្ពាធពីច្បាប់នេះ។ យ៉ាងណាមិញ ច្បាប់នេះ ក៏ត្រូវបានអ្នកមួយចំនួនរិះគន់ថា ជាការប្រកាន់ពូជសាសន៍ និងសាសនា។
រដ្ឋមន្រ្តីក្រសួងមហាផ្ទៃលោក Gerald Darmanin ដែលទទួលខុសត្រូវខាងជំនឿផងដែរ បាននិយាយថា លោក Macron បានស្នើសុំឱ្យគាត់រៀបចំបេសកកម្មសភាមួយចំនួន ដើម្បីប្រយុទ្ធប្រឆាំងនឹងសាសនាផ្សេងៗ រួមមានគ្រិស្តសាសនាសាសនាជ្វីហ្វ និងក្រុមមូស្លីមផងដែរ។
លោកបាននិយាយថា៖ «ការរើសអើងសាសនាកំពុងតែបន្តកើនឡើង។ វាបង្កផលប៉ះពាល់ដល់មនុស្សគ្រប់គ្នា។ វាធ្វើឱ្យពួកគេឈឺចាប់ណាស់»។
លោក Irfan Thakar ជាជនជាតិបារាំងកាន់សាសនាអ៊ិស្លាម ប៉ុន្តែត្រូវបានគេយល់ច្រឡំថា ជាជនជាតិមូស្លីមរស់នៅបារាំងបាននិយាយថា៖ «ខ្ញុំជាជនជាតិបារាំង ប៉ុន្តែខ្ញុំត្រូវពន្យល់ជនមិនមែនមូស្លីមម្តងហើយម្តងទៀត។ មនុស្សជាច្រើនគិតថា សាសនាអ៊ិស្លាមមិនត្រូវគ្នាជាមួយបារាំងទេ ប៉ុន្តែវាមិនមែនជាការពិតទេ»។
លោកបានបន្តថា៖ «យើងត្រូវបានគេចាត់ទុកថា ជាជនជាតិផ្សេង រស់នៅប្រទេសផ្សេងអ៊ីចឹង។ នេះក៏ដោយសារតែប្រព័ន្ធផ្សព្វផ្សាយតែងនិយាយថា សាសនាអ៊ិស្លាម បង្រៀនឱ្យមានការធ្វើភេរវកម្មនៅពេលណាដែលមានព័ត៌មានអំពីអំពើភេរវកម្មផ្សេងៗ»។
លោក Asif Arif ជាមេធាវី និងជាសមាជិកជនជាតិមូស្លីមនៅបារាំងបាននិយាយថា៖ «ច្បាប់ថ្មីនេះ នឹងធ្វើឱ្យមានការស្អប់ខ្ពើមដល់ប្រជាជនមូស្លីមនៅក្នុងប្រទេសបារាំង ថែមទៀត។ រដ្ឋាភិបាលបង្កើតឱ្យមានការបែងចែកសាសនា។ រដ្ឋាភិបាលក៏បានលុបបំបាត់ក្រុមសមូហភាពប្រឆាំងនឹងការរើសអើងសាសនាអ៊ិស្លាម ទៀតផង»។
លោក Arif បានបន្ថែមថា៖ «យើងមានច្បាប់គ្រប់គ្រាន់ ដើម្បីប្រយុទ្ធប្រឆាំងនឹងអំពើភេរវកម្ម និងជាច្បាប់ប្រឆាំងនឹងភេរវកម្មដ៏តឹងរ៉ឹងបំផុតមួយរបស់ពិភពលោក។ ជំនួសឱ្យការបង្កើតច្បាប់ថ្មីរឹតបន្តឹងសេរីភាពរបស់យើង រដ្ឋាភិបាលគួរតែអនុវត្តច្បាប់ដែលមានស្រាប់ទៅបានហើយ»។
ជាមួយនឹងការលើកឡើងពីសេចក្តីព្រាងច្បាប់ថ្មីនេះ អ្នកខ្លះបាននិយាយថា អាចនឹងធ្វើឱ្យការធ្វើនយោបាយ និងភាពដែលអាចឈ្នះឆ្នោតរបស់ លោក Macron កាន់តែចុះខ្សោយបន្ថែម ទៀតសម្រាប់ការបោះឆ្នោតប្រធានាធិបតីឆ្នាំ ២០២២៕