.jpg)
ក្រុងណៃរ៉ូប៊ីៈ អ្នកនាំពាក្យអង្គការជនចំណាកស្រុកអន្តរជាតិបានថ្លែងប្រាប់កាសែត AFP កាលពីថ្ងៃអាទិត្យថា ជនចំណាកស្រុក ៨ នាក់បានស្លាប់ និង ១២ នាក់ផ្សេងទៀតកំពុងបាត់ខ្លួន ក្រោយពីក្រុមជួញដូរមនុស្សបានបង្ខំពួកគេឲ្យចាកចេញពីទូកមួយគ្រឿងនៅជិតប្រទេសជីប៊ូទី។
ក្រុមជនចំណាកស្រុកទាំងនោះ ពួកគេទាំងអស់ត្រូវបានគេជឿថា គឺជាជនជាតិអេត្យូពីបានវិលត្រឡប់ទៅអាហ្វ្រិក ក្រោយពីខកខានមិនបានទៅប្រទេសអារ៉ាប៊ី សាអ៊ូឌីត តាមប្រទេសយេម៉ែន បានបិទព្រំដែនដោយសារជំងឺកូវីដ ១៩។
អ្នកនាំពាក្យអង្គការ IOM គឺលោកស្រី វុននី ឌីជី បានថ្លែងថា៖ «ជនចំណាកស្រុកយ៉ាងតិច ៨ នាក់បានស្លាប់ និង ១២ នាក់ផ្សេងទៀត កំពុងបាត់ខ្លួននៅសមុទ្រ ក្រោយពីពួកគេត្រូវបានគេបង្ខំ ឲ្យចាកចេញពីទូកមួយ ដោយក្រុមអ្នកជួញដូរមនុស្ស នៅម្តុំឆ្នេរសមុទ្រប្រទេសជីប៊ូទី»។
យោងតាមសាក្សីនៅរស់មួយចំនួន ដែលបានជួយសង្គ្រោះដោយអង្គការ IOM បានឲ្យដឹងថា អ្នកជួញដូរមនុស្ស ៣ នាក់ បានបង្ខំដោយហិង្សាទៅលើ ក្រុមបុរសនិងស្ត្រីវ័យក្មេង ឲ្យចាកចេញពីនាវានោះ ខណៈនៅក្នុងសមុទ្រនៅឡើយ៕ SK
