កាលពីថ្ងៃព្រហស្បតិ៍ ទី ២១ មករា នេះ ប្រជាពលរដ្ឋ ១ រូបនៅរដ្ឋ California សហរដ្ឋអាមេរិកបានស្លាប់ប៉ុន្មានម៉ោងបន្ទាប់ពីទទួលវ៉ាក់សាំងកូវីដ ១៩ នេះបើតាមការិយាល័យប៉ូលិសតំបន់ Placer County ដែលបានប្រកាសពីការស្លាប់ និងការស៊ើបអង្កេតកាលពីថ្ងៃសៅរ៍ ទី ២៣ នៅក្នុងទំព័រ Facebook មួយដែលមិនផ្ដល់ព័ត៌មានលម្អិតច្រើន។ នេះបើតាមការផ្សាយរបស់សារព័ត៌មាន NY Post។
ប៉ូលិសបាននិយាយថា៖ «មានភ្នាក់ងារមូលដ្ឋានរដ្ឋ និងសហព័ន្ធជាច្រើនកំពុងស៊ើបអង្កេតករណីនេះយ៉ាងសកម្ម។ របាយការណ៍ណាមួយជុំវិញមូលហេតុនៃការស្លាប់ គឺមិនទាន់គ្រប់គ្រាន់នៅឡើយដោយរង់ចាំលទ្ធផលនៃការស៊ើបអង្កេត»។
កាលពីខែធ្នូ ឆ្នាំ ២០២០ បុគ្គលម្នាក់នេះបានតេស្តវិជ្ជមានជំងឺកូវីដ ១៩។
ការិយាល័យប៉ូលិសមិនបានបញ្ជាក់ថា តើបុគ្គលម្នាក់នោះបានទទួលវ៉ាក់សាំង Moderna ឬ Pfizer/BioNTechទេ។ វ៉ាក់សាំងទាំង ២ នេះធ្លាប់បង្កឱ្យមានប្រតិកម្មអាល្លែកហ្ស៊ីក្នុងមនុស្សមួយចំនួន ប៉ុន្តែករណីអាល្លែកហ្ស៊ីធ្ងន់ធ្ងរ គឺកម្រណាស់៕