ក្រុងដាក្កា៖ មន្ត្រីម្នាក់បានថ្លែងកាលពីថ្ងៃអង្គារថា បុរសមានវ័យ ៧១ ឆ្នាំម្នាក់បានក្លាយជាជនរ៉ូហ៊ីងយ៉ាដំបូង ដែលបានរស់នៅក្នុងជំរំជនភៀសខ្លួនយ៉ាងធំល្វឹងល្វើយនៅក្នុងប្រទេសបង់ក្លាដែស បានស្លាប់ដោយសារការឆ្លងវីរុសផ្លូវដង្ហើមកូរ៉ូណាប្រភេទថ្មីដ៏ចម្លែកនេះ។
ក្រុមអ្នកជំនាញសុខាភិបាលបានព្រមានតាំងពីយូរហើយថា ការស្លាប់ដោយសារវីរុសផ្លូវដង្ហើមកូរ៉ូណាមួយនេះ អាចឆ្លងរាលដាលនៅពាសពេញជំរំធំល្វឹងល្វើយបានសាងសង់ខ្ទមដោយឫស្សីរខេករខាក មានជនភៀសខ្លួនរស់នៅជិត ១ លាននាក់ ដែលបានរត់ភៀសខ្លួនចេញពីប្រទេសក្បែរខាងមីយ៉ាន់ម៉ា ចាប់តាំងពីមានការបង្ក្រាបដោយយោធាកាលពីឆ្នាំ ២០១៧ កន្លងទៅ។
លោក តូហា ប៊ូយ៉ាន់ ជាមន្ត្រីសុខាភិបាលជាន់ខ្ពស់ម្នាក់នៅក្នុងស្រុកបាហ្សារ បានថ្លែងថា បុរសម្នាក់នោះបានស្លាប់កាលពីថ្ងៃអាទិត្យ និងការអះអាងបន្ថែមអំពីការឆ្លងវីរុសកូរ៉ូណានោះថាជាមូលហេតុនោះ បានកើតឡើងកាលពីយប់ថ្ងៃចន្ទ។
លោក ម៉ូហាមម៉េដ ស្សាហ្វី ជាគ្រូបង្រៀននៅសាលារ៉ូហ៊ីងយ៉ាម្នាក់ និងជាអ្នកក្បែរខាងនៅក្នុងជំរំទាំងនោះបាននិយាយថា បុរសម្នាក់នោះ បានឈឺយូរហើយ ដោយសារសម្ពាធឈាមខ្ពស់ និងមានជំងឺខ្សោយក្រលៀនប្រចាំកាយ។
លោក ស្សាហ្វី បានប្រាប់ AFP ថា៖ «គ្មាននរណាម្នាក់ដឹងថា គាត់ឈឺដោយសារជំងឺកូវីដ ១៩ ទេ»៕ AFP/SK