ក្រុងហ្សឺណែវ៖ ខណៈចំនួនមនុស្សដែលត្រូវបានបង្ខំឲ្យរត់ភៀសខ្លួនចេញពីផ្ទះសំបែងរបស់ពួកគេនោះ បន្តកើនឡើងនៅទូទាំងពិភពលោក ជំនួបជាសកលមួយនៅក្នុងក្រុងហ្សឺណែវនៅសប្តាហ៍នេះ នឹងមានបំណងបង្កើនការគាំទ្រថ្មី និងពិសេសដល់ក្រុមជនភៀសខ្លួន។
វេទិកាជនភៀសខ្លួនជាសកល នឹងបើកជាផ្លូវការនៅថ្ងៃអង្គារយ៉ាងជាក់លាក់រយៈពេល ១ ឆ្នាំក្រោយពីមហាសន្និបាតអង្គការសហប្រជាជាតិ បានអនុម័តក្របខ័ណ្ឌការងារមួយ ដែលមានបំណងបង្កើតវិធីសាស្ត្រច្បាស់លាស់ និងស្មើភាពដើម្បីផ្តល់ជំនួយដល់ក្រុមជនភៀសខ្លួន និងសហគមន៍ ដែលទទួលយកជនភៀសខ្លួន។
ជំនួបនេះនឹងក្លាយជាលើកដំបូងដោយប្រមូលប្រមុខរដ្ឋក្រុមរដ្ឋមន្ត្រី ប៉ុន្តែមេដឹកនាំជំនួញក្រុមអ្នកផ្តល់ជំនួយមនុស្សធម៌ និងជនភៀសខ្លួនផ្ទាល់ ក៏ត្រូវផ្តល់យោបល់ និងការសន្យាដើម្បីធ្វើឲ្យជំនួយកាន់តែមានប្រសិទ្ធភាព។
នៅក្នុងបទសម្ភាសមួយ ឧត្តមស្នងការរងទទួលបន្ទុកជនភៀសខ្លួនអង្គការសហប្រជាជាតិលោកស្រី Kelly Clements បានថ្លែងថា យើងនៅចុងទសវត្សរ៍មួយដែលជាប់ទាក់ទិននៅក្នុងបញ្ហាជនភៀសខ្លួនជាច្រើនកម្រិត»។
លោកស្រីបានថ្លែងថា៖ «យើងឃើញតម្រូវការសម្រាប់ប្រទេសជាច្រើន អង្គការជាច្រើន និងផ្នែកឯកជន (ដើម្បីជួយស្វែងរក) របៀបដែលសហគមន៍អន្តរជាតិអាចធ្វើឲ្យប្រសើរឡើង ដើម្បីឆ្លើយតប»។
កាលពីចុងឆ្នាំ ២០១៨ មនុស្សជិត ៧១ លាននាក់ បានរស់នៅក្នុងជំរំជនភៀសខ្លួនដោយបង្ខំដោយសារសង្គ្រាម អំពើហិង្សា និងការធ្វើទុក្ខបុកម្នេញនៅក្នុងនោះជិត ២៦ លាននាក់ ដែលបានរត់ភៀសខ្លួនឆ្លងព្រំដែនក្នុងនាមជាជនភៀសខ្លួន។
ចំណែក UNHCR បានរំពឹងទុកថា ចំនួននោះអាចកើនឡើងថែមទៀត នៅពេលដែលស្ថិតិឆ្នាំ ២០១៩ ត្រូវបានគេធ្វើការគណនានោះ។
លោកស្រី Clements បានថ្លែងថា៖ «ជាអកុសល ខ្សែបន្ទាត់ទិសដៅនោះ មិនមានភាពវិជ្ជមានទេ ដោយបាននិយាយសំដៅទៅរកភាពខ្វះដំណោះស្រាយនយោបាយដែលយើងឃើញនៅក្នុងចំណោមប្រទេសជាសមាជិក ផលវិបាក និងភាពស្មុគស្មាញនៃជម្លោះនាពេលបច្ចុប្បន្ន និងឧបសគ្គនៅក្នុងការពិភាក្សាពីបញ្ហានយោបាយ។
លោកស្រីបានទទួលស្គាល់ថា៖ «ទស្សនវិស័យនេះ មិនច្បាស់លាស់ទេដោយបានថ្លែងថានេះមានន័យថាការគាំទ្រយ៉ាងទូលំទូលាយ និងច្បាស់លាស់ពីសហគមន៍អន្តរជាតិចំពោះជនភៀសខ្លួន និងសហគមន៍នានាដែលទទួលយកពួកគេពិតជាសំខាន់ណាស់»៕ AFP/PSA