ដីកាចាប់ខ្លួនរបស់ប្រទេសអាល្លឺម៉ង់ លើមេធាវី ២ រូប ដែលជាសហស្ថាបនិកក្រុមហ៊ុនច្បាប់មានមូលដ្ឋាននៅប្រទេសប៉ាណាម៉ាពីបទក្លែងបន្លំពន្ធអន្តរជាតិ កំពុងតែមានការរាំងស្ទះ ដោយសារតែរដ្ឋាភិបាលប៉ាណាម៉ា បានហាមឃាត់ការធ្វើបត្យាប័នលើពលរដ្ឋខ្លួន។
មេធាវីទាំង ២ រូបនេះ មានឈ្មោះថា Juergen Mossack និង Ramon Fonseca។ ពួកគេត្រូវបានព្រះរាជអាជ្ញានៃទីក្រុង Cologne ចោទប្រកាន់ពីបទគេចពន្ធ និងការបង្កើតអង្គការឧក្រិដ្ឋកម្ម ដែលជាសហគ្រាសមួយរកប្រាក់ចំណេញចេញពីសកម្មភាពខុសច្បាប់ផ្សេងៗ។ ការចោទប្រកាន់នេះ បានចាប់ផ្តើមតាំងពីពួកគេ ជួយបង្កើតប្រព័ន្ធហិរញ្ញវត្ថុគេចពន្ធឱ្យក្រុមហ៊ុនសំណង់ប្រេស៊ីល Odebrecht ក៏ដូចជាមានពាក់ព័ន្ធនឹងរឿងអាស្រូវឯកសារប៉ាណាម៉ា «Panama Papers»។
កើតនៅប្រទេសអាល្លឺម៉ង់ ប៉ុន្តែបានចេញទៅរស់នៅប្រទេសប៉ាណាម៉ា តាំងពីវ័យក្មេង រហូតទទួលបានសញ្ជាតិប៉ាណាម៉ា លោក Mossack និងលោក Fonseca បានទទួលការកាត់ទោសឱ្យជាប់ឃុំ ក្នុងមន្ទីរឃុំឃាំងនៃប្រទេសប៉ាណាម៉ា អស់រយៈពេល ២ ខែរួចមកហើយ។ ពួកគេទាំង ២ នាក់ ក៏មិនត្រូវបានផ្តល់សិទ្ធិឱ្យចេញក្រៅប្រទេសផងដែរ។ លោក Alvin Weeden មេធាវីរបស់ប្រទេសប៉ាណាម៉ា បានឱ្យដឹងថា ជនជាប់ចោទទាំង ២ មានការការពារពីរដ្ឋធម្មនុញ្ញ ដូច្នេះការចេញដីកាចាប់ខ្លួនពីប្រទេសអាល្លឺម៉ង់ មកលើពួកគេ គឺមិនអាចធ្វើទៅបានទេ។
ឯកសារប៉ាណាម៉ាជាសំណុំឯកសារជាង ១១ លានឯកសារ របស់ការិយាល័យសាជីវកម្មពាណិជ្ជកម្មអន្តរជាតិរបស់ប្រទេសប៉ាណាម៉ា។
ឯកសារនេះ បានបែកធ្លាយកាលពីឆ្នាំ ២០១៦ ជាហេតុធ្វើឱ្យព័ត៌មានពីការគេចពន្ធ របស់កំពូលអ្នកមានៗក្នុងលោក រាប់តាំងពីមេដឹកនាំកំពូលៗ កីឡាករ និងសិល្បករល្បីៗ ត្រូវបានលាតត្រដាង។
លោក Mossack និង Fonseca បានឱ្យដឹងក្នុងសេចក្តីថ្លែងការណ៍មួយថា ក្រុមហ៊ុនរបស់ពួកគេពិតជាបានលក់ប្រព័ន្ធហិរញ្ញវត្ថុគេចពន្ធរបស់ខ្លួនទៅឱ្យធនាគារអាល្លឺម៉ង់ ហើយបន្តលក់ទៅឱ្យអតិថិជនមួយផ្សេងទៀត។ ប៉ុន្តែចំពោះប្រតិបត្តិការផ្សេងៗពួកគេមិនបានពាក់ព័ន្ធឡើយ។ ពួកគេក៏នៅតែបន្តសហការជាមួយការស៊ើបអង្កេតទៅលើប្រទេសណាមួយ នៅក្នុងពិភពលោកដែលមានជាប់ពាក់ព័ន្ធទៅនឹងការគេចពន្ធ។
មេធាវីរបស់អ្នកទាំង ២ គឺលោក Guillermina McDonald បានឱ្យដឹងថា៖ «បើសិនជាមានករណីគេចពន្ធ និងការប្រព្រឹត្តបទឧក្រិដ្ឋផ្សេងៗកើតឡើងនៅក្នុងប្រទេសពួកគេ ដោយបានប្រើប្រាស់ប្រព័ន្ធហិរញ្ញវត្ថុគេចពន្ធរបស់យើង (ប៉ាណាម៉ា) នោះវាមិនមែនស្ថិតនៅក្នុងការគ្រប់គ្រងរបស់ពួកយើងឡើយ»។
គួរបញ្ជាក់ថា លោក Mossack និង លោក Fonseca បានប្រកាសបិទការិយាល័យរបស់ពួកគេ នៅក្នុងប្រទេសប៉ាណាម៉ា និងកន្លែងផ្សេងទៀតនៅលើពិភពលោក តាំងពីខែមីនា ឆ្នាំ ២០១៨ មកម្ល៉េះ។ ដោយសារពួកគេទំាង ២ នាក់ សុទ្ធតែសញ្ជាតិប៉ាណាម៉ា ដូច្នេះប៉ាណាម៉ានឹងមិនធ្វើបត្យាប័នពលរដ្ឋរបស់ខ្លួនឡើយ។ យ៉ាងណាមិញករណីនេះ គេមិនទាន់ដឹងច្បាស់ទេថា តើអ្នកទាំង ២ នឹងត្រូវនាំខ្លួនទៅកាន់ប្រទេសអាល្លឺម៉ង់ ដើម្បីទទួលការកាត់ទោស ឬក៏យ៉ាងណា? ដោយឡែកការិយាល័យប៉ូលិសអន្តរជាតិប៉ាណាម៉ាវិញ ក៏មិនទាន់មានការឆ្លើយតបនៅឡើយទេ ថាតើខ្លួនបានទទួលការជូនដំណឹងពីអាជ្ញាធរអាល្លឺម៉ង់ហើយឬនៅ អំពីករណីចាប់ខ្លួន Mossack និង Fonseca?
ពាក់ពន្ធ័នឹងបញ្ហានេះមេធាវី Guillermo Cochez ដែលជាអតីតឯកអគ្គរដ្ឋទូតរបស់ប៉ាណាម៉ាប្រចាំអង្គការអាមេរិក និងជាអ្នករិះគន់ការបង្កើតសាជីវកម្ម យកទៅប្រតិបត្តិការនៅក្រៅប្រទេសបាននិយាយថា៖ «ខ្ញុំគិតថាមេធាវីជាច្រើននៅប៉ាណាម៉ាក៏ដូចជាលោក Mossack និង លោក Fonseca បានដើរលើផ្លូវមួយដ៏គ្រោះថ្នាក់ ហើយខ្ញុំក៏មិនជឿដែរថា ពួកគេលក់តែប្រព័ន្ធប្រតិបត្តិការ តែមិនមានពាក់ព័ន្ធនឹងបទឧក្រិដ្ឋផ្សេងៗ»៕
អ៊ឹង ម៉េងគង់