ក្រុងបាងកក៖ យោងតាមសមាជិកសំខាន់ម្នាក់របស់គណបក្សភឿថៃបានឲ្យដឹងថា ការដោះស្រាយវិបត្តិបំពុលខ្យល់អាកាសរបស់រដ្ឋាភិបាល និងការគំរាមកំហែងពីមេរោគផ្លូវដង្ហើមកូរ៉ូណា អាចនឹងត្រូវបានលើកឡើងដោយបក្សប្រឆាំងនៅក្នុងការជជែកដេញដោលអំពីភាពគ្មានទំនុកចិត្តដែលត្រូវបានគ្រោងធ្វើនោះ។
លោក ស៊ុទីន ក្លុងសាង ជាសមាជិកសំខាន់របស់បក្សប្រឆាំងនេះ បានថ្លែងថា គណបក្សនេះកំពុងប្រមូលព័ត៌មាននៅក្នុងការដោះស្រាយបញ្ហាសុខភាពទាំង ២ នេះ និងភាពជាអ្នកដឹកនាំរបស់នាយករដ្ឋមន្ត្រី។
យោងតាមលោក ស៊ុទីន បានឲ្យដឹងថា ចំនួនរដ្ឋមន្ត្រីនៃគណៈរដ្ឋមន្ត្រីដែលត្រូវបានសាកសួរនោះ មិនទាន់ត្រូវបានបញ្ជាក់នៅឡើយទេ។
លោកបាននិយាយថា៖ «៥ រូប គឺជាក់លាក់ និងអាចមានប្រហែល ៤ រូបថែមទៀត»។
ដោយត្រូវបានគេសួរអំពីលទ្ធផលនៃការស្ទង់មតិសាធារណៈដែលបង្ហាញថា ប្រជាជនចង់ជជែកដេញដោលរិះគន់គណៈរដ្ឋមន្ត្រីទាំងមូលនោះ លោក ស៊ុទីន បានថ្លែងថា ការយកនាយករដ្ឋមន្ត្រីជាគោលដៅនឹងពាក់ព័ន្ធគណៈរដ្ឋមន្ត្រីដែរ។ ដោយថ្លែងក្រោយពីជំនួបរួមរបស់ក្រុមបក្សប្រឆាំង បក្សភឿថៃ និងមេដឹកនាំប្រឆាំងលោក សោមពង់ អាមនវីវ៉ាត់ បានថ្លែងថាញត្តិទំនងជាត្រូវដាក់ជូនប្រធានសភានៅថ្ងៃពុធនេះ។
លោកបានបញ្ជាក់ថា ការជជែកដេញដោលនៅពេលខាងមុខនេះ មិនមែនជាដំណាក់កាលសម្រាប់សមាជិកសភាថ្មីអនុវត្តជំនាញថ្លែងសុន្ទរកថារបស់ពួកគេទេ៕ BKP/PSA