កាលពីថ្ងៃអាទិត្យ ទី ១៨ មេសា រូបិយប័ណ្ណឌីជីថល Bitcoin បានធ្លាក់តម្លៃ ដល់ទៅ ១៥ ភាគរយ ក្រោយពីមានការកើនឡើងកាលពីប៉ុន្មានថ្ងៃមុន។
កាលពីថ្ងៃទី ១៨ មេសា នៅតាមបណ្តាញអ៊ីនធឺណិតមានការរាយការណ៍ថា ការធ្លាក់ចុះនេះ គឺទាក់ទងនឹងការព្រួយបារម្ភ ដែលថាក្រសួងរតនាគារសហរដ្ឋអាមេរិកអាចនឹងបង្ក្រាបការលាងលុយកខ្វក់ ដែលធ្វើឡើងតាមរយៈទ្រព្យសម្បត្តិឌីជីថល។ ប៉ុន្តែក្រសួងរតនាគារ បានបដិសេធមិនធ្វើអត្ថាធិប្បាយ។
ក្រៅពីរបាយការណ៍ដែលថា ក្រសួងរតនាគារសហរដ្ឋអាមេរិក មានការបង្ក្រាបការលាងលុយកខ្វក់ តាមរយៈទ្រព្យសម្បត្តិឌីជីថល Bitcoin សហស្ថាបនិក Nexo ដែលជាក្រុមហ៊ុនផ្តល់កម្ចីរូបិយប័ណ្ណឌីជីថល Bitcoin លោក Antoni Trenchev បាននិយាយថានៅមានកត្តាផ្សេងទៀត ដែលបណ្តាលឱ្យមានការធ្លាក់ចុះនេះផងដែរ។ លោក Trenchev បាននិយាយបន្តថា ការធ្លាក់ចុះនេះ អាចរួមបញ្ចូលការប្រើរូបិយប័ណ្ណនេះលើសហួសប្រមាណ អ្នកដែលនៅក្នុង Coinbase លក់ភាគហ៊ុន បន្ទាប់ពីចុះបញ្ជីផ្ទាល់ និងការដាច់ចរន្តអគ្គិសនីនៅក្នុងខេត្ត Xinjiang របស់ប្រទេសចិនដែលប៉ះពាល់ដល់អ្នកទិញរូបិយប័ណ្ណឌីជីថលនេះ៕