កាលពីថ្ងៃព្រហស្បតិ៍ ទី ២៨ មករា តុលាការកំពូលរបស់ប្រទេសប៉ាគីស្ថាន បានបញ្ជាឱ្យដោះលែងអ្នកកាន់សាសនាអ៊ីស្លាមម្នាក់ដែលត្រូវបានផ្តន្ទាទោសពីការកាត់ក្បាលអ្នកកាសែតសហរដ្ឋអាមេរិកឈ្មោះ Daniel Pearl។
ក្រុមមេធាវីបាននិយាយថា លោក Ahmed Omar Saeed Sheikh ដែលជាជនសង្ស័យសំខាន់នៅក្នុងការចាប់ពង្រត់និងឃាតកម្មលើអ្នកយកព័ត៌មាន Wall Street Journal ត្រូវបានដោះលែងដោយក្រុមចៅក្រមបីរូប។
Sheik បានទទួលស្គាល់ថាខ្លួនបានចូលរួមចំណែកក្នុងការស្លាប់របស់អ្នកយកព័ត៌មានរបស់កាសែត Wall Street Journal។ លោកបានបដិសេធការចោទប្រកាន់នេះអស់រយៈពេល ១៨ ឆ្នាំ អំពីការចូលរួមរបស់លោកក្នុងការសម្លាប់អ្នកកាសែតរូបនេះ។
កាលពីឆ្នាំ ២០១៩ លោក Sheik បានសរសេរសំបុត្រមួយដែលអត្ថន័យក្នុងនោះ លោកបានសារភាពថា លោកមានការជាប់ទាក់ទងតិចតួចក្នុងការសម្លាប់នោះ។ សំបុត្រនោះត្រូវបានបញ្ជូនទៅតុលាការកំពូលរបស់ប្រទេសប៉ាគីស្ថានកាលពីពីរសប្តាហ៍មុន។
កាលនោះ លោក Daniel Pearl ស៊ើបអង្កេតពីទំនាក់ទំនងរវាងពួកសកម្មប្រយុទ្ធនិងRichard C. Reidដែលបានព្យាយាមបំផ្ទុះការហោះហើរពីក្រុងប៉ារីសទៅរដ្ឋម៉ៃអាមី សហរដ្ឋអាមេរិក៕