ក្រុងរ៉ាស អាល់អាន៖ ប្រទេស តួកគី បានបើកការវាយប្រហារទ្រង់ទ្រាយធំមួយទៅលើតំបន់គ្រប់គ្រងដោយក្រុមឃើដនៅស៊ីរីភាគឦសានកាលពីថ្ងៃពុធ ដោយការទម្លាក់គ្រាប់បែកយ៉ាងខ្លាំងក្លា ដែលបានអនុវត្តធ្វើឡើងដោយការវាយប្រហារថ្មើរជើងទ្រង់ទ្រាយធំ អាចធ្វើទៅបានដោយសារការដកកងកម្លាំងអាមេរិកចេញពីទីនោះ។
ប្រធានាធិបតីតួកគីលោក រ៉េសិប តៃយីប អេរដូហ្គែន បានប្រកាសចាប់ផ្តើមវាយប្រហារនៅលើគេហទំព័រធ្វីធើរ ហើយភ្លាមៗនោះក្រុមយន្តហោះចម្បាំង និងកាំភ្លើងធំដណ្តើមបានទីតាំងឈរជើងជាច្រើនកន្លែងរបស់ក្រុមឃើដនៅតាមព្រំដែនជាគោលដៅនៃការវាយប្រហារយ៉ាងពេញទំហឹងដោយបានធ្វើឲ្យក្រុមជនស៊ីវិលរាប់ពាន់នាក់បានរត់ភៀសខ្លួនចេញពីផ្ទះសំបែងរបស់ពួកគេ។
ក្រសួងការពារជាតិតួកគីបានថ្លែងថា ការវាយប្រហារនោះ ត្រូវបានធ្វើឡើងកាលពីរសៀលថ្ងៃពុធ ដោយការចាប់ផ្តើមប្រតិបត្តិការថ្មើរជើងមួយនៅទីនោះ។
ក្រុមឃ្លាំមើលសិទ្ធិមនុស្សមានមូលដ្ឋាននៅអង់គ្លេស (SOHR) បានថ្លែងថា សមាជិក ១៦ នាក់ នៃក្រុមជីវពលកងកម្លាំងប្រជាធិបតេយ្យស៊ីរី (SDF) ដឹកនាំដោយឃើដ បានស្លាប់នៅប៉ុន្មានម៉ោងថ្មីៗនេះ ដោយសារការវាយប្រហារទ្រង់ទ្រាយធំរបស់តួកគី។
ទាំងកងកម្លាំង SOHR និងកងកម្លាំង SDF ត្រូវបានគេរាយការណ៍ថា មានការប៉ះទង្គិចគ្នាយ៉ាងខ្លាំងក្លានៅជិតទីក្រុងតែលអាប៊េដ។
ក្រសួងការពារជាតិរបស់ប្រទេស តួកគី បានថ្លែងនៅលើគេហទំព័រធ្វីធើរថា រហូតមកទល់ពេលនេះ កងកម្លាំងរបស់ខ្លួនបានវាយប្រហារទៅលើទីតាំងគោលដៅឈរជើងរបស់ «ក្រុមភេរវកម្ម» ឃើដចំនួន ១៨១ កន្លែង។
អ្នកនាំពាក្យឲ្យក្រុមមួយក្នុងចំណោមក្រុមជីវពលសកម្មប្រយុទ្ធស៊ីរី គាំទ្រតួកគីបានថ្លែងប្រាប់ AFP ថា ប្រតិបត្តិការវាយប្រហារថ្មើរជើងបានចាប់ផ្តើមធ្វើឡើងនៅក្នុងទីក្រុងតែល អាប៊េដ ហើយប្រព័ន្ធផ្សព្វផ្សាយតួកគីបានរាយការណ៍ថា កងកម្លាំងពិសេស និងកងកម្លាំងរថពាសដែក បានចូលទៅកាន់ចំណុចខ្លះនៅតាមព្រំដែននោះហើយ។
ការវាយប្រហារហាក់ដូចជារឿងមួយដែលចៀសមិនរួច ចាប់តាំងពីប្រធានាធិបតីអាមេរិកលោក ដូណាល់ ត្រាំ កាលពីថ្ងៃអាទិត្យបានប្រកាសដកកងកម្លាំងចេញពីព្រំដែននោះ ប៉ុន្តែការប្រយុទ្ធបានបង្កឲ្យមានការថ្កោលទោសពីអន្តរជាតិ ហើយមានការជួបប្រជុំជាបន្ទាន់មួយរបស់ក្រុមប្រឹក្សាសន្តិសុខអង្គការសហប្រជាជាតិ គ្រោងរៀបចំធ្វើឡើងកាលពីថ្ងៃព្រហស្បតិ៍៕ AFP/SK