ខេត្តឌីយ៉ារបាគៀរៈ រដ្ឋាភិបាលតួកគី បានដកតំណែងអភិបាលខេត្ត ៣ រូប កាលពីថ្ងៃចន្ទ ជុំវិញការចោទប្រកាន់ថា មានទំនាក់ទំនងជាមួយក្រុមជនសកម្មប្រយុទ្ធឃើដ ខណៈដែលក្រុងអង់ការ៉ា បង្កើនការបង្ក្រាបរបស់ខ្លួនទៅលើក្រុមអ្នកប្រឆាំង។
អភិបាលខេត្តឌីយារបាគៀរ អភិបាលខេត្តម៉ារឌីន និងអភិបាលក្រុងវ៉ាន ជាសមាជិកនៃគណបក្សប្រជាធិបតេយ្យឃើដ (HDP បានជាប់ឆ្នោតនៅខែមីនា ត្រូវបានព្យួរការងារជុំវិញការចោទប្រកាន់ថា មានទំនាក់ទំនងជាមួយនឹងគណបក្សពលករឃើដ (PKK) ដែលត្រូវបានគេប្រកាសថាខុសច្បាប់នោះ។
ការបង្ក្រាបនៅក្នុងពេលដំណាលគ្នានៅទូទាំង ២៩ ខេត្ត ក៏បានមើលឃើញថា មនុស្សរាប់រយនាក់ត្រូវបានចាប់ខ្លួន ជាសញ្ញាមួយបង្ហាញថា រដ្ឋាភិបាលរបស់លោកប្រធានាធិបតី រ៉េសិប តៃយីប អេរដូហ្គែន គ្មានបំណងកាត់បន្ថយគោលនយោបាយប្រឈមមុខរបស់ខ្លួនទេ ទោះបីជាការបោះឆ្នោតនាពេលថ្មីៗ មានសំឡេងគាំទ្រថយចុះក្តី។
ក្រសួងមហាផ្ទៃបាននិយាយថា ការដកតំណែងអភិបាលខេត្តទាំងនេះមានសំណុំរឿងសកម្មប្រឆាំងនឹងពួកគេចំពោះការឃោសនា ឬក៏ធ្វើជាសមាជិកនៃអង្គការភេរវកម្ម។
ការចោទប្រកាន់ជាច្រើន រួមមានការចូលរួមបុណ្យសព និងការទៅមើលផ្នូររបស់ក្រុមភេរវករ ប្តូរឈ្មោះ ផ្លូវនានា និងសួនច្បារ ក្រោយពីចាប់សមាជិកគណបក្ស PKK ដាក់គុក និងផ្តល់ការងារឲ្យក្រុមសាច់ញាតិរបស់ក្រុមជនសកម្មប្រយុទ្ធឃើដ។
លោក អេរដូហ្គែន បានអះអាងជាច្រើនលើកហើយថា HDP មានទំនាក់ទំនងជាមួយ PKK ដែលបានធ្វើការបះបោរបង្ហូរឈាមប្រឆាំងប្រទេស តួកគី កាលពី ៣៥ ឆ្នាំកន្លងទៅ។
ក្រសួងមហាផ្ទៃបានថ្លែងថា តំណែងអភិបាលខេត្តទាំងនោះ នឹងត្រូវប្រគល់ទៅអភិបាលខេត្ត ដែលត្រូវបានតែងតាំងរដ្ឋាភិបាលកណ្តាល។
អភិបាលខេត្តឌីយ៉ារបាគៀរ លោក Selcuk Mizrakli បានថ្លែងប្រាប់ក្រុមអ្នកកាសែតនៅក្រៅអគារសាលាខេត្តថា វិធានការនេះមិនគោរពឆន្ទៈរបស់ប្រជាជនទេ៕ AFP/PSA