ក្រុងអង់ការ៉ា៖ ប្រទេសតួកគី បើកការវាយប្រហារផ្លូវអាកាស និងថ្មើរជើងប្រឆាំងនឹងក្រុមឧទ្ទាមឃើដនៅអ៊ីរ៉ាក់ភាគខាងជើងកាលពីថ្ងៃពុធ ជាកិច្ចប្រឹងប្រែងមួយដែលទំនងជាបង្កើនឲ្យមានការបែកបាក់កាន់តែខ្លាំងឡើងជាមួយរដ្ឋាភិបាលក្រុងបាកដាដ។
ក្រសួងការពារជាតិបាននិយាយថា កងកុម៉្មង់ដូបានរុលទៅមុខ ដោយមានការគាំទ្រពីយន្តហោះដ្រូន និងឧទ្ធម្ភាគចក្រ បន្ទាប់ពីការទម្លាក់គ្រាប់បែក និងបាញ់រ៉ុក្កែត និងកាំភ្លើងធំ លើគោលដៅរបស់ក្រុមឧទ្ទាមជាង ១៥០ កន្លែង។
ក្រសួងនោះ បានបន្ថែមថា កិច្ចប្រតិបត្តិការនោះត្រូវបានគេហៅថា «ក្រញាំខ្លា» ដែលបានកើតឡើង ក្រោយពីមានការវាយប្រហារទៅលើស្ថានីយប៉ូលិសជាច្រើនរបស់យើង និងមូលដ្ឋានយោធានៅក្បែរព្រំដែនអ៊ីរ៉ាក់។
ប្រទេសតួកគី បានបើកការវាយប្រហារផ្លូវអាកាសកាលពីដើមសប្តាហ៍ ដែលនាំឲ្យមានការឆ្លើយតបពីអ៊ីរ៉ាក់ ដែលបានចាត់ទុកការវាយប្រហារទាំងនោះថា ជា «ការរំលោភបំពានបូរណភាពទឹកដី»។
យោធាតួកគី តាមធម្មតាបើកកិច្ចប្រតិបត្តិការប្រឆាំងនឹងគណបក្សពលករឃើដ (PKK) នៅតួកគីភាគអាគ្នេយ៍ និងមូលដ្ឋានទ័ពរបស់បក្សនេះ ឆ្លងព្រំដែន។
កិច្ចប្រតិបត្តិការកាលពីរាត្រីថ្ងៃអាទិត្យ ត្រូវបានគេហៅថា «ក្រញាំឥន្រ្ទី» ដោយធ្វើការវាយប្រហារទៅលើទីប្រជុំជនកាន់ឌីល ស៊ីនចារ និងហាគុកនៃប្រទេសអ៊ីរ៉ាក់ភាគខាងជើង។
អ្នកនាំពាក្យគណបក្សដែលកំពុងកាន់អំណាចរបស់លោកប្រធានាធិបតី រេសិប តៃយីប អេរដូហ្គែន បានការពារវិធានការរបស់តួកគី ដោយបានបន្ថែមថា តួកគីបន្តវាយប្រហារប្រឆាំងភេរវករផែ្អកលើច្បាប់អន្តរជាតិ៕ AFP/PSA