The Phnom Penh Post Search

Search form




Logo of Phnom Penh Post newspaper Phnom Penh Post - តើ​​ការ​បិទ​គណនី​បណ្តាញ​សង្គម​ផ្ទាល់​ខ្លួន​របស់​​លោក ​Trump ខុស​ច្បាប់​ដែរ ​ឬ​ទេ​?




តើ​​ការ​បិទ​គណនី​បណ្តាញ​សង្គម​ផ្ទាល់​ខ្លួន​របស់​​លោក ​Trump ខុស​ច្បាប់​ដែរ ​ឬ​ទេ​?

Content image - Phnom Penh Post
លោក Trump ញញឹម​ក្នុងអំឡុង​​​​ការ​ជជែកដ​េញ​ដោល​​​អំពីកា​រប្រជែង​​តំណែង​កាលពីថ្ងៃទី​ ២៩ ខែកញ្ញា​។ AFP

តើ​​ការ​បិទ​គណនី​បណ្តាញ​សង្គម​ផ្ទាល់​ខ្លួន​របស់​​លោក ​Trump ខុស​ច្បាប់​ដែរ ​ឬ​ទេ​?

ប្រធានាធិបតី​សហរដ្ឋ​អាមេរិក ​លោក​ Donald Trump ត្រូវ​បាន​គេ​ចោទ​ប្រកាន់​ថា ​បាន​ញុះញង់​ឱ្យ​មាន​ការ​បះបោរ​ ដោយ​កាល​ពី​ថ្ងៃទី ​៦ មករា លោក​បាន​ជំរុញ​ឱ្យ​ក្រុម​អ្នក​គាំទ្រ​វាយ​សម្រុក​ចូល​អគារ​សភា​អាមេរិក​នៅ​រដ្ឋធានី​វ៉ាស៊ីនតោន​ ខណៈ​ពេល​ដែល​សមាជិក​សភា​មក​ពី​គណបក្ស​ទាំង ​២ កំពុង​ធ្វើ​ការ​បញ្ជាក់​លទ្ធផល​អង្គ​បោះឆ្នោត​ប្រធានាធិបតី ដែល​ធ្វើ​ឱ្យ​មាន​ការ​ប៉ះ​ទង្គិច​ជាមួយ​ប៉ូលិស​ ឈាន​ដល់​ការ​ស្លាប់​បាតុករ​ចំនួន ​៤ នាក់​ និង​ប៉ូលិស​ ១ រូប​។

ដោយ​ផ្អែក​លើ​ហេតុផល​ខាង​លើ​ក្រុមហ៊ុន​ Twitter នៅ​ថ្ងៃទី ​៨ មករា​ បាន​លុប​គណនី​ផ្ទាល់​ខ្លួន​របស់​លោក​ Trump ដែល​គណនី​នេះ ​គឺ​ជា​មធ្យោបាយ​សំខាន់​នៃ​ការ​ប្រាស្រ័យ​ទាក់ទង​ជាមួយ​អ្នក​គាំទ្រ​របស់​លោក​ចំនួន​ជាង ​៨៩ លាន​នាក់។

រី​ឯ​ Facebook និង​ Instagram វិញ​បាន​ផ្អាក​មិន​ឱ្យ​លោក​ Trump បង្ហោះ​សារ​ថ្មី​រហូត​ដល់​ពេល​ដែល​ប្រធានាធិបតី​ជាប់​ឆ្នោត​លោក​ Joe Biden ចូល​កាន់​អំណាច​នៅ​ថ្ងៃទី ​២០ មករា​។ ក្រុមហ៊ុន​ផ្សេង​ទៀត​ដូចជា​ Twitch, Snapchat, Reddit, Shopify និង TikTok ក៏​បាន​ចូលរួម​ក្នុង​ការ​បិទ ឬ​ផ្អាក​ដំណើរការ​គណនី​របស់​លោក​ Trump ផង​ដែរ​។

ជា​ការ​ប្រតិកម្ម​នឹង​ការ​បិទ​គណនី​ទាំង​នេះ​ កូន​ប្រុស​ច្បង​របស់​លោក​ Trump គឺ​លោក​ Donald Trump Jr.បាន​និយាយ​នៅ​លើ​ Twitter ថា​៖ «ការ​និយាយ​ដោយ​សេរី ​គឺ​កំពុង​រង​ការ​វាយ​ប្រហារ! ការ​លុប​បំបាត់​សារ​កំពុង​កើត​ឡើង​ដូច​មិន​ដែល​មាន​ពី​មុន​មក​។ កុំ​ឱ្យ​ពួក​គេ​បំបាត់​សំឡេង​របស់​យើង​»។

សំណួរ​សំខាន់​មួយ​ដែល​កើត​ឡើង​ពី​ព្រឹត្តិការណ៍​នេះ​គឺ​ថា តើ​ការ​បិទ​គណនី​បណ្ដាញ​សង្គម​ផ្ទាល់​ខ្លួន​របស់​លោក​ Trump ខុស​ច្បាប់​ដែរ​ឬទេ? ដោយ​មាន​ការ​ចោទ​ប្រកាន់​ថា ​ក្រុមហ៊ុន​ទាំង​នេះ​បាន​រំលោភ​ វិសោធនកម្ម​ទី​ ១ នៃ​រដ្ឋធម្មនុញ្ញ​សហរដ្ឋ​អាមេរិក​ដែល​ធានា​សិទ្ធិ​សេរីភាព​ក្នុង​ការ​បញ្ចេញ​មតិ​។

ចម្លើយ​ដ៏​ខ្លី​ចំពោះ​សំណួរ​នេះ​គឺ​ទេ​ ការ​បិទ​គណនី​របស់​លោក​ Trump គឺ​មិន​ខុស​ច្បាប់​ទេ​។

ជា​រឿយៗ​ តែងតែ​មាន​ការ​យល់​ច្រឡំ​ថា ​វិសោធនកម្ម​ទី​១ រដ្ឋ​ធម្មនុញ្ញ​សហរដ្ឋ​អាមេរិក ​គឺ​ធានា​សិទិ្ធ​សេរីភាព​ការ​បញ្ចេញ​មតិ​ក្នុង​គ្រប់​ស្ថានភាព​ តែ​បើ​សិន​យើង​អាន​លាយលក្ខណ៍​អក្សរ​នៃ​វិសោធនកម្ម​នេះ​យើង​នឹង​ឃើញ​ថា ​រដ្ឋធម្មនុញ្ញ​អាមេរិក​ គឺ​គ្រាន់​តែ​ការពារ​សិទ្ធិ​បញ្ចេញ​មតិ​ពី​ការ​រំលោភ​ដោយ​សកម្មភាព​រដ្ឋាភិបាល​ប៉ុណ្ណោះ​ ហើយ​មិន​ត្រូវ​បាន​អនុវត្ត​លើ​វិស័យ​ឯកជន​ទេ​។ តុលាការ​កំពូល​អាមេរិក​ និង​តុលាការ​ថ្នាក់​ក្រោម​ផ្សេង​ៗ​ទៀត​ ក៏​បាន​ធ្វើ​ការ​បញ្ជាក់​ជា​ច្រើន​លើក​ច្រើន​សា​ថា​ វិសោធនកម្ម​ទី​១ គឺ​មិន​ធានា​សិទ្ធិ​សេរីភាព​ការ​បញ្ចេញ​មតិ​នៅ​ក្នុង​វិស័យ​ឯកជន​ទេ​។

បើ​ទោះ​ជា​ការ​បិទ​គណនី​លោក​ Trump គឺ​ស្រប​ច្បាប់​ក៏​ដោយ​ សកម្មភាព​នេះ ​បាន​បង្ក​ឱ្យ​មាន​បញ្ហា​នៃ​ការ​រំលោភ​សិទ្ធិ​សេរីភាព​មូលដ្ឋាន​ដ៏​សំខាន់​មួយ​ ហើយ​អាច​បង្ក​ឱ្យ​មាន​បញ្ហា​ជា​ច្រើន​។ អ្នក​វិភាគ​មួយ​ចំនួន​ពោល​ថា ​​សមត្ថភាព​របស់​អាមេរិក​ក្នុង​ការ​លើក​កម្ពស់​លទ្ធិប្រជាធិបតេយ្យ ​និង​សេរីភាព​នយោបាយ​នៅ​ប្រទេស​ផ្សេង​ទៀត​អាច​ដួល​រលំ​ ប្រសិន​បើ​អាមេរិក​បាន​បរាជ័យ​ក្នុង​ការពារ​សិទិ្ធ​សេរីភាព​នៅ​ក្នុង​ប្រទេស​ខ្លួន​។ មេ​ដឹកនាំ​បក្ស​ប្រឆាំង​រុស្ស៊ី​លោក​ Alexei Navalny បាន​និយាយ​ថា ​ការ​បិទ​នេះ​អាច​ធ្វើ​ឱ្យ​ Twitter រង​ការ​ «កេងប្រវ័ញ្ច​ពី​សត្រូវ​នៃ​សេរីភាព​នៃ​ការ​បញ្ចេញ​មតិ​នៅ​ជុំវិញ​ពិភព​លោក​។

យ៉ាងណា​មិញ​ ក្រោយ​បាន​បាត់បង់​មធ្យោបាយ​ទំនាក់ទំនង​ខាង​លើ​ លោក​ Trump បាន​ព្យាយាម​ផ្លាស់​ប្ដូរ​ទៅ​ប្រើ​បណ្ដាញ​សង្គម​ Parler វិញ​ ដែល​ពេញ​និយម​ប្រើប្រាស់​ដោយ​ក្រុម​អ្នក​គាំទ្រ​របស់​លោក​។ តែ​ត្រឹម​ថ្ងៃ​សៅរ៍​ ទី ​៩ មករា​ ក្រុមហ៊ុន​ Apple និង​ Google បាន​ដក​កម្មវិធី​ Parler ចេញ​ពី​ App Store និង​ Play Store រៀងៗ​ខ្លួន​ ដោយ​បាន​និយាយ​ថា​ Parler ​មិន​បាន​គ្រប់គ្រង​ការ​បង្ហោះ​សារ​ញុះញង់​ឱ្យ​មាន​ការ​បះបោរ ឬ​ញុះញង់​ឱ្យ​មាន​ហិង្សា​។ នៅ​ថ្ងៃ​អាទិត្យ​ក្រុមហ៊ុន​ Amazon បាន​ដក​ Parler ចេញ​ពី​សេវា​គេហទំព័រ​ពួក​គេ​ធ្វើ​ឱ្យ​បាត់​មុខ​បណ្ដាញ​សង្គម​នេះ​ពី​អ៊ីនធឺណិត​។

កាល​ពី​ថ្ងៃ​ចន្ទ​ ទី ១១ Parler បាន​ប្ដឹង​ Amazon នៅ​តុលាការ​អាមេរិក​ ដោយ​ចោទ​ Amazon បាន​ប្រព្រឹត្ត​សកម្មភាព​ខុស​ច្បាប់​ ដើម្បី​រារាំង​ការ​ប្រកួតប្រជែង​ដោយ​លុប​បំបាត់​គូ​ប្រជែង​ចេញ​ពី​ទីផ្សារ​។ Parler ក៏​បាន​អះអាង​ផង​ដែរ​ថា ​ក្រុមហ៊ុន Amazon បាន​រំលោភ​កិច្ចសន្យា​របស់​ខ្លួន​ជាមួយ Parler ដោយ​មិន​បាន​ផ្ដល់​សេចក្ដី​ជូន​ដំណឹង​អំពី​ការ​ផ្ដាច់​សេវាកម្ម​មុន​ការ​ផ្ដាច់ ​៣០ ថ្ងៃ​៕

អត្ថបទគួរចាប់អារម្មណ៍

  • ខេត្តបាក់និញៈ សួនឧស្សាហ​កម្ម​ Yen Phong 1 Industrial Park នៅខេត្ត Bac Ninh ភាគខាងជើង​បាន​ក្លាយជា​​សួនឧស្សាហ​កម្មលើក​ដំបូង​នៅក្នុងប្រទេស​វៀតណាម ដែលទទួល​បាន​​បណ្ដាញ​ទូរគមនា​គមន៍​ 5G ដោយ​បច្ចេកវិទ្យាថ្មីនេះ​​ បានដាក់​​ឲ្យដំណើរការ​នៅទីតាំងនោះ​ដោយ​ក្រុមហ៊ុន Viettel កាល​ពីថ្ងៃព្រហស្បតិ៍។​​

  • ភ្នំពេញៈ កម្ពុជា​នាំចេញ​ទំនិញ​ទៅ​ទីផ្សារ​អាមេរិក​មានតម្លៃ​ជាង ៦ ​ពាន់​លាន​ដុល្លារ​ ក្នុង​រយៈពេល​ ១១ ​ខែ ឆ្នាំ​ ២០២០ កើន​ជាង ២២ ​ភាគរយ​ធៀបនឹង​រយៈពេល​ដូចគ្នា​ឆ្នាំ​ ២០១៩ ខណៈ​ទំហំ​ពាណិជ្ជកម្ម​ទ្វេភាគី​មានតម្លៃ​ជាង ៦,៣ ​ពាន់​លាន​ដុល្លារ​។ នេះ​បើ​យោងតាម​ទិន្នន័យ​ពី​ការិយាល័យ​ពាណិជ្ជកម្ម​អាមេរិក​។

  • ភ្នំពេញៈ ត្រឹម​រយៈពេល​ជិត​ ១ ​ខែ​ប៉ុណ្ណោះ​ចាប់ពី​ថ្ងៃទី​ ២០ ធ្នូ ដល់​ថ្ងៃទី​ ១៧ មករា ពលករ​ខ្មែរ​ដែល​បាន​វិលត្រឡប់​មកពី​ប្រទេស​ថៃ​តាម​ច្រក​នៃ​បណ្តា​ខេត្ត​ជាប់​ព្រំដែន​កម្ពុជា-ថៃ​ចំនួន​ ៦៩ ​នាក់ ​ត្រូវបាន​រកឃើញ​វិជ្ជមាន​កូវីដ​ ១៩ ដោយ​ក្នុង​នោះ​ពលករ​ដែល​បាន​ព្យាបាល​ជាសះស្បើយ​ ២១ ​នាក់​។

  • ស្ទឹងត្រែងៈ កម្លាំង​នគរបាល​ប្រឆាំង​គ្រឿងញៀន​គ្រោង​នឹង​បញ្ជូន​បុរស​ជនជាតិ​ឡាវ​​ ២ ​នាក់ និង​វត្ថុតាង​គ្រឿងញៀន​ជិត​ ៥០ ​គីឡូក្រាម​ទៅ​តុលាការ​នៅ​ព្រឹក​ថ្ងៃ​ចន្ទ​នេះ​ ខណៈ​ដែល​សមត្ថកិច្ច​កម្ពុជា​កំពុង​សហការ​ជាមួយ​សមត្ថកិច្ច​ឡាវ​ ដើម្បី​តាម​រក​ចាប់ខ្លួន​ជនជាតិ​ឡាវ​ ៤ ​នាក់​ទៀត​ដែល​រត់គេចខ្លួន​។

  • ភ្នំពេញៈ លោក ហង់ជួន ណារ៉ុន រដ្ឋមន្ត្រី​ក្រសួង​អប់រំ ​យុវជន និង​កីឡា​បាន​ដឹកនាំ​កិច្ចប្រជុំ​ដាក់​ចេញ​វិធានការ​បន្ថែម​ដល់​សាលារៀន​ដែល​កំពុង​ត្រូវបាន​ប្រើប្រាស់​ជា​មណ្ឌល​ចត្ដាឡីស័ក ពិសេស​សាលារៀន​តាម​ខេត្ដ​ជាប់​ព្រំដែន​ប្រទេស​ថៃ និង​វៀតណាម​ដើម្បី​ធ្វើយ៉ាងណា​ធានា​ផ្ដល់​ការសិក្សា​ដល់​សិស្ស​គ្រប់គ្នា​ក្នុង​ឆ្នាំ​សិក្សា​ថ្មី​នេះ​។

  • ភ្នំពេញៈ លោក​ឧបនាយករដ្ឋមន្ត្រី ស ខេង រដ្ឋមន្ត្រី​ក្រសួង​មហាផ្ទៃ​បាន​ណែនាំ​ឱ្យ​អាជ្ញាធរ​គ្រប់លំដាប់​ថ្នាក់​លុបបំបាត់​ការបង្ក​សំឡេង​រំខាន​លើស​កម្រិត​ដោយ​យានយន្ដ​គ្រប់​ប្រភេទ និង​លុបបំបាត់​កន្លែង​កែច្នៃ​បំពង់​ស៊ី​ម៉ាំង​ដែល​បង្ក​ភាព​រំខាន​ដល់​អារម្មណ៍ និង​សិទ្ធិ​រស់នៅ​របស់​ពលរដ្ឋ