.jpg)
លោក Richard Yu ថ្លែងនៅលើវេទិកាក្នុងអំឡុងការបង្ហាញស្មាតហ្វូនថ្មីចេញចុងក្រោយបំផុត (Mate30 និង Mate30Pro) របស់ក្រុមហ៊ុន Huawei។ AFP
បើយោងតាមសារព័ត៌មាន Reuters ក្រុមហ៊ុន Huawei របស់ចិនគ្រោងនឹងផលិតរថយន្តអគ្គិសនីក្រោមយីហោផ្ទាល់ខ្លួន ហើយអាចដាក់លក់ម៉ូដែលមួយចំនួននៅឆ្នាំនេះ ប៉ុន្តែក្រុមហ៊ុនព្យាយាមលាក់បាំងព័ត៌មាននេះដោយបដិសេធដំណឹងនេះហើយថា ក្រុមហ៊ុនខ្លួនគ្រាន់តែមានបំណងផ្គត់ផ្គង់គ្រឿងបន្លាស់ដល់ក្រុមហ៊ុនដែលផលិតប៉ុណ្ណោះ។
បើតាមការឱ្យដឹងពីអ្នកចូលរួមកិច្ចប្រជុំរវាងក្រុមហ៊ុន Huawei Technologies Co Ltd និងក្រុមហ៊ុនដែលគ្រប់គ្រងដោយរដ្ឋ Changan Automobile និងក្រុមហ៊ុនផលិតរថយន្តផ្សេងៗទៀត ស្ដីអំពីការប្រើប្រាស់រោងចក្រផលិតរថយន្តរបស់ក្រុមហ៊ុនទាំងនេះ ដើម្បីផលិតរថយន្តដើរដោយអគ្គិសនីក្រោមយីហោ Huawei។ ប្រភពទាំងអស់នេះ បានបដិសេធមិនបញ្ចេញឈ្មោះ ដោយសារតែកិច្ចពិភាក្សាមានលក្ខណៈឯកជន។
ទន្ទឹមនឹងនេះដែរ ក្រុមហ៊ុន Huawei ក៏កំពុងពិភាក្សាជាមួយក្រុមហ៊ុន BluePark New Energy Technology ដែលជាក្រុមហ៊ុនបុត្រសម្ព័ន្ធនៃក្រុមហ៊ុន BAIC Group ដែលគាំទ្រដោយទីក្រុងប៉េកាំង ដើម្បីជួយគាំទ្រដល់ការផលិតរថយន្តរបស់ខ្លួនផងដែរ។
ផែនការនេះបង្ហាញឱ្យឃើញពីការផ្លាស់ប្តូរទិសដៅដ៏សំខាន់មួយរបស់ក្រុមហ៊ុន Huawei បន្ទាប់ពីទទួលរងការដាក់ទណ្ឌកម្មរបស់សហរដ្ឋអាមេរិកអស់រយៈពេល ២ ឆ្នាំ ធ្វើឱ្យកាត់បន្ថយខ្សែចង្វាក់ផ្គត់ផ្គង់សំខាន់ៗដោយបង្ខំឱ្យក្រុមហ៊ុននេះពឹងផ្អែកលើការលក់ទូរស័ព្ទ ដើម្បីរក្សាយីហោនេះ។
យ៉ាងណាមិញ អ្នកនាំពាក្យរបស់ក្រុមហ៊ុន Huawei បានបដិសេធថា ក្រុមហ៊ុនមិនមានគម្រោងរចនារថយន្តអគ្គិសនី ឬផលិតយានយន្តម៉ាក Huawei អ្វីឡើយ។ «ក្រុមហ៊ុន Huawei មិនមែនជាក្រុមហ៊ុនផលិតរថយន្តទេ។
ទោះយ៉ាងណាតាមរយៈបច្ចេកវិទ្យាព័ត៌មាន និងគមនាគមន៍ យើងមានបំណងចង់ក្លាយជាអ្នកផ្គត់ផ្គង់គ្រឿងបន្លាស់រថយន្តឌីជីថល និងគ្រឿងបន្ថែមថ្មី ដែលអាចជួយឱ្យក្រុមហ៊ុនផលិតវត្ថុធាតុដើមផលិតយានយន្តបានល្អជាងមុន»។
ប្រភពព័ត៌មានចំនួន ៣ បាននិយាយថា ក្រុមហ៊ុន Huawei បានចាប់ផ្តើមរចនាដោយស្ងាត់ៗ ផ្ទៃក្នុងនិងគ្រោងផ្គត់ផ្គង់ក្រុមហ៊ុនក្នុងស្រុក និងគ្រោងចាប់ផ្តើមគម្រោងជាផ្លូវការនៅដើមឆ្នាំនេះ។
លោក Richard Yu ប្រធានក្រុមអ្នកជំនួញអតិថិជនរបស់ក្រុមហ៊ុន Huawei ដែលបានដឹកនាំក្រុមហ៊ុនឱ្យក្លាយជាក្រុមហ៊ុនផលិតស្មាតហ្វូនធំជាងគេបំផុតនៅលើពិភពលោកថា លោកនឹងចាប់ផ្ដើមផ្ដោតទៅលើការផលិតរថយន្តអគ្គិសនី ខណៈទីផ្សារនៃផលិតផលនេះនឹងវាយលុកទីផ្សារបានមួយផ្នែកធំ។
គួរបញ្ជាក់ផងដែរថា ក្រុមហ៊ុនបច្ចេកវិទ្យាចិនជាច្រើនបាននិងកំពុងផ្តោតការយកចិត្តទុកដាក់ទៅលើការផលិតរថយន្តដើរដោយអគ្គិសនីវិញដោយសារទីក្រុងប៉េកាំងចាប់ផ្ដើមជំរុញ និងលើកទឹកចិត្តឱ្យមានការប្រើប្រាស់នូវយានយន្តដែលជាមធ្យោបាយកាត់បន្ថយការបំពុលខ្យល់រ៉ាំរ៉ៃ។
តួយ៉ាងដូចជា ការផលិត និងទីផ្សាររថយន្ដអគ្គិសនីថ្មី (NEVs) រួមមានដូចជាយានយន្តអគ្គិសនីអាគុយសុទ្ធ ក៏ដូចជារថយន្ដប្រើថាមពលកូនកាត់ និងអ៊ីដ្រូហ្ស៊ែនត្រូវបានគេរំពឹងថា នឹងកើនឡើងដល់ទៅ ២០% នៃការលក់រថយន្ដប្រចាំឆ្នាំនៅប្រទេសចិន នៅឆ្នាំ ២០២៥ ហើយការលក់រថយន្ដអគ្គិសនីថ្មី (NEVs) របស់ចិន បានកើនឡើងពីចំនួន ១,៨ លានគ្រឿងនៅឆ្នាំនេះ ខណៈឆ្នាំ ២០២០ កើនត្រឹម ១,៣ លានគ្រឿង។
យ៉ាងណាមិញអ្នកជំនាញមួយចំនួនយល់ថា ក្រុមហ៊ុន Huawei អាចក្លាយជាក្រុមហ៊ុនមួយ ដែលនឹងក្លាយជាអ្នកប្រកួតប្រជែងជាមួយនឹងក្រុមហ៊ុនផលិតរថយន្តអគ្គិសនីល្បីឈ្មោះជាងគេរបស់មហាសេដ្ឋី Elon Musk គឺក្រុមហ៊ុន Tesla បើទោះជាមានវត្តមាន ក្រុមហ៊ុនល្បីៗ ផ្សេងៗដទៃទៀត ដែលចង់ធ្វើជាដៃគូប្រកួតប្រជែង Tesla រួមមានក្រុមហ៊ុន Xpeng ដែលគាំទ្រដោយ Alibaba និងក្រុមហ៊ុន Nvidia ដែលជាដៃគូក្រុមហ៊ុន Li Auto ជាដើម។
លោក Xu Zhijun ប្រធានប្តូរវេនរបស់ក្រុមហ៊ុន Huawei ធ្លាប់បាននិយាយនៅក្នុងការធ្វើសន្និសីទជាសាធារណៈនៅឆ្នាំ.២០១៩ ថា៖ «ប្រសិនបើអ្នកក្រឡេកមើលតម្លៃភាគហ៊ុនរបស់ក្រុមហ៊ុន Tesla អ្នកនឹងដឹងថា តើអនាគតទីផ្សារនៃរថយន្តស្ថិតនៅចំណុចណា។ នៅថ្ងៃទី ១ ខែ កញ្ញា ឆ្នាំមុន ទីផ្សារលក់រថយន្តរបស់ក្រុមហ៊ុន Tesla មានទំហំទឹកប្រាក់ប្រមាណ ៥០០ ពាន់លានដុល្លារ ពោលគឺច្រើនជាងក្រុមហ៊ុនលក់រថយន្តធំៗ ចំនួន ៥ បូកចូលគ្នាទៀត។
លោក Xu ក៏ធ្លាប់បាននិយាយនៅក្នុងបទសម្ភាសកាលពីខែតុលា ថា៖ «អ្វីៗដែលក្រុមហ៊ុន Tesla អាចធ្វើបានយើងក៏អាចធ្វើបានដូចគ្នា»។
មិនត្រឹមតែប៉ុណ្ណោះមនុស្សជំនិតរបស់ក្រុមហ៊ុន Huawei បាននិយាយថា ក្រុមហ៊ុនមានបំណងក្លាយជាអ្នកផ្គត់ផ្គង់ផ្នែកទន់ និងផ្នែករឹងទាំងអស់នៃការផលិតរថយន្តដើរដោយអគ្គិសនីនេះ ធ្វើយ៉ាងណាឱ្យលេចធ្លោក្នុងឧស្សាហកម្មនេះ។
ប្រភពដដែលបាននិយាយថា ក្រុមហ៊ុន Huawei បាននិងកំពុងជ្រើសរើសអ្នកមានទេពកោសល្យផលិតគ្រឿងបន្លាស់ផ្គត់ផ្គង់រថយន្តធំៗ ដូចជា Bosch របស់អាល្លឺម៉ង់ជាដើម។ ប្រសិនបើត្រូវការអ្វីក្រុមហ៊ុន Huawei អាចបង្កើតក្រុមមួយ ដែលមានអ្នកជំនាញរាប់ពាន់នាក់យ៉ាងឆាប់រហ័ស ដើម្បីផលិតបានយ៉ាងងាយស្រួល។
ដោយឡែក កាលពីពាក់កណ្តាលខែសីហា កន្លងទៅ ក្រុមហ៊ុន Huawei បានផ្លាស់ប្តូរការចុះបញ្ជីអាជីវកម្មរបស់ខ្លួន ដោយស្ងាត់ស្ងៀមដោយបន្ថែមការស្រាវជ្រាវផលិតកម្ម និងការលក់គ្រឿងបន្លាស់រថយន្ត និងប្រព័ន្ធបើកបរឆ្លាតវៃទៅក្នុងទំហំអាជីវកម្មរបស់ខ្លួនទៀតផង។
យ៉ាងណាមិញអ្នកប្រឡូកក្នុងឧស្សាហកម្មផលិតរថយន្តនេះ សុទ្ធតែតាមដានការពង្រីករបស់ក្រុមហ៊ុន Huawei គ្រប់ជំហាន។ នាយកប្រតិបត្តិនៅក្រុមហ៊ុនផលិតរថយន្តឈានមុខ ១ រូប បាននិយាយថា៖ «ក្រុមហ៊ុន Huawei ទំនងជាក្លាយជាក្រុមហ៊ុននាំមុខដូចក្រុមហ៊ុន Bosch អ៊ីចឹង ហើយអាចបង្កការគំរាមកំហែងដល់អ្នកផ្គត់ផ្គង់រថយន្តធំៗដទៃទៀតផង»។
លោក Chen Yudong ប្រធានក្រុមហ៊ុន Bosch សាខាប្រទេសចិន បានមានប្រសាសន៍ថា ក្រុមហ៊ុន Huawei គឺជាចំណូលថ្មីដែលអាចជាដៃគូ ឬក៏ជាគូរប្រជែងមានសក្ដានុពលមួយជាមួយនឹងក្រុមហ៊ុន Bosch ផងដែរ។
ក្រុមហ៊ុនផលិតរថយន្តឯទៀតក៏មានការព្រួយបារម្ភថា ក្រុមហ៊ុន Huawei នឹងផលិតរថយន្តផ្ទាល់ខ្លួន និងធ្វើឱ្យមានការផ្លាស់ប្តូរដល់ឧស្សាហកម្មទាំងមូល។ នាយកប្រតិបត្តិរថយន្តម្នាក់បាននិយាយថា៖ «ពីមុនក្រុមហ៊ុននេះថា ខ្លួននឹងមិនផលិតទូរស័ព្ទដៃទេ។ តែនៅត្រីមាសទី២ ក្រុម ហ៊ុន Huawei បានក្លាយជាក្រុមហ៊ុនផលិតស្មាតហ្វូនធំជាងគេបំផុតនៅលើពិភព លោកដែលបានវ៉ាដាច់ក្រុមហ៊ុន Samsung និង Apple ទៀតផង។ ដូចនេះហើយទើប ក្រុមហ៊ុនផលិតរថយន្តស្ទើរគ្រប់គ្នាមានការព្រួយបារម្ភដំណឹងដែលថា ក្រុមហ៊ុន Huawei អាចនឹងផលិតរថយន្តផ្ទាល់ខ្លួននេះ។
គួរបញ្ជាក់ផងដែរថា ក្រុមហ៊ុនចិន ១ នេះ បានបង្កើនផលិតផលបច្ចេកវិទ្យាទំនើបៗបន្ថែម បន្ទាប់ពីមានការដាក់ទណ្ឌកម្មសេដ្ឋកិច្ចជាបន្តបន្ទាប់ពីសំណាក់មហាអំណាចលោកខាងលិចជាពិសេសសហរដ្ឋអាមេរិកដែលកាលពីឆ្នាំទៅបានចោទប្រកាន់រដ្ឋាភិបាលចិនពីបទរំលោភសិទ្ធិមនុស្ស ដូចជារឿងការបៀតបៀនជនជាតិមូស្លីមនៅប្រទេសចិន។
ខណៈពេលដែលប្រទេសចិន បានបដិសេធរាល់ការចោទប្រកាន់លើការរំលោភបំពានដែលកើតឡើងនៅខេត្ត Xinjiang ហើយថា ប្រទេសអាមេរិក និងប្រទេសលោកខាងលិចដទៃទៀត គួរតែដកខ្លួនចេញពីបញ្ហាផ្ទៃក្នុងរបស់ប្រទេសចិន៕
