លោក Jack Ma ជារឿយៗត្រូវបានគេចាត់ទុកថាជាបុគ្គលជោគជ័យបំផុតនៅក្នុងប្រទេសចិន។លោកគឺតំណាងឱ្យពាក្យស្លោក «សុបិនចិន» ដោយអតីតគ្រូបង្រៀនភាសាអង់គ្លេសរូបនេះ បានប្រែក្លាយខ្លួនទៅជាបុគ្គលមានទ្រព្យសម្បត្តិធំជាងគេក្នុងប្រទេស។ លោកគឺជាស្ថាបនិកនៃក្រុមហ៊ុនពាណិជ្ជកម្មអេឡិចត្រូនិក Alibaba ដែលគេប៉ាន់ស្មានថាក្រុមហ៊ុននេះ មានតម្លៃជាង ៥០០ ពាន់លានដុល្លារ។
ប៉ុន្តែឥឡូវលោក Jack Ma បានបាត់ខ្លួន ហើយគេមិនដឹងថា លោកនៅឯណាទេ។ ក្នុងរយៈប៉ុន្មានខែចុងក្រោយនេះ លោកមិនបានបង្ហាញខ្លួនជាសាធារណៈ ហើយគេកាន់តែដឹងច្បាស់ថា លោករាងដូចជា មិនសូវចុះសម្រុងជាមួយនឹងបក្សកុម្មុយនីស្តចិន។
កាលពីខែតុលា ឆ្នាំ ២០២០ នៅឯសន្និសីទបច្ចេកវិទ្យាមួយ លោក Ma ធ្វើឱ្យអាជ្ញាធរអាក់អន់ស្រពន់ចិត្តដោយលោកបានរិះគន់និយតករចិនថា រារាំងការច្នៃប្រឌិតហើយនិយាយថា ធនាគាររដ្ឋធំៗគឺគ្រាន់តែជាហាងបញ្ចាំតែប៉ុណ្ណោះ។
ភ្លាមៗបន្ទាប់ពីពេលនោះមកអាជ្ញាធរបានកោះហៅលោក Ma ឱ្យទៅទីក្រុងប៉េកាំងសម្រាប់ការប្រជុំបន្ទាន់មួយហើយបន្ទាប់មកពួកគេបានដកផែនការចុះបញ្ជីដាក់លក់ភាគហ៊ុនក្រុមហ៊ុន Ant Group របស់លោកនៅទីផ្សារភាគហ៊ុនស៊ាងហៃ និងហុងកុង។ តាំងពីពេលនោះមកគេឈប់ឃើញលោក Ma នៅទីសាធារណៈទៀតទេ។
Alibaba បានបង្កើតសេវាកម្មមួយដែលមានឈ្មោះថា Alipay ដែលជាប្រព័ន្ធទូទាត់ប្រាក់តាមទូរស័ព្ទដោយប្រើកូដ QR។ Alipay ត្រូវបានប្រើសម្រាប់ប្រតិបត្តិការរាប់ពាន់លានហើយកំពុងធ្វើឱ្យគេចាប់ផ្ដើមឈប់ប្រើក្រដាសប្រាក់នៅក្នុងប្រទេសចិន។
កាលពីឆ្នាំ ២០១៤ Alipay បានបំបែកខ្លួនដើម្បីបង្កើតក្រុមហ៊ុនថ្មីមានឈ្មោះ Ant Group ដែលត្រូវបានគេរំពឹងថា នឹងធ្វើ IPO ធំជាងគេមុននឹងត្រូវបានរារាំងដោយនិយតករចិន។ Ant Group ដែលមានចំណូល ១៦ ពាន់លានក្នុង ១ ឆ្នាំ បានដណ្ដើមចំណែកទីផ្សារពីធនាគាររដ្ឋចិនតាមរយៈការផ្ដល់ផលិតផលវិនិយោគ និងផលិតផលប្រាក់កម្ចីដ៏ពេញហើយពេលខ្លះ Ant Group បានដើរតួជាអ្នកផ្ដល់ប្រាក់កម្ចីដល់ធនាគាររដ្ឋផងដែរ។ ការដណ្ដើមទីផ្សារពីធនាគាររដ្ឋបានធ្វើឱ្យនិយតករមួយចំនួនមានការព្រួយបារម្ភ។
កាលពីចុងខែធ្នូនិយតករចិនបាននិយាយថា ពួកគេកំពុងបើកការស៊ើបអង្កេតប្រឆាំងនឹងការធ្វើពាណិជ្ជកម្ម (Anti-Monopoly Probe) លើក្រុមហ៊ុន Alibaba ហើយនឹងសាកសួរមន្ត្រីក្រុមហ៊ុន Ant Group អំពីការអនុវត្តន៍គោលការណ៍ប្រកួតប្រជែង និងការពារអ្នកប្រើប្រាស់របស់ក្រុមហ៊ុន។
ក្រុមហ៊ុន Alibaba និង Ant Group គឺក្នុងចំណោមក្រុមហ៊ុនធំៗផ្សេងទៀតដូចជា Tencent និង Baidu ដែលស្ថិតក្រៅប្រព័ន្ធសហគ្រាសគ្រប់គ្រងដោយរដ្ឋ។ ក្រោមប្រធានាធិបតី Xi Jingping រដ្ឋាភិបាលបានព្យាយាមបង្កើតសារជាថ្មីនូវការគ្រប់គ្រងរបស់រដ្ឋលើសេដ្ឋកិច្ចដែលតាមពេលបង្កភាពតានតឹងជាមួយក្រុមហ៊ុនទាំងនេះ។
ភ្លាមៗបន្ទាប់ពីការរាយការណ៍ថា លោក Ma បានបាត់ខ្លួនមានពាក្យចចាមអារ៉ាមរីករាលដាលក្នុងប្រព័ន្ធសង្គមថា លោកត្រូវបានគេបំបាត់ខ្លួនជារាងរហូតនៅ «តំបន់ខ្មៅ» ដែលជាកន្លែងសម្រាប់ឃុំឃាំងបុគ្គលប្រឆាំងរដ្ឋាភិបាល។ តែអ្នកវិភាគបាននិយាយថា ពាក្យចចាមអារ៉ាមនេះគឺ មិនទំនងកើតឡើងនៅឡើយទេ។ សារព័ត៌មាន CNBC បានរាយការណ៍ថា លោកគឺមិនមែនបាត់ខ្លួនទេគ្រាន់តែមិនបញ្ចេញមុខជាសាធារណៈ។
អ្នកជំនាញមួយចំនួនគិតថា លោកអាចជាប់ឃុំនៅគេហដ្ឋានដ៏ប្រណីតរបស់លោកហើយកំពុងធ្វើការអប់រំឡើងវិញនូវ «មេរៀនម៉ាក្ស៍និយម» ជាមួយមន្ត្រីបក្សកុម្មុយនីស្តក្នុងដំណើរការមួយដែលគេហៅថា «ការទទួលយកការមើលពីលើ»។
អ្នកវិភាគខ្លះគិតថា រដ្ឋាភិបាលចិនអាចនឹងទាញយកការកាន់កាប់ ANT Group ពី Alibaba។
ក្នុងប៉ុន្មានឆ្នាំថ្មីៗនេះ ការបាត់ខ្លួនរបស់ជនជាតិចិនល្បីៗ ដែលមានជម្លោះជាមួយបក្សកុម្មុយនីស្តចិនបានកើនឡើងជាច្រើនលើកច្រើនសា។ ឧទាហរណ៍ ១ គឺការបាត់ខ្លួនរបស់តារាភាពយន្តដ៏ធំបំផុតរបស់ចិន Fan Bingbing កាលពីឆ្នាំ ២០១៨ ដែលបាត់មុខពីសាធារណៈជាច្រើនខែ។ ក្រោយមកនាងបានធ្វើការសារភាពពីបទគេចពន្ធ និងធ្វើការសុំទោសទៅកាន់បក្សកុម្មុយនីស្តនៅលើទំព័របណ្ដាញសង្គមរបស់នាង ហើយតាមសេចក្ដីរាយការណ៍បានធ្វើការសងពន្ធយ៉ាងហោចណាស់ ៧០ លានដុល្លារ៕