The Phnom Penh Post Search

Search form




Logo of Phnom Penh Post newspaper Phnom Penh Post - តើ​ម៉ាឡេស៊ីគួរ​បិទប្រទេស​ទាំង​ស្រុងដូច​កាល​ពីឆ្នាំ​មុន​ដែរទេ ខណៈ​ករណី​កូវីដ ១៩​ កើន​ខ្លាំង?​

តើ​ម៉ាឡេស៊ីគួរ​បិទប្រទេស​ទាំង​ស្រុងដូច​កាល​ពីឆ្នាំ​មុន​ដែរទេ ខណៈ​ករណី​កូវីដ ១៩​ កើន​ខ្លាំង?​

Content image - Phnom Penh Post
លោកនាយករដ្ឋមន្ត្រីម៉ាឡេស៊ី Muhyiddin Yassin។ AFP

តើ​ម៉ាឡេស៊ីគួរ​បិទប្រទេស​ទាំង​ស្រុងដូច​កាល​ពីឆ្នាំ​មុន​ដែរទេ ខណៈ​ករណី​កូវីដ ១៩​ កើន​ខ្លាំង?​

តើប្រទេសម៉ាឡេស៊ី គួរតែ​បិទប្រទេស​ទាំង​ស្រុង​ទេ ដើម្បី​ការពារការរីករាល​ដាល​ទូទាំង​ប្រទេស​? នេះគឺ​ជា​សំណួរ​មួយ​ ដែល​មនុស្ស​ភាគ​ច្រើន​ហាក់​កំពុង​ដេញ​ដោល​ពិភាក្សា​ថា​ តើគួរគិត​ពី​​សេដ្ឋ​កិច្ច​ឬ​ សុខ​សុវត្ថិភាព​ប្រ​ជា​ជន​​សំខាន់​ជាង​?

ថ្លែងនៅក្នុងបទសម្ភាសចាក់ផ្សាយដោយទូរទស្សន៍ RTM និងទូរទស្សន៍ Bernama កាលពីថ្ងៃអាទិត្យ ​សប្ដាហ៍​មុន នាយករដ្ឋមន្រ្តីម៉ា​ឡេស៊ី លោក Muhyiddin Yassin បាននិយាយថា​ ការ​បិទ​ខ្ទប់​ប្រទេស​ទាំង​ស្រុង​លើគ្រប់វិស័យ​ដូច​កាល​ពីឆ្នាំមុន ​នឹង​ធានា​បាន​សុវត្ថិភាព​ដល់​ប្រជាជន​ ប៉ុន្តែ​វា​មាន​ហានិភ័យ​ដល់សេដ្ឋ​កិច្ច​ឈាន​ដល់​ការ​​ដួលរលំ​ផងដែរ​។

លោកក៏​បាន​​អំពាវនាវ​ឱ្យមានការរឹតត្បិតជាងមុន​ទាក់​ទិន​នឹង​បទបញ្ជា​ត្រួតពិនិត្យ​ការ​ធ្វើ​ដំណើ​រ​ (MCO)​នាពេល​បច្ចុប្បន្ន​ដើម្បី​ឱ្យត្រូវ​នឹងអ្វី​ ដែលរដ្ឋា​ភិបាល​បាន​បញ្ជា​ឱ្យ​​ធ្វើនៅចន្លោះខែមីនា និងឧសភាឆ្នាំមុន​។​

លោក​បាន​មានប្រសាសន៍ថា​៖ «​យើងអាច​បិទខ្ទប់​ប្រទេស​ទាំង​មូល​បិទរោងចក្រ ហើយ​នាំ​គ្នា​នៅផ្ទះ​ ដូច​កាលពីឆ្នាំ​មុន​ ដើម្បី​ធានាសុវត្ថិភាព។ វាងាយស្រួល​សម្រាប់រដ្ឋាភិបាល​ និង​ក្រសួងសុខាភិបាល​ក្នុង​ការ​ធានា​បាន​នូវ​សុវត្ថិភាព​របស់​ប្រជាជន​យើង​»។

ពេល​នោះ​សេដ្ឋកិច្ច​ស្ទើរតែដួលរលំ​ដោយ​ប្រទេសនេះបានខាតបង់ប្រាក់​ប្រមាណ ៥៧៩ លានដុល្លារ​ ក្នុង ១ ថ្ងៃ។ រដ្ឋាភិបាលក៏​បាន​ចេញនូវ​កញ្ចប់​ជំនួយសេដ្ឋកិច្ចប្រមាណ​​ ៨២ ពាន់​លាន​ដុល្លារ​ ដើម្បី​ជួយ​ទប់​ទល់​ដល់​វិបត្តិ​សេដ្ឋកិច្ច​។

ប្រភពដដែល​បាន​បន្ថែម​ថា៖ «ប្រសិនបើយើង បិទខ្ទប់​ម្ដងទៀ​ត​ (ហើយ​ផ្តល់​ជំនួយ​សេដ្ឋកិច្ច) យើង​នឹង​ត្រូវ​ការ​ថវិកាបន្ថែមទៀត។ ៨២ ពាន់​លាន​ដុល្លារ​ហ្នឹង​ មិនគ្រប់គ្រាន់ទេ ព្រោះ​យើង​នឹង​ត្រូវ​ការកញ្ចប់​ជំនួយ​សេដ្ឋ​កិច្ច​ប្រមាណ ១២០ ពាន់​លាន​ដុល្លារ​បន្ថែម​ទៀត​ ដើម្បីទប់​ទល់។ តែ​សួរ​ថា​ យើង​មាន​លុយ​ហ្នឹង​មក​ពីណា​?»

លោក​បាន​បន្តថា​៖ «អ៊ិ​ចឹង​​ហើយ​ បាន​យើងធ្លាប់​សិក្សាកាលពីឆ្នាំមុន​មក​ហើយ​ ថា​យើង​មិន​អាច​បិទ​សេដ្ឋកិច្ច​បានទេ។ យើង​ត្រូវ​តែថ្លឹ​ង​ថ្លែងជីវិត​ប្រជាជន​ និងសេដ្ឋកិច្ច​ប្រទេស​... ខ្ញុំគិតថា​ ជីវិតប្រជាជន​ គឺសំខាន់ណាស់​ ព្រោះ​ខ្ញុំ​មិន​ចង់​ឱ្យ​ពល​រដ្ឋ​ណាមួយ​ស្លាប់ដោយសារការធ្វេសប្រហែស​របស់យើងទេ​។ ប៉ុន្តែខ្ញុំក៏មិនចង់ឱ្យសេដ្ឋកិច្ច​របស់​យើង​ដួល​រលំ​ដល់ចំណុចមួយដែល​ប្រជាជ​នគ្មានប្រាក់​សម្រាប់​បរិភោគ​ដែ​​រ​»។

នៅសប្តាហ៍ទី ២០ នៃ​យុទ្ធនា​ការ​ធ្វើ​តេស្ត​រក​ករណី​វិជ្ជមាន​នៃ​ជំងឺ​កូវីដ ១៩ កាលពី​ថ្ងៃទី ១៦ ដល់ ២២ ឧសភា ​មនុស្សសរុប ៦៥ ម៉ឺន​នាក់ ត្រូវបានគេយក​មក​ធ្វើ​តេស្ត​​។ ក្នុង​នោះ​គេសង្កេត​ឃើញ​មានការ​កើន​ឡើង​ករណី​ឆ្លង​ ៤១%​ ច្រើន​ជាង​សប្ដាហ៍​មុន​ដែល​ធ្វើ​ឱ្យ​ករណី​ឆ្លង​សរុប​នៅប្រទេស​នេះ កើន​ឡើង​ប្រមាណ​ ​៥០ ម៉ឺន​នាក់។

បើទោះជា​ចំនួន​ករណី​ឆ្លង​កើន​ឡើង​ខ្លាំង​យ៉ាងណាក្ដី អ្នក​ជំនាញ​​ជាច្រើននាក់បាន​ប្រាប់គេហទំព័រ​ Code Blue ថា ចំនួន​នេះ​នៅ​មិនទាន់​ច្រើន​ខ្លាំង​​បំផុត​នៅ​ឡើយ​ទេ​ ដោយសារ​ការ​រក​ឃើញ​នៃ​ចំនួន​ករណី​កូវីដ​ កើន​ឡើង​ខ្លាំងពី​ ១ ថ្ងៃ​ទៅ ១ ថ្ងៃ សបញ្ជាក់​ឱ្យ​ឃើញ​ថា ដំណើរ​ការ​នៃ​ការ​តេស្ត​ស្វែង​រក​ជំងឺ​កូវីដ ១៩​ នៅ​មាន​កម្រិត​ ដែល​មិន​ទាន់​គ្រប​ដណ្ដប់​សហគមន៍ទាំង​មូលនៅឡើយ។

ដោយសារ​មាន​ការ​ធុញ​ទ្រាន់​នឹង​ករណី​ឆ្លង​ច្រើន​ឥត​ល្ហែ ប្រជាជនម៉ាឡេស៊ី​ភាគច្រើន​បាន​ប្រើប្រាស់​បណ្ដាញ​សង្គម​ជា​ការ​ជជែក​វែក​ញែកពី​​គុណសម្បត្តិ​នៃ​ការ​បិទ​ប្រទេស​ទាំង​មូល​។ ប្រជាជន​ខ្លះ ក៏​បាន​ប្រើប្រាស់​ ឆានែលផ្លូ​វការ​របស់ក្រសួងសុខាភិបាល (KKM) ដើម្បី​ស្នើ​ឱ្យ​រដ្ឋា​ភិបាល​មាន​ការ​បិទខ្ទប់​ប្រទេសទាំង​មូល​ផងដែរ​។

សមាគមក្រុមហ៊ុន​អាជីវកម្មប្រទេសម៉ាឡេស៊ី បាន​សម្ដែង​ការព្រួយ​បារម្ភ​ថា ការ​បិទខ្ទប់​ប្រទេស​ទាំង​មូល​អាច​នឹង​ធ្វើ​ឱ្យ​អាជីវកម្ម​ក្នុង​ប្រទេស​ទាំង​មូល​ប្រឈម​នឹង​គ្រោះ​ថ្នាក់ធំធេង​។ ដូច្នេះ ការ​ប្រតិបត្តិ​តាម​នីតិវិធី​ស្តង់​ដា (SOPs)​ និង​ការពន្លឿន​ការចាក់​វ៉ាក់សាំង​គួរតែ​ជាអាទិភាពកំពូលដើម្បី​ទប់ស្កាត់ការ​រីករាល​ដាល​នៃ​ជំងឺ​​កូវី​ដ ១៩ ជាជាង​ការ​បិទប្រទេស​ទាំង​មូល​។

លោក Tan Cheng Kiat ប្រធានក្រុមប្រឹក្សាសភាពាណិជ្ជកម្ម​ និងឧស្សាហកម្មអន្តរជាតិ​ម៉ាឡេស៊ី​បាន​មាន​ប្រសាសន៍ថា​៖ «ប្រទេសនេះមិន​អាច​បន្តអនុវត្ត​ស្ដង់​ដារ​ SOPs សុខៗ​ ហើយ​ដាក់​ចេញ​នូវ​គោល​ការណ៍​​ថ្មី​​ភ្លាម​ៗ​ គាក​មួយ​សប្ដាហ៍​ ពីរ​បាន​នោះទេ​​។ ភាពមិនប្រាកដប្រជាបានធ្វើ​ឱ្យ​ក្រុម​ហ៊ុន​អាជីវកម្មដួល​រលំ​បាន​»។

លោក Tan ក៏​បាននិយាយអំពី ​បទពិសោធនិងមេរៀន​ពី​ការ​ដាក់​ចេញ​បទ​​បញ្ជា​​​ត្រួតពិនិត្យ​ការ​ធ្វើ​ដំណើ​រ (MCO) កាលពីឆ្នាំមុន​ដែល​បំផ្លិច​បំផ្លាញ​សេដ្ឋកិច្ច​ ​ស្ទើរតែមិនអាចស្រោចស្រង់​វិញ​​បាន។

លោក​បាន​បន្ថែម​ថា​៖ «ស្ដង់​ដាSOPs មិនច្បាស់លាស់​និ​ងការអនុវត្តតាមអំពើចិត្ត អាច​ធ្វើឱ្យ​ខូច​ខាត​សេដ្ឋកិច្ច​បាន​។ អាជីវកម្ម​មិនមាន​កុងតាក់​បិទ​បើក​ងាយៗទេ​។ ​​ការពិគ្រោះយោបល់​ជាមួយ​ឧស្សាហកម្ម​ គឺ​ជាមូលដ្ឋានគ្រឹះ​ធំបំផុត​សម្រាប់​​ក្រុម​ហ៊ុន​អាជីវកម្ម​ទាំងអស់»។

យ៉ាងណាមិញ ការស្ទង់មតិមួយដែលធ្វើឡើងដោយសមាគមសហគ្រាស​ធុនតូច​ និង​មធ្យម​ម៉ាឡេស៊ី​ស្ដី​ពី​ផល​ប៉ះពាល់​នៃបទ​​បញ្ជា​​​ត្រួតពិនិត្យ​ការ​ធ្វើ​ដំណើ​រ (MCO) លើក​ទី ៣ បាន​បង្ហាញ​ថាសហគ្រាសចំនួន ៩ ក្នុងចំណោម​សហគ្រាសធុនតូចនិងមធ្យមចំនួន ១០ ត្រូវប្រឈម​នឹង​ការ​បាត់​បង់​ចំណូល​ និង​រង​ផល​ប៉ះពាល់​​ដោយការបិទទ្វារជិត ៤០ ភាគរយ នឹង​ត្រូវ​បាន​គេ​រំពឹងថានឹងមានការកើន​ឡើង​ដល់​​ ៥០​ ក្នុងឆ្នាំ​នេះ​​៕

អត្ថបទគួរចាប់អារម្មណ៍