ប្រធានាធិបតីសហរដ្ឋអាមេរិកលោក Joe Biden បានចូលកាន់តំណែងកាលពីថ្ងៃទី ២០ មករា ដែលប៉ុន្មានម៉ោងក្រោយមកព្រឹទ្ធសភាអាមេរិកបានចាប់ផ្ដើមសម្ភាសបេក្ខជនណែនាំតែងតាំងដោយលោក Biden ដើម្បីបំពេញតំណែងសំខាន់ៗនៃគណៈរដ្ឋមន្ត្រីរបស់លោក។
ប៉ុន្តែការបញ្ជាក់ការតែងតាំងគណៈរដ្ឋមន្ត្រីរបស់លោក Biden គឺមានលក្ខណៈយឺតយ៉ាវជាងការបញ្ជាក់គណៈរដ្ឋមន្ត្រីមុនៗ។ អតីតប្រធានាធិបតីលោក Donald Trump មានរដ្ឋមន្ត្រីចំនួន ២ រូប ត្រូវបានបញ្ជាក់ដោយព្រឹទ្ធសភានៅថ្ងៃលោកចូលកាន់អំណាច រីឯអតីតប្រធានាធិបតីលោក Barrack Obama វិញមានរដ្ឋមន្ត្រីចំនួន ៦ រូបត្រូវបានបញ្ជាក់នៅថ្ងៃលោកចូលកាន់អំណាច។
ខណៈលោក Biden រង់ចាំការបញ្ជាក់ដោយព្រឹទ្ធសភាលោកបានប្រកាសឱ្យមន្ត្រីស្ដីទីដឹកនាំក្រសួងទាំងនេះជាបណ្ដោះអាសន្ន។
ប្រសិនបើការតែងតាំងទាំងអស់របស់លោក Biden ត្រូវបានបញ្ជាក់ទាំងអស់ នោះគណៈរដ្ឋមន្ត្រីរបស់លោកនឹងមានស្ត្រី និងមនុស្សមានពណ៌សម្បុរ និងប្រវត្តិចម្រុះជាងគេក្នុងចំណោមគណៈរដ្ឋមន្ត្រីដទៃទៀតនៅក្នុងប្រវត្តិសាស្ត្រសហរដ្ឋអាមេរិក។
ខាងក្រោម គឺជាបេក្ខជនរដ្ឋមន្ត្រីដឹកនាំក្រសួងទាំង ១៥ និងបេក្ខជនមន្ត្រីឋានៈស្មើរដ្ឋមន្ត្រីចំនួន ៦ របស់គណៈរដ្ឋមន្ត្រីលោក Biden៖
១. លោក Anthony Blinken ជារដ្ឋមន្ត្រីក្រសួងការបរទេស
លោក Antony Blinken ធ្លាប់ដើរតួជាអនុរដ្ឋមន្ត្រីការបរទេស និងជាទីប្រឹក្សាសន្តិសុខជាតិរបស់លោក Obama។ មុននឹងកាន់តំណែងទាំង ២ នេះ លោក Bliken គឺទីប្រឹក្សាសន្តិសុខជាតិរបស់អនុប្រធានាធិបតី Biden។ លោក Blinken ក៏ជាទីប្រឹក្សាជំនិតរបស់លោក Biden កាលពីលោកដើរតួជាអ្នកដើរតួជាប្រធានគណៈកម្មាធិការទំនាក់ទំនងបរទេសព្រឹទ្ធសភា។
រដ្ឋមន្ត្រីក្រសួងការបរទេសមានតួនាទីដឹកនាំគោលនយោបាយការបរទេស និងការទូតសម្រាប់ប្រធានាធិបតីនៅជុំវិញពិភពលោក។
២. លោកស្រី Janet Yellen ជារដ្ឋមន្ត្រីក្រសួងរតនាគារ
លោកស្រី Janet Yellen គឺជាប្រធានធនាគារជាតិអាមេរិកពី ឆ្នាំ ២០១៤ ដល់ ២០១៨។ លោកស្រីក៏ធ្លាប់ជាប្រធានក្រុមប្រឹក្សាសេដ្ឋកិច្ចនៃសេតវិមានក្នុងអំឡុងរដ្ឋបាលលោក Clinton ផងដែរ។ លោកស្រី Yellen គឺជាស្ត្រីដំបូងគេដែលគ្រប់គ្រងធនាគារជាតិអាមេរិក ហើយប្រសិនបើត្រូវបានបញ្ជាក់ នឹងក្លាយជាស្ត្រីដំបូងដែលគ្រប់គ្រងក្រសួងរតនាគារ។
រដ្ឋមន្ត្រីក្រសួងរតនាគារមានតួនាទី ដឹកនាំ និងផ្ដល់យោបល់ លើគោលនយោបាយសេដ្ឋកិច្ច និងប្រព័ន្ធហិរញ្ញវត្ថុ។
៣. លោក Lloyd Austinជារដ្ឋមន្ត្រីក្រសួងការពារជាតិ
លោក Lloyd Austin គឺជាអតីតឧត្ដមសេនីយ៍ផ្កាយបួនរបស់កងទ័ពសហរដ្ឋអាមេរិកដែលបានបម្រើការក្នុងយោធាអស់រយៈពេល ៤១ ឆ្នាំ។ ពីឆ្នាំ ២០១៣ ដល់ ២០១៦ លោកបានដឹកនាំបញ្ជាការដ្ឋានតំបន់កណ្ដាល (មជ្ឈិមបូព៌ា)។ កាលពីថ្ងៃទី ២២ មករា លោកត្រូវបានព្រឹទ្ធសភាបញ្ជាក់ការតែងតាំងតំណែងនេះធ្វើឱ្យលោកក្លាយជាជនជាតិអាហ្វ្រិកដំបូងគេដែលដឹកនាំក្រសួងការពារជាតិអាមេរិក។
រដ្ឋមន្ត្រីក្រសួងការពារជាតិមានតួនាទីផ្ដល់យោបល់ជូនប្រធានាធិបតីអំពីគោលនយោបាយការពារជាតិ ហើយដឹកនាំ និងត្រួតពិនិត្យកងយោធាសហរដ្ឋអាមេរិក។
៤. លោក Alejandro Mayorkasជារដ្ឋមន្ត្រីក្រសួងមាតុភូមិជាតិ
លោក Alejandro Mayorkas គឺជាអនុរដ្ឋមន្ត្រីក្រសួងមាតុភូមិជាតិនៅអាណត្តិទី២ របស់លោក Obama ដោយកាលពីអាណត្តិទី១ លោកដើរតួជានាយកសេវាសញ្ជាតិ និងអន្តោប្រវេសន៍សហរដ្ឋអាមេរិក។
រដ្ឋមន្ត្រីក្រសួងមាតុភូមិជាតិមានតួនាទីផ្តល់យោបល់ដល់ប្រធានាធិបតីអំពីបញ្ហាសន្តិសុខនៅសហរដ្ឋអាមេរិក។ ទទួលបន្ទុកបញ្ហាអន្តោប្រវេសន៍ និងបញ្ហាទាក់ទងនឹងព្រំដែន ឆ្មាំសមុទ្រ ទីភ្នាក់ងារគ្រប់គ្រងភាពអាសន្នការប្រឆាំងភេរវកម្ម សន្តិសុខអាកាសចរណ៍ និងសន្តិសុខតាមអ៊ីនធឺណិត។
៥. លោក Merrick Garlen ជាអគ្គរដ្ឋអាជ្ញាក្រសួងយុត្តិធម៌
លោក Merrick Garlen គឺជាអតីតប្រធានតុលាការឧទ្ធរណ៍ រដ្ឋធានីវ៉ាស៊ីនតោន។ កាលពីឆ្នាំ ២០១៦ លោកត្រូវបានលោក Obama ណែនាំឱ្យតែងតាំងជាចៅក្រមតុលាការកំពូល តែមិនជោគជ័យដោយសារបក្សសាធារណរដ្ឋរង់ចាំដល់ការបោះឆ្នោតរួច ហើយតែងតាំងបេក្ខជនរបស់លោក Trump វិញ។
អគ្គរដ្ឋអាជ្ញាមានតួនាទីជាមន្ត្រីអនុវត្តច្បាប់កំពូល និងជាអ្នកផ្តល់យោបល់ដល់សេតវិមានលើបញ្ហាច្បាប់ និងតុលាការ។
៦. លោកស្រី Deb Haaland ជារដ្ឋមន្ត្រីក្រសួងមហាផ្ទៃ
លោកស្រី Deb Haaland ជាអតីតសមាជិកសភាតំណាង។
រដ្ឋមន្ត្រីក្រសួងមហាផ្ទៃមានតួនាទីត្រួតត្រាដីសាធារណៈ និងធនធានធម្មជាតិការិយាល័យកិច្ចការឥណ្ឌាស្បែកក្រហម សេវាកម្មឧទ្យានជាតិ និងសេវាកម្មត្រី និងសត្វព្រៃ។
៧. លោក Tom Wilsack ជារដ្ឋមន្ត្រីក្រសួងកសិកម្ម
លោក Tom Vilsack ដែលជាអតីតអភិបាលរដ្ឋ Iowa គឺជាអតីតរដ្ឋមន្ត្រីក្រសួងកសិកម្មរបស់លោក Obama។
រដ្ឋមន្ត្រីក្រសួងកសិកម្មមានតួនាទីផ្ដល់យោបល់លើបញ្ហាផលិតកម្មស្បៀង និងកសិកម្ម ហើយត្រួតពិនិត្យកម្មវិធីជំនួយស្បៀងអាហារ។
៨. លោកស្រី Gina Raimondo ជារដ្ឋមន្ត្រីក្រសួងពាណិជ្ជកម្ម Gina Raimondo ជាអភិបាលរដ្ឋ Rhode Island
រដ្ឋមន្ត្រីក្រសួងពាណិជ្ជកម្មមានតួនាទីផ្តល់យោបល់លើគោលនយោបាយពាណិជ្ជកម្ម និងប្រមូលទិន្នន័យសេដ្ឋកិច្ច។
៩. លោក Marty Walsh ជារដ្ឋមន្ត្រីក្រសួងការងារ
លោក Marty Walsh កំពុងបំពេញអាណត្តិទី២ របស់លោកជាអភិបាលក្រុង Boston។
រដ្ឋមន្ត្រីក្រសួងការងារមានតួនាទីផ្តល់យោបល់លើប្រាក់ឈ្នួលនៅកន្លែងធ្វើការ និងគោលនយោបាយសុវត្ថិភាព។
១០. លោក Xavier Becerraជារដ្ឋមន្ត្រីក្រសួងសុខាភិបាល និងសេវាមនុស្ស
លោក Xavier Becerra គឺជាអគ្គរដ្ឋអាជ្ញារបស់រដ្ឋ California និងជាអតីតសមាជិកសភាតំណាង។
រដ្ឋមន្ត្រីក្រសួងសុខាភិបាល និងសេវាមនុស្សមានតួនាទីផ្តល់យោបល់លើគោលនយោបាយសុខភាព។ ត្រួតត្រាមជ្ឈមណ្ឌលគ្រប់គ្រង និងបង្ការជំងឺ សេវាកម្ម Medicare និង Medicaid រដ្ឋបាលចំណីអាហារ និងឱសថ និងវិទ្យាស្ថានសុខភាពជាតិ។
១១. លោកស្រី Marcia Fudge ជារដ្ឋមន្ត្រីក្រសួងលំនៅឋាន និងនគរូបនីយកម្ម
លោកស្រី Marcia Fudge គឺជាសមាជិកសភាតំណាងតាំងពីឆ្នាំ ២០០៨។ ផ្ដល់យោបល់លើគោលនយោបាយលំនៅឋានដោយផ្ដោតលើការកែលម្អលទ្ធភាពទិញយកលំនៅឋានក្នុងតម្លៃទាប។ មើលពីលើកម្មវិធីធានារ៉ាប់រងលើប្រាក់កម្ចីអចលនទ្រព្យ តាមរយៈរដ្ឋបាលលំនៅឋាន។
១២. លោក Pete But tigieg ជារដ្ឋមន្ត្រីក្រសួងដឹកជញ្ជូន
លោក Pete Buttigieg ជាអភិបាលក្រុង South Bend ពីឆ្នាំ ២០១២ ដល់ឆ្នាំ ២០២០។ នៅឆ្នាំ ២០២០ លោកបានឈរឈ្មោះបោះឆ្នោតប្រធានាធិបតី តែដកមកគាំទ្រលោក Biden វិញ។ លោកគឺជាមន្ត្រីស៊ើបការណ៍សម្ងាត់ម្នាក់នៅក្នុងកងទ័ពជើងទឹកសហរដ្ឋអាមេរិក ហើយត្រូវបានបញ្ជូនទៅអាហ្វហ្គានីស្ថានក្នុងឆ្នាំ ២០១៤។
រដ្ឋមន្ត្រីក្រសួងដឹកជញ្ជូនមានតួនាទីផ្ដល់យោបល់លើគោលនយោបាយដឹកជញ្ជូន។ ត្រួតពិនិត្យអាកាសចរណ៍ ផ្លូវថ្នល់ ផ្លូវដែក បំពង់បង្ហូរប្រេង និងមធ្យោបាយដឹកជញ្ជូនផ្សេងទៀត។
១៣. លោកស្រី Jennifer Granholm ជារដ្ឋមន្ត្រីក្រសួងថាមពល
លោកស្រី Jennifer Granholm ជាអភិបាលរដ្ឋ Michigan ពីឆ្នាំ ២០០៣ ដល់ ២០១១។
រដ្ឋមន្ត្រីក្រសួងថាមពលមានតួនាទីផ្ដល់យោបល់លើគោលនយោបាយថាមពល។ ត្រួតត្រាឃ្លាំងស្តុកអាវុធនុយក្លេអ៊ែរ។
១៤. លោក Miguel Cardona ជារដ្ឋមន្ត្រីក្រសួងអប់រំ
លោក Miguel Cardona ធ្លាប់បានធ្វើជា គឺជាប្រធានមន្ទីរអប់រំនៃរដ្ឋ Connecticut តាំងពីខែសីហា ឆ្នាំ ២០១៩។
រដ្ឋមន្ត្រីក្រសួងអប់រំមានតួនាទីផ្ដល់យោបល់លើគោលនយោបាយអប់រំ។ មើលពីលើកម្មវិធីជំនួយហិរញ្ញវត្ថុសម្រាប់និស្សិត។
១៥. លោក Denis McDonough ជារដ្ឋមន្ត្រីក្រសួងកិច្ចការអតីតយុទ្ធជន
លោក Denis McDonough គឺជានាយកខុទ្ទកាល័យរបស់លោក Obama ពីឆ្នាំ ២០១៣ ដល់ឆ្នាំ ២០១៧ ហើយពីមុនជាទីប្រឹក្សាសន្តិសុខជាតិដ៏សំខាន់របស់លោក Obama។
រដ្ឋមន្ត្រីក្រសួងកិច្ចការអតីតយុទ្ធជនមានតួនាទីផ្តល់យោបល់លើសេវាកម្មរបស់រដ្ឋាភិបាលសម្រាប់អតីតយុទ្ធជនដែលរួមមានការថែរក្សាសុខភាព និងអត្ថប្រយោជន៍ហិរញ្ញវត្ថុ និងការអប់រំ៕