.jpg)
ក្រុមជនចំណាកស្រុក នាំគ្នាឡើងលើនាវា MS GNV Azzurra ដែលអាជ្ញាធរអុីតាលី បញ្ជូនទៅកាន់កោះ Lampedusa ដើម្បីធ្វើចត្តាឡីស័ក។ AFP
ក្រុងរ៉ូម៖ តំបន់មួយចំនួននៅប្រទេសអ៊ីតាលី បានចាប់ផ្តើមចេញបញ្ជាឲ្យដាក់មនុស្សនៅដាច់ដោយឡែកពីគេថ្មីមួយទៀត ដែលបានវិលត្រឡប់ពីក្រុមប្រទេសអឺរ៉ុបដ៏គ្រោះថ្នាក់ដោយសារវីរុសកូរ៉ូណាក្នុងកម្រិតខ្ពស់ ដូចជា ប្រទេសអេស្ប៉ាញ និងក្រិក នៅក្នុងការព្យាយាមមួយ ដើម្បីទប់ស្កាត់ការផ្ទុះចុងក្រោយបំផុត នៃការឆ្លងវីរុសផ្លូវដង្ហើមកូរ៉ូណាប្រភេទថ្មីដ៏ចម្លែកមួយនេះ។
អាជ្ញាធរសុខាភិបាលបានព្រួយបារម្ភថា ប្រជាជនអ៊ីតាលីបានវិលត្រឡប់ពីវិស្សមកាលនៅក្រៅប្រទេសអាចនឹងនាំយកវីរុសផ្លូវដង្ហើមកូរ៉ូណាចូលផ្ទះ និងកំពុងដើរលេងកម្សាន្ត នៅអំឡុងពេលរដូវក្ដៅ នៅពេលមនុស្សម្នាកំពុងជួបជុំគ្នានៅខាងក្រៅផ្ទះ នៅតាមឆ្នេរសមុទ្រ នៅកន្លែងពិធីបុណ្យ ឬកន្លែងជប់លៀងផ្សេងៗជាច្រើនទៀត។
ខណៈរដ្ឋាភិបាលជាតិបានសិក្សាថា តើត្រូវដាក់ការរឹតត្បិតឡើងវិញ ប្រឆាំងជំងឺកូវីដ ១៩ ឲ្យបានខ្លាំងក្លាបន្ថែមទៀត ដូចជាការបង្កើនឲ្យមានការពាក់ម៉ាស់ជាចាំបាច់នៅតាមទីសាធារណៈ និងតំបន់មួយចំនួនបានកំពុងទប់ស្កាត់រួចរាល់ហើយនោះ។
ប្រធានតំបន់ Emilia Romagna កាលពីថ្ងៃពុធ ត្រូវបានគេរំពឹងថា នឹងចុះហត្ថលេខាចេញបញ្ជាមួយឲ្យធ្វើតេស្តរកវីរុសផ្លូវដង្ហើមកូរ៉ូណា ចំពោះអ្នកណាម្នាក់ដែលបានវិលត្រឡប់មកពីប្រទេសអេស្ប៉ាញ ក្រិក និងប្រទេសម៉ាល់ត៍ និងប្រទេសទាំងអស់នៅក្នុងតំបន់ Schengen ជាទីកន្លែងដែលជនជាតិអ៊ីតាលី មិនត្រូវបានគេរឹតត្បិតនោះ។
ក្រុមអ្នកមកពីប្រទេសក្រូអាស៊ី ក៏នឹងត្រូវចេញបញ្ជាឲ្យដាក់នៅដាច់ដោយឡែកពីគេផងដែរ។
ការចេញបញ្ជាឲ្យដាក់នៅដាច់ដោយឡែកពីគេរយៈពេល ១៤ ថ្ងៃ ក៏បានចាប់ផ្តើមកាលពីថ្ងៃពុធនៅក្នុងតំបន់ Puglia និង Campania ភាគខាងត្បូង សម្រាប់អ្នកបានវិលត្រឡប់មកពីប្រទេសអេស្ប៉ាញ ក្រិក និងប្រទេសម៉ាល់ត៍។
ប្រធានតំបន់ Puglia គឺលោក មីឆែលលី អ៊ីមីលៀណូ បានថ្លែងថា៖ «នៅក្នុងរយៈពេល ២ ថ្ងៃចុងក្រោយ យើងបានកត់ត្រាករណីឆ្លងយ៉ាងច្រើននៅតំបន់ Puglia ដែលបានធ្វើតេស្តរកឃើញមានផ្ទុកវីរុសផ្លូវដង្ហើមកូរ៉ូណា ក្រោយពីពួកគេបានវិលត្រឡប់មកពីប្រទេសក្រិក ម៉ាល់ត៍ អេស្ប៉ាញ ជាក្រុមប្រទេសដែលមានការឆ្លងរាលដាល ជំងឺកូវីដ ១៩ កម្រិតខ្ពស់មួយ»។
មនុស្សជាង ២៥១ ០០០ នាក់ បានឆ្លងដោយសារវីរុសផ្លូវដង្ហើមកូរ៉ូណា ហើយមនុស្សជាង ៣៥ ០០០ នាក់បានស្លាប់ នៅក្នុងប្រទេសអ៊ីតាលី ជាប្រទេសអឺរ៉ុបដំបូងដែលបានរងការវាយប្រហារដោយសារការឆ្លងរាលដាលជំងឺកូវីដ ១៩៕ AFP/SK
