ក្រុងវ៉ាស៊ីនតោនៈ ប្រធានាធិបតីអាមេរិកលោកដូណាល់ត្រាំ ថ្លែងកាល ពីថ្ងៃអង្គារ ទី ១៧ កក្កដាថា វាគ្មាន អ្វីត្រូវប្រញាប់ ប្រញាល់ធ្វើការលុប បំបាត់អាវុធនុយក្លេអ៊ែររបស់កូរ៉េខាងជើងតាមកិច្ច ព្រម ព្រៀងរបស់ លោកជាមួយលោក គីម ជុងអ៊ុននោះ ទេ។ នេះគឺជាការ កែ ប្រែ ពាក្យសម្ដីដែលថ្នាក់ ដឹកនាំអាមេរិកបានថ្លែងកាលពីដំបូងថា ដំណើរការនៃការលុបបំបាត់អាវុធនុយក្លេអ៊ែរ នឹងចាប់ផ្ដើមនាពេលឆាប់ៗនោះ។
លោកត្រាំ បានថ្លែងប្រាប់ក្រុមអ្នកកាសែតថា៖ «កិច្ចពិភាក្សា កំពុងតែដំណើរការទៅមុខហើយដំណើរការយ៉ាងល្អទៀតផង»។ «យើងគ្មានពេលវេលាកំណត់ ហើយយើងក៏គ្មានល្បឿនកំណត់នោះដែរ»។
លោកត្រាំ បានថ្លែងថាលោកបានលើកយករឿងកូរ៉េខាងជើងមកពិភាក្សាជាមួយលោកប្រធានាធិបតីរុស្ស៊ី ពូទីន កាលពីថ្ងៃចន្ទនៅក្នុងជំនួបនៅក្នុងក្រុងហែលស៊ីនគី។
លោកត្រាំ បានថ្លែងថា៖ «លោកប្រធានាធិបតីពូទីន នឹងចូលរួមជួយដោះស្រាយដែលក្នុងន័យនេះ លោកប្រធានាធិបតីពូទីន គឺគាំទ្រជំហររបស់យើង»។
លោកប្រធានាធិបតីអាមេរិកមកពីគណបក្សសាធារណរដ្ឋរូបនេះ បានជួបជាមួយលោកគីម ជុងអ៊ុនកាលពីថ្ងៃទី ១២ ខែ មិថុនាក្នុងកិច្ចប្រជុំជាប្រវត្តិសាស្ត្រនៅក្នុងប្រទេសសិង្ហបុរីដែលក្នុងអំឡុងពេលនោះ មេដឹកនាំវ័យក្មេងកូរ៉េខាងជើងបានសន្យាថា លោកនឹងធ្វើការលុបបំបាត់អាវុធនុយក្លេអ៊ែររបស់ប្រទេសលោក។
ប៉ុន្តែកិច្ចព្រមព្រៀងនោះ មិនបានបញ្ជាក់អំពីកាលវិភាគសម្រាប់ដំណើរការលុបបំបាត់អាវុធនុយក្លេអ៊ែរទេ ឬបញ្ជាក់អំពីរបៀបរបបក្នុងការអនុវត្ត នូវដំណើរការនោះដែរ។
ជាងមួយខែកន្លងទៅនេះ គេមិនទាន់បានឃើញមានការរីកចម្រើនណាមួយ ជាដុំកំភួននៅឡើយទេ៕