ក្រុងសេអ៊ូល: ការិយាល័យ ប្រធានាធិបតីរបស់ក្រុង សេអ៊ូល បានឲ្យដឹងថា ប្រធានាធិបតីអាមេរិក លោក ដូណាល់ ត្រាំ និង ប្រធានាធិបតី កូរ៉េខាងត្បូង លោក មូនជេ-អុីន កាលពីថ្ងៃអាទិត្យ បានពិភាក្សាគ្នាអំពីការគម្រាមនាពេលថ្មីៗ ក្នុងការលុបចោលជំនួបកំពូលមិនធ្លាប់មានពីមុនរបស់ខ្លួនជាមួយក្រុង វ៉ាស៊ីនតោន។
យោងតាមប្រភពព័ត៌មានពីទីភ្នាក់ងារសារព័ត៌មាន KCNA ផ្លូវការរបស់កូរ៉េខាងជើង បានឲ្យដឹងថា បន្ទាប់ពីការប្រើប្រាស់ពាក្យពេចន៍ប្រកបដោយភាពកក់ក្តៅ និង ការទទួលជោគជ័យផ្នែកការទូតអស់រយៈពេលជាច្រើនសប្តាហ៍មក ក្រុងព្យុងយ៉ាង បានធ្វើការគម្រាមភ្លាមៗក្នុងការដកខ្លួនចេញពីគម្រោងបើកកិច្ចជំនួបកំពូលនាខែក្រោយ ដោយសារតែការទាមទាររបស់អាមេរិក «ឲ្យលះបង់កម្មវិធីអាវុធនុយក្លេអ៊ែរជាឯកតោភាគី»។
កូរ៉េខាងជើង ក៏បានលុបចោលនានាទីចុងក្រោយនូវកិច្ចប្រជុំកម្រិតខ្ពស់មួយជាមួយ កូរ៉េខាងត្បូង ដោយធ្វើការតវ៉ាប្រឆាំងការធ្វើសមយុទ្ធយោធារួមរវាងក្រុង សេអ៊ូល និង ក្រុងវ៉ាស៊ីនតោន។
នៅក្នុងសេចក្តីថ្លែងការណ៍មួយការិយាល័យរបស់លោកបានឲ្យដឹងថា នៅក្នុងការសន្ទនាតាមទូរស័ព្ទ កាលពីថ្ងៃអាទិត្យ លោក ត្រាំ និង លោក មូន បានដោះដូរទស្សនៈគ្នាអំពីវិធានការផ្សេងៗធ្វើឡើងដោយ កូរ៉េខាងជើង នាពេលថ្មីៗ។
មេដឹកនាំទាំងពីរបានឯកភាព ធ្វើការសហការគ្នាយ៉ាងជិតស្និទ្ធ ដើម្បីទទួលបានជោគជ័យនៃកិច្ចជំនួបជាប្រវត្តិសាស្ត្រនៅក្នុងប្រទេស សិង្ហបុរី នៅថ្ងៃទី ១២ ខែមិថុនា ដែលនឹងជាកិច្ចជំនួបដំបូងរវាងប្រធានាធិបតី អាមេរិក នាពេលបច្ចុប្បន្ន និង មេដឹកនាំកូរ៉េខាងជើង។
ពួកគេ កំណត់ជួបគ្នាក្នុងក្រុងវ៉ាស៊ីនតោន នៅថ្ងៃអង្គារខាងមុខ។
ការផ្លាស់ប្តូរឥរិយាបថភ្លាមៗ របស់កូរ៉េខាងជើង កើតឡើង បន្ទាប់ពីយុទ្ធនាការស្វែងរកការគាំទ្ររយៈពេលជាច្រើនសប្តាហ៍ ដែលបានធ្វើឲ្យមេដឹកនាំ លោក គីម ជុងអ៊ុន បើកកិច្ចជំនួបកំពូលជាប្រវត្តិសាស្ត្រជាមួយ លោក មូន និង ជួបពីរដងជាមួយប្រធានាធិបតី ចិន លោក ស៊ី ជិនភីង៕