.jpg)
អ្នកកាន់ទុក្ខចូលរួមបុណ្យរបស់អ្នកតវ៉ា ៣ នាក់ ដែលត្រូវបានគេបាញ់សម្លាប់នៅក្នុងអំឡុងបាតុកម្មប្រឆាំងរដ្ឋប្រហារ។ AFP
កាលពីថ្ងៃអាទិត្យ ទី ២៨ មីនានេះ ទាហានមីយ៉ាន់ម៉ាបានបើកការបាញ់ប្រហារទៅលើក្រុមមនុស្សចូលរួមពិធីបុណ្យសពរបស់បាតុករ ១ រូប ដែលក្នុងចំណោមបាតុករចំនួន ១១៤ រូប ស្លាប់ ១ ថ្ងៃមុន។
សាក្សីបានឱ្យដឹងថា បន្ទាប់កាំភ្លើងបានផ្ទុះឡើងអ្នកកាន់ទុក្ខបានរត់គេចពីពិធីបុណ្យសពរបស់និស្សិតអាយុ ២០ ឆ្នាំ ឈ្មោះ ThaeMaungMaung ប៉ុន្តែមិនទាន់មានសេចក្ដីរាយការណ៍ភ្លាមៗអំពីអ្នកស្លាប់ និងរបួសទេ។ ព្រឹត្តិការណ៍នេះបានកើតឡើងនៅទីក្រុង Bago ដែលស្ថិតជិតអតីតរដ្ឋធានី Yangon។
ពិធីបុណ្យសពមួយចំនួនដែលបានធ្វើឡើងកាលពីថ្ងៃអាទិត្យ បានក្លាយជាឱកាសដើម្បីបាតុកម្មតវ៉ានឹងរដ្ឋាភិបាលយោធា។
នៅទីក្រុង Bhamo ភាគខាងជើងរដ្ឋ Kachin មានក្រុមមនុស្សជាច្រើនស្រែកពាក្យស្លោកប្រជាធិបតេយ្យហើយបានលើកម្រាមដៃ ៣ ដែលជានិមិត្តរូបនៃការប្រឆាំងនឹងដណ្ដើមអំណាចក្នុងពិធីបុណ្យសពស្ត្រីអាយុ ៣៦ ឆ្នាំម្នាក់ ឈ្មោះ ShweMyint ដែលត្រូវបានបាញ់សម្លាប់ដោយកងសន្តិសុខកាលពីថ្ងៃសៅរ៍។
សារព័ត៌មានបណ្ដាញសង្គមក្នុងស្រុកបានរាយការណ៍ថា ដំបូងឡើយយោធាបានរឹបអូសយកសាកសពរបស់នាង ហើយបដិសេធមិនប្រគល់ឱ្យវិញ លុះត្រាតែក្រុមគ្រួសាររបស់នាងបានចុះហត្ថលេខាលើសេចក្ដីថ្លែងការណ៍មួយថា ការស្លាប់របស់នាងមិនបណ្ដាលមកពីពួកគេ។
នៅក្នុងទីក្រុង Yangon ក្រុមអ្នកកាន់ទុក្ខបានលើកម្រាមដៃ ៣ នៅពេលដែលហែសពរបស់កុមារាអាយុ ១៣ ឆ្នាំ ១ រូប ឈ្មោះ Sai Wai Yan ដែលត្រូវបានបាញ់ស្លាប់នៅពេលលេងនៅខាងក្រៅផ្ទះ។
កាលពីថ្ងៃសៅរ៍ ទី ២៧ មីនា ដែលជាថ្ងៃទិវាកងយោធាមីយ៉ាន់ម៉ា ប្រទេសនេះបានចូលកំណត់ត្រាតួលេខខ្ពស់ មួយនៃចំនួនអ្នកស្លាប់តាំងពីការបាតុកម្មតវ៉ារបបយោធាចាប់ផ្ដើម។ មនុស្ស ១១៤ នាក់បានស្លាប់ ដែលភាគច្រើននៅទីក្រុង Yangon និង Mandalay។ យោងតាមរបាយការណ៍ព័ត៌មាន យ៉ាងហោចណាស់មានកុមារចំនួន ៦ នាក់ ដែលមានអាយុចន្លោះពី ១០ ទៅ ១៦ ឆ្នាំ គឺក្នុងចំណោមអ្នកស្លាប់។ ក្រុមបាតុករបានហៅជនរងគ្រោះទាំងនេះថា «ផ្កាយធ្លាក់»។
បើទោះបីមិនមានការរាយការណ៍ថា មានបាតុកម្មខ្នាតធំបានកើតឡើងនៅថ្ងៃអាទិត្យ សមាគមជំនួយសម្រាប់អ្នកទោសនយោបាយបាននិយាយថា មានមនុស្ស ១២ នាក់ផ្សេងទៀត ត្រូវបានស្លាប់នៅក្នុងឧប្បត្តិហេតុផ្សេងៗនៅប្រទេសមីយ៉ាន់ម៉ា ធ្វើឱ្យចំនួនជនស៊ីវិលដែលត្រូវបានស្លាប់តាំងពីរដ្ឋប្រហារថ្ងៃទី ១ ខែកុម្ភៈ កើនដល់ ៤៥៩ នាក់។
បន្ថែមពីលើនេះពលរដ្ឋមីយ៉ាន់ម៉ារស់នៅជិតព្រំដែនរាប់ពាន់នាក់បានភៀសខ្លួនទៅកាន់ប្រទេសថៃ បន្ទាប់ពីយោធាបានធ្វើការវាយប្រហារតាមអាកាសទៅលើក្រុមប្រដាប់អាវុធជនជាតិភាគតិចដែលបានបង្កើនការវាយប្រហារពួកគេ បន្ទាប់ពីព្រឹត្តិការណ៍រដ្ឋប្រហារ។
សហភាពជាតិការ៉ែន (KNU) ដែលជាក្រុមប្រដាប់អាវុធ ១ បាននិយាយថា យន្ដហោះចម្បាំងបានវាយប្រហារលើភូមិ Day Pu No ប្រហែលម៉ោង ៨:០០ ដោយធ្វើមនុស្ស ២ នាក់ស្លាប់ និងបង្ខំអ្នកស្រុកឱ្យជ្រកកោននៅកន្លែងផ្សេងទៀត។ មុនការវាយប្រហារនេះ KNU បានលុកលុយប៉ុស្តិ៍យោធាមួយនៅជិតព្រំដែនដោយបានសម្លាប់មនុស្ស ១០ នាក់។
ក្រោយការធ្វើរដ្ឋប្រហារការប្រយុទ្ធគ្នាយ៉ាងខ្លាំងបានផ្ទុះឡើងរវាងកងទ័ព និងក្រុមប្រដាប់អាវុធជនជាតិភាគតិចមួយចំនួន ដែលគ្រប់គ្រងទឹកដីនៅក្នុងប្រទេស។
ការប្រយុទ្ធគ្នាមួយទៀតក៏បានផ្ទុះឡើងផងដែរកាលពីថ្ងៃអាទិត្យ ជាមួយក្រុមប្រដាប់អាវុធមួយទៀតឈ្មោះថា កងទ័ពឯករាជ្យកាឈីន (KIA) នៅតំបន់ជីករ៉ែត្បូងថ្លើមថ្ម ឬថ្មហ្គិចខាងជើងប្រទេស។
អំពើហិង្សាដែលកំពុងកើនឡើងនេះ បានជំរុញឱ្យអ្នករាយការណ៍ពិសេសអង្គការសហប្រជាជាតិទទួលបន្ទុកសិទ្ធិមនុស្សប្រចាំមីយ៉ាន់ម៉ា លោក Tom Andrews ធ្វើការចោទប្រកាន់រដ្ឋាភិបាលយោធាបានប្រព្រឹត្ត «ឃាតកម្មទ្រង់ទ្រាយធំ» និងរិះគន់សហគមន៍អន្តរជាតិថា មិនបានធ្វើអ្វីគ្រប់គ្រាន់ ដើម្បីបញ្ឈប់រឿងនេះ។
ការរិះគន់ពីបរទេស ការដាក់ទណ្ឌកម្មពីប្រទេសលោកខាងលិចមួយចំនួន និងការធ្វើបាតុកម្មស្ទើរតែរាល់ថ្ងៃនៅទូទាំងប្រទេសដែលចាប់ផ្ដើមតាំងពីពេលរបបយោធាបានកាន់អំណាច និងឃុំខ្លួនមេដឹកនាំស៊ីវិលលោកស្រី អ៊ុងសាន ស៊ូជី បានបរាជ័យក្នុងការបញ្ចុះបញ្ចូលឱ្យមេដឹកនាំយោធាបោះបង់អំណាចពួកគេ។
បណ្ដាប្រទេសដែលរួមមានសហរដ្ឋអាមេរិក អង់គ្លេស អាល្លឺម៉ង់ និងសហភាពអឺរ៉ុបបានធ្វើការថ្កោលទោសជាថ្មីម្ដងទៀត ចំពោះអំពើហិង្សានេះ។
«វាជារឿងដ៏គួរឱ្យភ័យខ្លាច វាមិនគួរឱ្យជឿ» ប្រធានាធិបតីសហរដ្ឋអាមេរិកលោក Joe Biden បាននិយាយបែបនេះហើយបន្តទៀតថា៖ «ផ្អែកតាមរបាយការណ៍ខ្ញុំទទួលបានថា មនុស្សជាច្រើនត្រូវបានសម្លាប់ ដោយមិនចាំបាច់»។
មន្ត្រីការទូតកំពូលសហភាពអឺរ៉ុបលោក Josep Borrell បានទាមទារឱ្យមេដឹកនាំយោធាចុះចេញពីតំណែង ដោយសារអ្វីដែលលោកហៅថាជា «ផ្លូវឥតន័យ» នៃការអំពើហិង្សាប្រឆាំងនឹងប្រជាជនរបស់ពួកគេ។
លោក Borrell បាននិយាយនៅក្នុងសេចក្ដីថ្លែងការណ៍មួយថា៖ «យើងនឹងបន្តប្រើយន្តការរបស់សហភាពអឺរ៉ុបដែលរួមមានការដាក់ទណ្ឌកម្ម ដើម្បីកំណត់គោលដៅទៅលើជនល្មើសនៃអំពើហិង្សានេះ និងអ្នកដែលទទួលខុសត្រូវក្នុងការងាកចេញពីមាគ៌ាប្រជាធិបតេយ្យ និងសន្តិភាពរបស់មីយ៉ាន់ម៉ា»។
យោធារបស់ប្រទេសមីយ៉ាន់ម៉ា បានធ្វើរដ្ឋប្រហារនៅថ្ងៃទី ១ ខែកុម្ភៈ ដោយនិយាយថា ការបោះឆ្នោតកាលពីខែ វិច្ឆិកា ឆ្នាំ ២០២០ កន្លងទៅ ដែលគណបក្សរបស់លោកស្រី ស៊ូជី ទទួលជ័យជម្នះ គឺត្រូវលួចបន្លំ ដែលជាការអះអាងមួយច្រានចោលដោយគណៈកម្មាធិការរៀបចំការបោះឆ្នោត។ លោកស្រី ស៊ូជី នៅតែស្ថិតក្នុងការឃុំឃាំងនៅទីតាំងសម្ងាត់មួយ ហើយសមាជិកជាច្រើនទៀតនៃគណបក្សរបស់លោកស្រីក៏ស្ថិតក្នុងការឃុំឃាំងផងដែរ៕
