ក្រុងញូវដែលី៖ កងទ័ពបាននិយាយកាលពីថ្ងៃអង្គារថា ជម្លោះព្រំដែនយ៉ាងយូររវាងមហាអំណាចអាស៊ីឥណ្ឌា និងចិន បានបណ្តាលឲ្យមានមនុស្សស្លាប់ជាលើកដំបូង នៅក្នុងរយៈពេលជិតកន្លះសតវត្សរ៍ ដោយទាហានឥណ្ឌាយ៉ាងតិច ២០ នាក់បានស្លាប់ នៅក្នុងការប្រឈមមុខដាក់គ្នាដោយហិង្សា។
ក្រុមអ្នកជំនាញបានព្រមានថា ការប៉ះទង្គិចគ្នានៅតាមបណ្តោយព្រំដែនភ្នំហិមាល័យ គឺជាការវិវឌ្ឍគួរឲ្យព្រួយបារម្ភ ដែលអាចកើនកម្តៅជាងនេះទៀត បន្ទាប់ពីភាពតានតឹងបានកើតឡើងជាច្រើនសប្តាហ៍ និងការដាក់ពង្រាយទាហានរាប់ពាន់នាក់បន្ថែមទៀតពីភាគីទាំង ២។
ជម្លោះវាយតប់គ្នាបានកើតឡើងជាញឹកញាប់ រវាងប្រទេសដែលមានប្រជាជនច្រើនបំផុតទាំង ២ របស់ពិភពលោក ឆ្លងព្រំដែនប្រវែង ៣ ៥០០ គីឡូម៉ែត្រ ប៉ុន្តែមិនដែលមាននរណាម្នាក់បានស្លាប់ទេ ចាប់តាំងពីឆ្នាំ ១៩៧៥ មក។
ក្រុងប៉េកាំង និងក្រុងញូវដែលី បានស្តីបន្ទោសគ្នាទៅវិញទៅមកចំពោះការប៉ះទង្គិចគ្នា នៅក្នុងភូមិសាស្ត្រសម្បូរដោយថ្ម និងជាទីគ្រោះថ្នាក់នៃជ្រលងភ្នំហ្គាល់វ៉ានដ៏សំខាន់ដែលលាតសន្ធឹងនៅចន្លោះតំបន់ទីបេរបស់ចិន និងតំបន់ឡាដាក់ហ៍របស់ឥណ្ឌា។
ប្រភពកងទ័ពឥណ្ឌានៅតំបន់នោះបានប្រាប់ AFP ថា ឧប្បត្តិហេតុនោះមិនទាក់ទិនការបាញ់ប្រហារទេ ប៉ុន្តែការប៉ះទង្គិចដៃទល់ដៃដោយហិង្សា។
សារព័ត៌មាន Hindustan បានរាយការណ៍ថា ទាហានទាំងនោះដាល់គ្នា និងគប់ដុំថ្មគ្នាទៅវិញទៅមក ដោយទាហានចិនបានវាយប្រហារទៅលើសមភាគីឥណ្ឌារបស់ពួកគេដំបងឈើ និងដំបងដែកគោលនៅក្នុងអំឡុងការប្រយុទ្ធគ្នា រយៈពេលជាង ៦ ម៉ោង។
ពីដំបូងឡើយ ឥណ្ឌាបានដាក់ចំនួនអ្នកស្លាប់ត្រឹមតែ ៣ នាក់ទេ។
ប៉ុន្តែនៅក្នុងសេចក្តីថ្លែងការណ៍មួយកាលពីល្ងាចថ្ងៃអង្គារ កងទ័ពនោះបានបន្ថែមថា ទាហាន ១៧ នាក់បន្ថែមទៀត ដែលបានរងរបួសធ្ងន់ធ្ងរ ពិបាកទ្រាំនឹងសីតុណ្ហភាពក្រោមសូន្យ និងធ្វើឲ្យរបួសរបស់ពួកគេឈឺកាន់តែខ្លាំង។
កងទ័ពឥណ្ឌាបាននិយាយថា មានអ្នកស្លាប់ និងរបួសទាំងសងខាង។
ក្រសួងការពារជាតិចិនបានអះអាងថា ឧប្បត្តិហេតុនេះបានបណ្តាលឲ្យមានស្លាប់ និងរបួស ប៉ុន្តែមិនបានថ្លែងថា ជនរងគ្រោះទាំងនោះជាជនជាតិអ្វីទេឬក៏សេចក្តីលម្អិតនោះទេ។
អាមេរិកដែលមានភាពចម្រូងចម្រាសជាមួយចិនកាន់តែកើនឡើង ប៉ុន្តែមើលឃើញឥណ្ឌាជាសម្ព័ន្ធមិត្តដែលទើបតែងើបឡើងនោះ បាននិយាយថា ខ្លួនសង្ឃឹមថាមានដំណោះស្រាយមួយដោយសន្តិវិធី និងថា ខ្លួនកំពុងធ្វើការតាមដានស្ថានការណ៍នេះ យ៉ាងយកចិត្តទុកដាក់បំផុត។
អង្គការសហប្រជាជាតិបានអំពាវនាវឲ្យភាគីទាំង ២ ធ្វើការអត់ធ្មត់ជាអតិបរមា។
អតីតឯកអគ្គរដ្ឋទូតឥណ្ឌាប្រចាំនៅចិន និងលោករដ្ឋមន្ត្រីការបរទេស Nirupama Menon Rao បានព្រមានថា៖ «យើងមានការព្រួយបារម្ភយ៉ាងខ្លាំងចំពោះទំនាក់ទំនងរវាងប្រទេសទាំង ២»៕ AFP/PSA