.jpg)
លោក Xi Jinping (ស្តាំ) ចាប់ដៃជាមួយអតីតនាយកប្រតិបត្តិក្រុងហុងកុងលោក Tung Chee-hwa។ AFP
អង្គនីតិប្បញ្ញត្តិរបស់ប្រទេសចិន កំពុងជជែកដេញដោលលើសេចក្តីណែនាំទាក់ទិននឹងសេចក្តីព្រាងមួយដែលនឹងធ្វើឱ្យទីក្រុងប៉េកាំង ខិតជិតទៅរកការគ្រប់គ្រងប្រព័ន្ធបោះឆ្នោតរបស់ហុងកុងពេញលេញបន្ថែមទៀត ខណៈដែលលទ្ធផលនៃការបោះឆ្នោតក្នុងតំបន់ជិតមកដល់។
បើទោះបីជា ទីក្រុងប៉េកាំង មិនបានផ្សព្វផ្សាយព័ត៌មានលម្អិតទាក់ទិននឹងសេចក្ដីព្រាងនេះជាសាធារណៈនៅឡើយ ប៉ុន្តែនេះ គឺជាការគូសបញ្ជាក់អំពីជំហានឆ្ពោះទៅរកការផ្លាស់ប្តូរយ៉ាងធំធេង ដែលនឹងអនុញ្ញាតឱ្យរដ្ឋាភិបាលក្រុងប៉េកាំងអាចត្រួតពិនិត្យបេក្ខជនសម្រាប់ក្រុមប្រឹក្សានីតិប្បញ្ញត្តិរបស់ហុងកុង និងរៀបចំគណៈកម្មាធិការរៀបចំការបោះឆ្នោតមួយ ដើម្បីសម្រេចជ្រើសរើសយកប្រធានប្រតិបត្តិប្រចាំតំបន់នេះ។
ក្នុងចំណោមគោលការណ៍ដែលបានស្នើឡើងដោយទីក្រុងប៉េកាំង មានគោលការណ៍មួយចំនួន ដែលមានបំណងចង់បង្កើនទំហំក្រុមប្រឹក្សាធម្មនុញ្ញ និងគណៈកម្មាធិការរៀបចំការបោះឆ្នោតនៅទីក្រុងហុងកុង។ គណៈកម្មាធិការនោះ ក៏នឹងត្រួតពិនិត្យបេក្ខភាពដែលឈរឈ្មោះសម្រាប់មុខតំណែងជាក្រុមប្រឹក្សានីតិប្បញ្ញត្តិទាំងអស់ ដោយធានាថា បេក្ខភាពខាងទីក្រុងប៉េកាំងនិងមានវត្តមានភាគច្រើននៅក្នុងស្ថាប័ននីមួយៗ។
នៅក្នុងសុន្ទរកថាមួយកាលពីសប្តាហ៍មុន លោក Xia Baolong មន្ត្រីជាន់ខ្ពស់ទទួលបន្ទុកកិច្ចការហុងកុងបាននិយាយថា៖ «អំណាចរដ្ឋបាលនៅហុងកុង ត្រូវតែរក្សានៅក្នុងដៃអ្នកស្នេហាជាតិចិន»។
លោក Eric Tsang មន្ត្រីជាន់ខ្ពស់នៅហុងកុងបានឱ្យដឹងបន្ថែមពីនេះទៀតថា៖ «អ្នកមិនអាចនិយាយថា អ្នកជាអ្នកស្នេហាជាតិបានទេ បើអ្នកមិនស្រឡាញ់ ឬគោរពការដឹកនាំរបស់បក្សកុម្មុយនីស្តចិននោះ»។
មន្ត្រីដែលត្រូវបានតែងតាំងពីទីក្រុងប៉េកាំងបានត្រៀមរៀបចំការផ្លាស់ប្តូរការបោះឆ្នោតទាំងនេះអស់រយៈពេលជាច្រើនសប្តាហ៍មុននឹងមានកិច្ចប្រជុំនយោបាយប្រចាំឆ្នាំរបស់ប្រទេសចិន មកដល់។
នាយកប្រតិបត្តិបច្ចុប្បន្នរបស់ហុងកុង អ្នកស្រី Carrie Lam បានប្រាប់អ្នកយកព័ត៌មានកាលពីខែមុនថា៖ «ការដែលចិនចង់ឱ្យមានការកែតម្រូវប្រព័ន្ធ និងការរៀបចំការបោះឆ្នោតនៅហុងកុងនេះក៏ដោយសារចង់ឱ្យប្រាកដប្រជាថា អ្នកដែលកំពុងគ្រប់គ្រងទីក្រុងហុងកុង គឺជាអ្នកស្នេហាជាតិពិតប្រាកដ»។
ការប្រកាសជាសាធារណៈអំពីសំណើនេះ បានធ្វើឡើងនៅយប់ថ្ងៃព្រហស្បតិ៍ ដោយមន្ត្រីជាន់ខ្ពស់បក្សកុម្មុយនីស្តម្នាក់ គឺលោក Zhang Yesui។ ភ្លាមៗនោះប្រព័ន្ធបោះឆ្នោតរបស់ហុងកុងទើបលេចឡើងនៅក្នុងរបៀបវារៈនៃសន្និបាតប្រជាជនជាតិរបស់ប្រទេសចិន ប៉ុន្មានម៉ោង មុនកិច្ចប្រជុំនយោបាយប្រចាំឆ្នាំប៉ុណ្ណោះ។ ដោយឡែក សភាចិនត្រូវបានគេរំពឹងថា នឹងអនុម័តគោលការណ៍ដែលស្នើឡើងនេះ ត្រឹមថ្ងៃទី ១១ ខែមីនា ស្របពេលដែលកិច្ចប្រជុំបញ្ចប់ដូចគ្នា ហើយស្ថាប័ននីតិប្បញ្ញត្តិជាន់ខ្ពស់នឹងបង្កើតច្បាប់អនុវត្តលម្អិតបន្ថែមទៀតនៅពេលក្រោយ។
លោក Simon Cartledge អ្នកនិពន្ធសៀវភៅនៅលើប្រព័ន្ធនយោបាយទីក្រុងហុងកុងនេះបាននិយាយថា៖ «នេះជាការផ្ដល់ឱកាសឱ្យទីក្រុងប៉េកាំង គ្រប់គ្រងទីក្រុងនេះបន្ថែមទៀត។ ប៉ុន្តែ ខ្ញុំមើលមិនឃើញថា ការផ្លាស់ប្ដូរថ្មីនេះ នឹងអាចដោះស្រាយបញ្ហាអភិបាលកិច្ចសំខាន់ ដែលកំពុងកើតឡើងនៅហុងកុងបានប៉ុនណានោះទេ ប៉ុន្តែដំណោះស្រាយដែលមិនមានគណនេយ្យភាពរបស់រដ្ឋាភិបាលនេះសឹងតែមិនមែនជាការឆ្លើយតបនឹងតម្រូវការរបស់ហុងកុងទាល់តែសោះ»។
ទីក្រុងហុងកុង បានវិលត្រឡប់មកស្ថិតក្នុងការគ្រប់គ្រងរបស់ប្រទេសចិន ក្នុងឆ្នាំ ១៩៩៧ ដោយចិនបានសន្យាថា នឹងធ្វើឱ្យមានសិទ្ធិស្វ័យភាព និងសេរីភាពឱ្យប្រជាជននៅតំបន់នេះ។ ប៉ុន្តែសកម្មជនគាំទ្រលទ្ធិប្រជាធិបតេយ្យបច្ចុប្បន្ន កំពុងត្រូវបានគេបោសសម្អាតចេញបណ្ដើរៗ និងពេលខ្លះត្រូវបានទីក្រុងប៉េកាំង ប្រើអំពើហិង្សាដាក់តាំងពីឆ្នាំ ២០១៩ មក។
ផ្ទុយទៅវិញ អតីតនាយកប្រតិបត្តិ ២ រូប របស់ហុងកុងបែរជំរុញឱ្យប្រជាជនខ្លួនប្រកាន់ខ្ជាប់នូវការគ្រប់គ្រងពីទីក្រុងប៉េកាំង ទៅវិញ។ លោក Tung Chee-hwa នាយកប្រតិបត្តិដំបូងរបស់ទីក្រុងហុងកុង ដែលបច្ចុប្បន្នជាអនុប្រធាននៃសន្និសីទពិគ្រោះយោបល់នយោបាយប្រជាជនចិន បានចេញសេចក្តីថ្លែងការណ៍មួយ កាលពីថ្ងៃសុក្រ ដោយលើកហេតុផលថា ទីក្រុងហុងកុងបានឈានដល់ចំណុចកំពូលមួយ ហើយដែលត្រូវការ «ការធ្វើកំណែទម្រង់» មួយ។
លោក Leung Chun-ying ដែលជានាយកប្រតិបត្តិហុងកុងត្រឹមឆ្នាំ ២០១៧ និងបច្ចុប្បន្នជាប្រតិភូមួយរូបនៅក្នុងអង្គនីតិប្បញ្ញត្តិរបស់ប្រទេសចិន បាននិយាយនៅក្នុងសុន្ទរកថាមួយថា ក្រុមប្រឆាំងនយោបាយជាច្រើន នៅក្នុងតំបន់គឺ «ក្រុមបំបែកខ្លួន» ដែលប្រឆាំងនឹងច្បាប់របស់ទីក្រុងប៉េកាំង។ លោកបាននិយាយថា៖ «នៅហុងកុងអំណាចស្វយ័ត ដែលយើងទទួលសាទរសុទ្ធតែបានពីទីក្រុងប៉េកាំង»។
គួរបញ្ជាក់ថា បច្ចុប្បន្នសមាជិកនីតិប្បញ្ញត្តិជាងពាក់កណ្តាលប៉ុណ្ណោះ ដែលត្រូវបានជ្រើសរើសតាមរយៈការបោះឆ្នោតតាមបែបប្រជាធិបតេយ្យជាសមាមាត្រមួយដែលកាន់តែធ្លាក់ចុះថែមទៀត នៅក្រោមប្រព័ន្ធកំណែទម្រង់ថ្មីនេះ។ ដោយឡែកសម្រាប់អាសនៈផ្សេងទៀតនៅក្នុងអង្គនីតិប្បញ្ញត្តិ និងគណៈកម្មាធិការរៀបចំការបោះឆ្នោត ត្រូវបានជ្រើសរើសដោយសមាជិកក្រុមប្រឹក្សាស្រុក និងជាប់ឆ្នោតតាមបែបប្រជាធិបតេយ្យ ត្រូវបានគេរំពឹងថា នឹងត្រូវគេលុបចោលផងដែរ៕
