.jpg)
អ្នកស្រុកក្នុងតំបន់ប្រមូលផ្តុំគ្នានៅក្នុងជម្រកបណ្តោះអាសន្នមួយ។ AFP
ខេត្តចាយ៉ាពូរ៉ាៈ មន្ត្រីម្នាក់បានថ្លែងកាលពីថ្ងៃអាទិត្យថា ទឹកជំនន់ទឹកភ្លៀងនៅក្នុងខេត្តប៉ាពួភាគខាងកើតឥណ្ឌូនេស៊ីបានបណ្តាលឲ្យមនុស្សយ៉ាងតិចចំនួន ៥៨ នាក់ ស្លាប់ ខណៈក្រុមរុករក និងជួយសង្គ្រោះបានខិតខំប្រឹងប្រែង ដើម្បីជួយជនរងគ្រោះរាប់សិបនាក់ដោយមហន្តរាយនេះ។
ទឹកជំនន់នៅក្នុងតំបន់សែនតានីនៅក្បែររដ្ឋធានីចាយ៉ាពួរ៉ាបង្កឡើងដោយភ្លៀងខ្លាំង និងបាក់ដីកាលពីថ្ងៃអាទិត្យ ដោយបានបណ្តាលឲ្យមនុស្សយ៉ាងតិច ៧០ នាក់រងរបួស។
អ្នកនាំពាក្យទីភ្នាក់ងារគ្រប់គ្រងគ្រោះមហន្តរាយជាតិលោក Sutopo Purwo Nugroho បានថ្លែងថា ផ្ទះសំបែងរាប់សិបខ្នង ត្រូវបានបំផ្លាញដោយសារទឹកជំនន់។
លោក បានបន្ថែមថា៖ «ចំនួនស្លាប់ និងរងរបួស និងផលប៉ះពាល់ពីមហន្តរាយនេះទំនងជាអាចកើនឡើង ខណៈក្រុមរុករក និងជួយសង្គ្រោះកំពុងប្រឹងប្រែងទៅឲ្យដល់តំបន់នានាដែលរងផលប៉ះពាល់»។
«ទឹកជំនន់ហូរលឿននេះទំនងជាបង្កមកពីបាក់ដី»។
ទឹកស្រកទៅវិញ ប៉ុន្តែក្រុមមន្ត្រី នៅតែព្យាយាមជួយជម្លៀសប្រជាជនចេញពីតំបន់ដែលរងការប៉ះពាល់ខ្លាំង។
លោក Nugroho បានថ្លែងថា៖ «ក្រុមអ្នករុករក និងជួយសង្គ្រោះនៅតែធ្វើការជម្លៀសនិងមិនបានទៅដល់តំបន់ ដែលរងផលប៉ះពាល់ខ្លាំងដោយសារដើមឈើរលំ ដុំថ្ម ភក់ និងសម្ភារដទៃទៀត»។
បើយោងតាមអ្នកសែត AFP ម្នាក់ នៅកន្លែងកើតហេតុ បានឲ្យដឹងថា នៅក្នុងតំបន់ដូយ៉ូជាតំបន់មួយក្នុងចំណោមតំបន់ ដែលត្រូវរងផលប៉ះពាល់ខ្លាំងជាងគេបំផុតមានតំបន់លំនៅឋានមួយ សម្បូរដោយដុំថ្មធំៗ ដែលត្រូវបានគេជឿថា រមៀលធ្លាក់ពីភ្នំនៅក្បែរនោះ ដោយសារទឹកជំនន់៕ AFP/PSA
