ទំនាក់ទំនងរបស់សហរដ្ឋអាមេរិកជាមួយនឹងគូប្រជែងភូមិសាស្ត្រនយោបាយដ៏ធំរបស់ខ្លួនទាំង ២ ចិន និងរុស្ស៊ី គឺកំពុងរងការសាកល្បងយ៉ាងខ្លាំង ខណៈពេលប្រធានាធិបតីអាមេរិកលោក Joe Biden បានបង្ហាញជំហរតឹងរ៊ឹងចំពោះប្រទេសទាំង ២ នេះ កាលពីសប្ដាហ៍មុន។
ជម្លោះជាសាធារណៈរបស់អាមេរិកជាមួយចិន និងរុស្ស៊ីបានផ្ទុះឡើងកាលពីថ្ងៃពុធ ទី ១៧ មីនា នៅពេលដែលលោក Biden បាននិយាយលើកញ្ចក់ទូរទស្សន៍ថា លោកចាត់ទុកប្រធានាធិបតីរុស្ស៊ីលោក Vladimir Putin ជា «ឃាតក» និងជាមនុស្សគ្មានព្រលឹង ហើយចោទប្រកាន់រុស្ស៊ីថា បានជ្រៀតជ្រែកក្នុងការបោះឆ្នោតប្រធានាធិបតីអាមេរិកឆ្នាំ ២០២០។ រដ្ឋបាលលោក Biden បាននិយាយថា ខ្លួនកំពុងរៀបចំការដាក់ទណ្ឌកម្មថ្មីប្រឆាំងនឹងប្រទេសរុស្ស៊ី ជុំវិញការចោទប្រកាន់ពីវាយការប្រហារតាមអ៊ីនធឺណិត និងការជ្រៀតចូលក្នុងការបោះឆ្នោត។
ក្រុងម៉ូស្គូបានឆ្លើយតបនឹងសម្ដីរបស់លោក Biden ដោយកោះហៅឯកអគ្គរដ្ឋទូតរបស់ខ្លួនប្រចាំក្រុងវ៉ាស៊ីនតោន ឱ្យត្រឡប់មកវិញ ដើម្បីពិភាក្សាអនាគតនៃទំនាក់ទំនងរុស្ស៊ី-អាមេរិក។ នៅថ្ងៃព្រហស្បតិ៍លោក Putin បានឆ្លើយតបដោយនិយាយថា រដ្ឋរបស់អាមេរិកទាំងអស់បានប្រឈមនឹង «ព្រឹត្តិការណ៍បង្ហូរឈាម» ហើយលោកបានបន្ថែមទៀតថា លោក Biden កំពុងចោទប្រកាន់មេដឹកនាំរុស្ស៊ីពីអ្វីដែលលោកបានប្រព្រឹត្តខ្លួនឯង។
លោក Putin ក៏បានចង្អុលបង្ហាញពីប្រវត្តិសាស្ត្រទាសភាពនៅអាមេរិកការសម្លាប់រង្គាលជនជាតិដើមអាមេរិក និងការទម្លាក់គ្រាប់បែកបរមាណូនៅជប៉ុនក្នុងសង្គ្រាមលោកលើកទី២ ហើយនិយាយថា «ត្រូវការម្នាក់ ដើម្បីស្គាល់ម្នាក់ទៀត»។
២៤ ម៉ោង បន្ទាប់ពីការអត្ថាធិប្បាយរបស់លោក Biden រដ្ឋមន្ត្រីការបរទេសអាមេរិកលោក Anthony Blinken និងទីប្រឹក្សាសន្តិសុខជាតិលោក Jake Sullivan បានធ្វើការរិះគន់សមភាគីចិន ជុំវិញបញ្ហាជាច្រើនក្នុងកិច្ចប្រជុំការទូតជាន់ខ្ពស់ចិន-អាមេរិកដំបូង តាំងពីលោកចូលកាន់អំណាច។
លោក Blinken បានបើកកិច្ចប្រជុំដោយនិយាយថា៖ «យើងនឹងពិភាក្សាពីការព្រួយបារម្ភដ៏ជ្រាលជ្រៅរបស់យើងជាមួយសកម្មភាពរបស់ចិនដែលរួមមានស៊ីនជាំង ហុងកុង តៃវ៉ាន់ ការវាយប្រហារតាមអ៊ីនធឺណិតលើសហរដ្ឋអាមេរិក និងការបង្ខិតបង្ខំសេដ្ឋកិច្ចរបស់សម្ព័ន្ធមិត្តយើង»។ លោកបានបន្តទៀតថា៖ «សកម្មភាពនីមួយៗទាំងនេះ គំរាមកំហែងដល់សណ្ដាប់ធ្នាប់ផ្អែកលើច្បាប់ដែលរក្សាស្ថិរភាពពិភពលោក»។
ទីប្រឹក្សារដ្ឋចិនលោក Yang Jiechi និងរដ្ឋមន្ត្រីការបរទេសចិនលោក Wang Yi បានឆ្លើយតបវិញដោយរិះគន់អាមេរិកថា ថ្កោលសកម្មភាពរបស់ចិន ខណៈខ្លួនមិនអាចដោះស្រាយបញ្ហាផ្ទៃក្នុងរបស់ខ្លួនដែលរួមមានអំពើហិង្សាប្រឆាំងនឹងជនជាតិអាមេរិកដើមកំណើតអាស៊ី ឬជនជាតិភាគតិចផ្សេងទៀត និងភាពវឹកវរនយោបាយ បន្ទាប់ពីការបោះឆ្នោតប្រធានាធិបតីឆ្នាំ ២០២០។
«សហរដ្ឋអាមេរិកប្រើកម្លាំងយោធា និងអនុត្តរភាពហិរញ្ញវត្ថុរបស់ខ្លួន ដើម្បីអនុវត្តយុត្តាធិការដៃវែង និងបង្ក្រាបប្រទេសដទៃទៀត» លោក Yang Jiechi បាននិយាយបែបនេះហើយបន្តទៀតថា៖ «អាមេរិករំលោភលើអ្វីដែលគេហៅថា សញ្ញាណសន្តិសុខជាតិ ដើម្បីរារាំងការធ្វើពាណិជ្ជកម្មធម្មតា និងញុះញង់ប្រទេសមួយចំនួនឱ្យវាយប្រហារប្រទេសចិន»។
លោក Blinken និងលោក Sullivan បាននិយាយទៅវិញថា អាមេរិកមិនល្អឥតខ្ចោះទេ ប៉ុន្តែបានព្យាយាមដោះស្រាយបញ្ហាបែបនេះ ដោយបើកចំហ និងដោយស្មោះត្រង់។ លោក Sullivan បាននិយាយថា ឆន្ទៈរបស់ជនជាតិអាមេរិកក្នុងការប្រឈមនឹងការខ្វះខាតរបស់ពួកគេគឺ «ទឹកជ្រលក់សម្ងាត់» នៃភាពជោគជ័យរបស់សហរដ្ឋអាមេរិក។
លោក Blinken ដែលទើបតែបានបញ្ចប់ដំណើរទៅកាន់ប្រទេសជប៉ុន និងកូរ៉េខាងត្បូង ជាមួយលោក Lloyd Austin រដ្ឋមន្ត្រីក្រសួងការពារជាតិអាមេរិកបានប្រាប់លោក Wang Yi និងលោក Yang Jiechi ថា៖ «ខ្ញុំត្រូវតែប្រាប់អ្នកថា អ្វីដែលខ្ញុំឮ គឺខុសគ្នាពីអ្វីដែលអ្នកបានពិពណ៌នា។ ខ្ញុំឮការពេញចិត្តយ៉ាងខ្លាំងដែលសហរដ្ឋអាមេរិកវិលត្រឡប់មកវិញហើយ ដែលយើងបានភ្ជាប់ទំនាក់ទំនងជាមួយសម្ព័ន្ធមិត្ត និងដៃគូរបស់យើងឡើងវិញ ខ្ញុំក៏ឮការព្រួយបារម្ភយ៉ាងខ្លាំងអំពីសកម្មភាពមួយចំនួន ដែលរដ្ឋាភិបាលរបស់អ្នកបានធ្វើ»។
ភាគីទាំងសងខាងមិនព្រមដកថយ ហើយប្រជែងគ្នាដើម្បីនិយាយពាក្យចុងក្រោយចំពោះមុខកាមេរ៉ាអ្នកសារព័ត៌មាន។ លោក Yang Jiechi បាននិយាយថា មន្ត្រីអាមេរិកបាននិយាយជាមួយភាគីចិនដោយរបៀបនិយាយមិនសមរម្យ។ លោកក៏បាននិយាយទៀតថា កិច្ចខិតខំប្រឹងប្រែង ដើម្បីរុញអ្នកសារព័ត៌មានឱ្យចេញទៅក្រៅបន្ទប់ គឺជាឧទាហរណ៍មួយដែលបង្ហាញថា សហរដ្ឋអាមេរិកមិនគាំទ្រលទ្ធិប្រជាធិបតេយ្យ។
ក្រោយការប្រជុំបានបញ្ចប់មន្ត្រីជាន់ខ្ពស់អាមេរិក ១ រូប បានចោទប្រកាន់ភាគីចិនថាបាន «រំលោភពិធីសារ» ដោយមានចេតនាមកកិច្ចប្រជុំនេះបង្ហាញភាពលេចធ្លោចំពោះកាមេរ៉ា។
ការអត្ថាធិប្បាយខ្លាំងៗរបស់លោក Biden អំពីលោក Putin បានឆ្លុះបញ្ចាំងពីការផ្លាស់ប្ដូរគោលនយោបាយផ្សះផ្សាជាមួយរុស្សីរបស់លោក Donald Trump ប៉ុន្តែការរិះគន់ប្រទេសចិន ដោយលោក Blinken និងលោក Sullivan បង្ហាញពីភាពដូចគ្នានៃគោលនយោបាយចំពោះក្រុងប៉េកាំង របស់រដ្ឋបាលបច្ចុប្បន្ន និងរដ្ឋបាលមុន។
អ្នកវិភាគមួយចំនួនបានគិតថា ការប្រឈមមុខដាក់គ្នាបែបនេះអាចធ្វើឱ្យទំនាក់ទំនងរបស់សហរដ្ឋអាមេរិកជាមួយចិនធ្លាក់ចុះដល់កម្រិតទាបបំផុតតាំងពីពេលបេសកកម្មរបស់ប្រធានាធិបតី Richard Nixon ក្នុងការ «បើក»រដ្ឋកុម្មុយនីស្តដែលនៅឯកោ កាលពីទសវត្សរ៍ឆ្នាំ ១៩៧០ ហើយចំណងទាក់ទងរវាងសហរដ្ឋអាមេរិក និងរុស្ស៊ីអាចធ្លាក់ដល់ចំណុចលំបាកបំផុតតាំងពីការដួលរលំនៃសហភាពសូវៀត៕