ក្រុងឡុងដ៍ៈ លោកស្រីនាយករដ្ឋមន្ត្រី ថេរ៉េសា ម៉េ កាលពីថ្ងៃចន្ទ បានព្រមានក្រុមសមាជិកសភាប្រឆាំងនឹង ប្រជាមតិលើកទី ២ សម្រាប់ការចាកចេញពីសហភាពអឺរ៉ុប (EU) ដោយបានថ្លែងថា វានឹងធ្វើឲ្យប៉ះពាល់យ៉ាងខ្លាំងដល់នយោបាយអង់គ្លេស។
យោងតាមសម្តីដកស្រង់ពីសុន្ទរកថារបស់លោកស្រីដែលចេញផ្សាយដោយការិយាល័យនាយករដ្ឋមន្ត្រីនោះ លោកស្រីគ្រោងថ្លែងប្រាប់សភាថា៖ «ចូរយើងកុំក្បត់ពាក្យសន្យាជាមួយប្រជាជនអង់គ្លេសតាមរយៈការធ្វើប្រជាមតិមួយទៀតនោះ»។
លោកស្រី បានថ្លែងថា៖ «ការបោះឆ្នោតមួយទៀត នឹងបង្កការប៉ះពាល់ដល់សុចរិតភាពនៃគោលនយោបាយរបស់យើង»។
លោកស្រីបន្ថែមថា ការបោះឆ្នោតលើកទី ២ នឹងទំនងជាធ្វើឲ្យយើងលែងទៅមុខរួច។
លោកស្រី បានថ្លែងថា ការធ្វើប្រជាមតិមួយទៀតនោះ នឹងធ្វើឲ្យប្រទេសរបស់យើងបែកបាក់ថែមទៀត ខណៈដែលយើងបាននិងកំពុងធ្វើការរួបរួមគ្នានេះ។
អង់គ្លេស បានបោះឆ្នោតដើម្បីចាកចេញពីសហភាពអឺរ៉ុបកាលពីឆ្នាំ ២០១៦ និងគ្រោងចាកចេញនៅថ្ងៃទី ២៩ ខែមីនា ឆ្នាំ ២០១៩ ថ្វីបើលោកស្រីម៉េខិតខំប្រឹងប្រែងធ្វើយ៉ាងណាឲ្យសភាទទួលយកកិច្ចព្រមព្រៀងចាកចេញមួយ ដែលលោកស្រី បានសម្រេចកាលពីខែមុនក្តី។
លោកស្រី បានប្រឈមនឹងការអំពាវនាវជាច្រើនឲ្យធ្វើប្រជាមតិលើកទី ២ មួយទៀតដើម្បីដោះស្រាយភាពជាប់គាំងប៉ុន្តែបានបញ្ជាក់ថា ការធ្វើបែបនេះ នឹងផ្ទុយពីលទ្ធផលប្រជាមតិឆ្នាំ ២០១៦៕