កាលពីថ្ងៃពុធទី ១៣ ខែមករា នាយករដ្ឋមន្ត្រីប្រទេសអេស្តូនី លោក JuriRatas បានលាលែងពីតំណែងបន្ទាប់ពីប៉ូលិស និងរដ្ឋអាជ្ញាបើកការស៊ើបអង្កេតលើរឿងអាស្រូវពុករលួយដែលពាក់ព័ន្ធគណបក្សរបស់លោក ជុំវិញការប្រើប្រាស់ប្រាក់ឥណទានមិនត្រឹមត្រូវ។
លោក Ratas បានបង្ហោះសារទៅកាន់ Facebook ថា៖ «ថ្ងៃនេះខ្ញុំបានសម្រេចចិត្តលាលែងពីតំណែងជានាយករដ្ឋមន្ត្រី»។ លោក Ratas បាននិយាយថា លោកសង្ឃឹមថា ការលាលែងរបស់លោកនឹងជួយ «បំភ្លឺរាល់កាលៈទេសៈ និងធ្វើឱ្យឈានដល់ភាពច្បាស់លាស់» តែលោកបានអះអាងថា លោកមិនបាន «ធ្វើការសម្រេចចិត្តណាដែលមានគំនិតអាក្រក់ ឬខុសដោយចេតនាឡើយ»។
ការស៊ើបអង្កេត គឺផ្ដោតលើក្រុមហ៊ុនអចលនទ្រព្យមួយមានឈ្មោះថា Porto Franco ដែលបានទទួលប្រាក់ឥណទានរដ្ឋចំនួន ៣៩ លានអឺរ៉ូ និងបានទទួលកិច្ចសន្យា ដើម្បីអភិវឌ្ឍដែនដីកំពង់ផែចាស់ពីអាជ្ញាធររដ្ឋធានី Tallinn បន្ទាប់ពីបានផ្ដល់ប្រាក់ឧបត្ថម្ភជូនគណបក្ស Centre របស់លោក Ratas។
យ៉ាងណាមិញប្រធានាធិបតីអេស្តូនីលោកស្រី KerstiKaljulaid មានរយៈពេល ១៤ ថ្ងៃ ដើម្បីតែងតាំងនាយករដ្ឋមន្ត្រីថ្មី ដែលត្រូវការអនុម័តដោយសភា។ ប្រសិនបើគ្មានបេក្ខជននាយករដ្ឋមន្ត្រីណាអាចបញ្ជាសំឡេងភាគច្រើនក្នុងចំណោមសមាជិកសភា គេនឹងរៀបចំការបោះឆ្នោតជាថ្មី៕