.jpg)
លោក Benjamin Netanyahu (ស្តាំ) និយាយទៅកាន់មេធាវីរបស់លោកមុនចូលទៅក្នុងតុលាការ។ AFP
កាលពីថ្ងៃចន្ទកន្លងទៅនាយករដ្ឋមន្ត្រីអ៊ីស្រាអែលលោក Benjamin Netanyahu បានបដិសេដមិនទទួលទោសទាក់ទិនរឿងក្ដីពុករលួយ ខណៈដំណើរការកាត់ទោសពីបទចោទប្រកាន់អំពើពុករលួយនៅតែបន្តដដែល នៅតុលាការក្នុងក្រុងហ្ស៊េរុយសាឡិម នៅប៉ុន្មានសប្តាហ៍មុនការបោះឆ្នោតថ្នាក់ជាតិដែលជាក្ដីសង្ឃឹមរបស់លោកក្នុងការបន្តកាន់អំណាច ក្រោយកាន់កាប់អំណាចអស់រយៈពេល ១២ ឆ្នាំមកនេះ។
កាលពីឆ្នាំមុន លោក Netanyahu ត្រូវបានគេចោទប្រកាន់ពីបទឆបោក និងរំលោភសេចក្តីទុកចិត្ត និងទទួលសំណូកក្នុងករណី ៣ ដាច់ដោយឡែកពីគ្នា។ ក្នុងប៉ុន្មានខែថ្មីៗនេះ ប្រជាជនអ៊ីស្រាអែលបានធ្វើបាតុកម្មជារៀងរាល់សប្តាហ៍ទាមទារឱ្យលោក Netanyahu លាលែងពីតំណែង ដោយសារការចោទប្រកាន់ករណីពុករលួយនេះ ហើយរិះគន់រដ្ឋាភិបាលក្នុងការគ្រប់គ្រងវិបត្ដិកូវីដ ១៩។
លោក Netanyahu ត្រូវបានគេចោទប្រកាន់ថា បានទទួលយកកាដូដ៏ច្រើនសន្ធឹកសន្ធាប់ពីមិត្តភក្តិដែលមានទ្រព្យស្តុកស្តម្ភ និងផ្តល់អំណោយដល់អ្នកធ្វើការក្នុងប្រព័ន្ធផ្សព្វផ្សាយដ៏មានឥទ្ធិពល ដើម្បីជាថ្នូរក្នុងការផ្សព្វផ្សាយព័ត៌មានល្អៗពីលោក និងគ្រួសាររបស់លោក។ សវនាការចុងក្រោយទាក់ទិននឹងករណីរបស់លោក ត្រូវបានគេពន្យារពេលកាលពីខែមុន ដោយសារតែការដាក់កម្រិតលើការជួបជុំសាធារណៈ ដោយសារកូវីដ ១៩។
មេដឹកនាំវ័យចំណាស់អាយុ ៧១ ឆ្នាំរូបនេះ បានបដិសេធការចោទប្រកាន់នេះថា ជា «ការប្រឌិតគ្មានហេតុផល និងគួរឱ្យអស់សំណើច» នៅចំពោះមុខសវនាការដំបូងរបស់លោកកាលពីខែឧសភា ឆ្នាំទៅ និងអះអាងថា លោកជាជនរងគ្រោះ ខណៈគេផ្សេងកំពុងវាយប្រហារលោកដោយដៅគោលដៅផ្ទាល់ទៅលើមេធាវីរបស់ លោក AvichaiMandelblit។
លោក Netanyahu បាននិយាយថា៖ «នរណាក៏ដឹងដែរថា រឿងក្ដីរបស់ខ្ញុំ គឺជាការមួលបង្កាច់»។ លោកបានសរសេរថា រដ្ឋអាជ្ញាមិនបានបំពេញការងារបានល្អសោះ ទោះយ៉ាងណាលោកក៏បាននិយាយថា ក្នុងដំណាក់កាលស្វែងរកភ័ស្តុតាង ដើម្បីការពារខ្លួនលោកផ្ទាល់ គឺចាត់ទុកថាជា «ការជ្រៀតជ្រែក»ការបោះឆ្នោត។
គួរបញ្ជាក់ផងដែរថា ករណី ដែលគេចោទប្រកាន់មាន ៣ ករណីធំ។ ករណីធ្ងន់ធ្ងរបំផុត ឬហៅម្យ៉ាងទៀតថា ករណី ៤ ០០០ ដែលក្នុងនោះលោកត្រូវបានគេចោទប្រកាន់ពីបទស៊ីសំណូក លួចបន្លំ និងការបំពានលើសេចក្តីទុកចិត្ត ដែលជាករណីគេចោទប្រកាន់ថា លោក Netanyahu បានចរចាជាមួយលោក ShaulElovitch នៃក្រុមហ៊ុនទូរគមនាគមន៍ Bezeq ដើម្បីធានាឱ្យបាននូវការផ្សព្វផ្សាយព័ត៌មានល្អៗលើវេបសាយរបស់លោក គឺ Walla ដែលជាវេបសាយព័ត៌មានមួយក្នុងការផ្លាស់ប្ដូរគោលនយោបាយលោក និងផ្តល់ផលប្រយោជន៍ដល់ក្រុមហ៊ុន Bezeq ក្នុងពេលជាមួយគ្នា។ លោក Elovitch និងភរិយាក៏ត្រូវបានចោទប្រកាន់ផងដែរ។
ករណីមួយទៀតឬករណី ២ ០០០ ជាករណី ដែលគេចោទប្រកាន់លោក Netanyahu ថា បានស្វែងរកការព្រមព្រៀងគ្នាមួយជាមួយម្ចាស់កាសែត Yediot Aharonot ដោយមើលឃើញថា នឹងផ្តល់ឱកាសដល់លោក ដែលឱ្យសារព័ត៌មានមួយនេះ ផ្សព្វផ្សាយព័ត៌មានល្អពីគាត់ ដើម្បីទទួលបានការពេញចិត្តពីសាធារណជនកាន់តែច្រើន។
ករណីទី៣ ឬករណី ១ ០០០ គឺពាក់ព័ន្ធនឹងការចោទប្រកាន់ថា លោក Netanyahu និងក្រុមគ្រួសាររបស់លោកបានទទួលអំណោយថ្លៃៗពីបុគ្គលមានទ្រព្យសម្បត្តិរួមមានបារីស្រាសំប៉ាញ និងគ្រឿងអលង្ការសរុបក្នុងតម្លៃប្រមាណជាង ២១៣ ០០០ ដុល្លារ អាមេរិក ដើម្បីជាផលប្រយោជន៍ហិរញ្ញវត្ថុផ្ទាល់ខ្លួន ឬទំនោរទៅរកបុគ្គលមានទ្រព្យសម្បត្តិទាំងនោះ។
ប្រសិនបើលោកបានប្រព្រឹត្តពិតមែន លោក Netanyahu អាចនឹងប្រឈមការជាប់ពន្ធនាគារជាច្រើនឆ្នាំ ប៉ុន្តែសាលក្រមត្រូវបានគេរំពឹងថា នឹងអាចត្រូវការរយៈពេលយូរ។ យ៉ាងណាមិញ ក្រោយពីបានពន្យារពេលសវនាការជាច្រើនដងមក ចៅក្រមអាចនឹងសម្រេចនៅក្នុងសប្តាហ៍នេះថា តើត្រូវយល់ព្រមសំណើមួយដែលលើកឡើងពីសំណាក់មេធាវីរបស់ លោក Netanyahu ដោយពន្យារពេលការកោះហៅសាក្សីរហូតដល់ក្រោយការបោះឆ្នោតថ្ងៃទី ២៣ ខែមីនា ខាងមុខនេះ។
ប៉ុន្តែទោះវិធីណាក៏ដោយអ្នកវិភាគជាច្រើនជឿជាក់ថា ការជំនុំជម្រះនេះប្រហែលជាមិនមានផលប៉ះពាល់ធំដុំទៅលើមតិសាធារណៈទេ ពោល គឺការបោះឆ្នោតថ្នាក់ជាតិ។ លោក Dahlia Scheindlin អ្នកវិភាគនយោបាយ និងជាអ្នកស្ទង់មតិនយោបាយរបស់អ៊ីស្រាអែលបាននិយាយថា ការបោះឆ្នោតនេះត្រូវបានគេចាត់ទុកថា ជាការធ្វើប្រជាមតិក្រៅផ្លូវការ ដែលមិនប៉ះពាល់ដល់ការសម្រេចចិត្តរបស់ប្រជាជនលើរូបលោក Netanyahu ទេ ប៉ុន្តែអ្នកបោះឆ្នោតភាគច្រើនបានយកការចោទប្រកាន់ប្រឆាំងនឹងនាយករដ្ឋមន្ត្រីយកមកដាក់មុខ។
បណ្ឌិត Scheindlin បាននិយាយថា៖ «សួរថា តើការបើកសវនាការអាចផ្លាស់ប្តូរគំនិតរបស់នរណាម្នាក់ (ក្នុងពេលសម្រេចចិត្តបោះឆ្នោត) បានទេ? មកដល់ ឥឡូវនេះ ខ្ញុំដូចជាគិតមិនឃើញបែបនេះទេ»?
លោក Nahum Barnea អ្នកកាសែតជួរមុខរបស់អ៊ីស្រាអែលបានមានប្រសាសន៍ថា៖ «មនុស្សភាគច្រើនបានសម្រេចចិត្ត និងត្រៀមរួចហើយទាក់ទិននឹងជំនុំជម្រះក្តីនេះ។ ពួកគេភាគច្រើនជឿជាក់ថា គាត់អាចនឹងគ្មានទោស ឬទោះបីជាគាត់មិនមែនជាបុគ្គលស្លូតត្រង់ក៏ដោយ ក៏គាត់ គឺជានាយករដ្ឋមន្ត្រីដ៏ល្អម្នាក់ ដែលមិនគួរត្រូវបានគេកាត់ទោសឡើយ។ ប៉ុន្តែនៅពេលជាមួយគ្នានេះ សាធារណជនភាគច្រើនបែរជាប្រកាន់នូវគំនិតមួយថា លោក Netanyahu គឺជាឧក្រិដ្ឋជន»។
យ៉ាងណាមិញ ក្រុមចលនាប្រឆាំង the Black Flags បាននិយាយថា៖ «ការគ្រប់គ្រងកូវីដ ១៩ មិនបានល្អរបស់រដ្ឋាភិបាលគឺដោយសារតែរឿងជំនុំជម្រះក្តីនេះឯងដែលនេះសបញ្ជាក់ឱ្យឃើញពីភាពអាត្មានិយមរបស់រដ្ឋាភិបាល ដែលខ្វល់ពីរឿងជីវិតផ្ទាល់ខ្លួនរបស់ខ្លួនសំខាន់ជាងការរស់រានរបស់ប្រជាពលរដ្ឋទាំងមូល»។
ប៉ុន្តែចំពោះអ្នកគាំទ្រលោក Netanyahu ដំណើរការជំនុំជម្រះក្តីនេះ គឺជាភ័ស្តុតាងមួយនៃការឃុបឃិតគ្នាបង្កើតទ្រឹស្ដីមិនមានមូលដ្ឋាន ដើម្បីប្រឆាំងនឹងលោកហើយរឿងដែលកើតឡើងក្នុងពេលគេដំណើរសវនាការនឹងផ្លាស់ប្តូរផ្នត់គំនិតរបស់ពួកគេវិញថា លោក Netanyahu ពិតជាបុគ្គលស្អាតស្អំ។
លោក Osnat Mark សមាជិកសភាមកពីគណបក្សរបស់លោក Netanyahu បានសរសេរនៅលើបណ្ដាញសង្គម Twitter ថា៖ «ថ្ងៃនេះគឺជាដំណាក់កាលមួយទៀតនៃការប៉ុនប៉ងធ្វើឃាតនយោបាយដែលគេស្គាល់ថា ជាករណីរបស់ Netanyahu។ តុលាការព្យាយាមពន្លឿនសវនាការឱ្យទៅជិតពេលបោះឆ្នោត ដើម្បីធ្វើជាឧបករណ៍បង្កបញ្ហានយោបាយ»។
គួរបញ្ជាក់ផងដែរថា អ៊ីស្រាអែលនឹងធ្វើការបោះឆ្នោតជ្រើសរើសតំណាងរាស្ត្រនីតិកាលទី៤ របស់ខ្លួននៅថ្ងៃទី ២៣ ខែមីនា ខាងមុខនេះ ខណៈលោកកំពុងត្រូវដោះស្រាយវិបត្តិពិភពលោកផង និងរឿងដែលគេកំពុងចោទប្រកាន់ទាក់ទិននឹងអំពើពុករលួយរបស់លោកនាយករដ្ឋមន្ត្រី Netanyahu ផង។
ការស្ទង់មតិជាបឋមបានបង្ហាញថា តួលេខអ្នកគាំទ្រខាងគូប្រជែងរបស់លោកខាងស្តាំនិយម និងក្រុមឆ្វេងនិយមប្រឆាំងនឹងលោកហាក់មានចំនួនច្រើនគួរសម។ លោក Netanyahu គឺជានាយករដ្ឋមន្ត្រីអ៊ីស្រាអែលដែលបានកាន់អំណាចយូរជាងគេ ពោលគឺចាប់ផ្ដើមកាន់ជាប់រហូតតាំងពីឆ្នាំ ២០០៩ បន្ទាប់ពីអាណត្តិទី១ របស់លោកចាប់តាំងពីឆ្នាំ ១៩៩៦ ដល់ឆ្នាំ ១៩៩៩ មក៕
