កាលពីថ្ងៃអង្គារ ទី ២ មីនា នាយកទីភ្នាក់ងារស៊ើបអង្កេត FBI លោក Christopher Wray បាននិយាយថា លោកចាត់ទុកកុបកម្មវាយសម្រុកចូលវិមានកាពីតូលកាលខែមករាថា ជា «ភេរវកម្មក្នុងស្រុក» ហើយអំពើជ្រុលនិយមដោយហិង្សាបែបនេះកំពុងរីកលូតលាស់យ៉ាងឆាប់រហ័ស នៅក្នុងសហរដ្ឋអាមេរិក។
ក្នុងការផ្ដល់សក្ខីកម្មរបស់លោកចំពោះមុខព្រឹទ្ធសភាជាលើកដំបូងតាំងកុបកម្ម ៦ មករា លោក Wray បាននិយាយថា៖ «ខ្ញុំរន្ធត់ណាស់ ដែលអ្នកជាមេដឹកនាំជាប់ឆ្នោតរបស់ប្រទេសយើង ត្រូវបានធ្វើឱ្យរងគ្រោះនៅទីនេះក្នុងសាលទាំងនេះ»។ លោកបានបន្តទៀតថា៖«ការវាយប្រហារនោះ ការឡោមព័ទ្ធនោះ គឺជាឥរិយាបថឧក្រិដ្ឋ ហើយឥរិយាបថបែបនេះហើយ ដែលយើង FBI ចាត់ទុកថា ជាអំពើភេរវកម្មក្នុងស្រុក។ វាមិនមានកន្លែងក្នុងលទ្ធិប្រជាធិបតេយ្យទេ ហើយការអត់ឱននឹងធ្វើឱ្យមានការសើចចំអកដល់នីតិរដ្ឋរបស់ប្រទេសយើង»។
ការផ្ដល់សក្ខីកម្មរបស់លោក Wray នៅចំពោះមុខគណៈកម្មាធិការតុលាការរបស់ព្រឹទ្ធសភាអាមេរិក គឺជាផ្នែកមួយនៃការសាកសួររបស់សភា ដែលផ្ដោតទៅលើការឆ្លើយតបរបស់ទីភ្នាក់ងារអនុវត្តច្បាប់ទៅនឹងកុបកម្ម ៦ មករា។
សមាជិកសភាបានសួរចម្លើយលោក Wray អំពីការបរាជ័យធ្វើការស៊ើបអង្កេត និងការប្រាស្រ័យទាក់ទង ដែលអាចកើតមានមុនពេលមានកុបកម្ម។ ពួកគេក៏បានសង្កត់ធ្ងន់លើការគំរាមកំហែងហិង្សាពីក្រុមរើសអើងពណ៌សម្បុរ ក្រុមប្រដាប់អាវុធ និងក្រុមជ្រុលនិយមក្នុងស្រុកផ្សេងទៀត។
«ថ្ងៃទី ៦ មករា មិនមែនជាព្រឹត្តិការណ៍ដាច់ដោយឡែកតែឯងទេ។ បញ្ហានៃអំពើភេរវកម្មក្នុងស្រុកបានរីករាលដាលយ៉ាងខ្លាំងនៅទូទាំងប្រទេសអស់រយៈពេលជាយូរមកហើយ ហើយវានឹងមិនបាត់ភ្លាមៗទេ»។ លោក Wray បានប្រាប់សមាជិកព្រឹទ្ធសភាបែបនេះ ហើយបន្តទៀតថា៖ «នៅ FBI យើងបានប្រកាសអាសន្នរឿងនេះអស់រយៈពេលជាច្រើនឆ្នាំមកហើយ»។
លោក Wray ប្រាប់សមាជិកព្រឹទ្ធសភាថា មកដល់ពេលនេះ FBI បានចាប់ខ្លួនជនសង្ស័យជាង ២៧០ នាក់ ពាក់ព័ន្ធនឹងកុបកម្មហិង្សានេះ ដោយមានមនុស្សជាង ៣០០ នាក់ទៀត កំពុងប្រឈមនឹងការផ្ដន្ទាទោស ហើយជនសង្ស័យច្រើនទៀត កំពុងត្រូវបានគេកំណត់អត្តសញ្ញាណជារៀងរាល់ថ្ងៃ។ លោកបានហៅសាធារណជនអាមេរិកថា ជា «ដៃគូដ៏អស្ចារ្យបំផុត» របស់ FBI ក្នុងការស៊ើបអង្កេត ដែលមកដល់ពេលនេះបានបញ្ជូនព័ត៌មានជំនួយតាមប្រព័ន្ធផ្សព្វផ្សាយឌីជីថលជាង ២៧០ ០០០។
លោក Wray បាននិយាយថា៖ «ឥឡូវនេះយើងដឹងច្បាស់ថា មនុស្សមួយចំនួនមកក្រុងវ៉ាស៊ីនតោនជាមួយនឹងផែនការ និងគោលបំណងចូលរួមអំពើហិង្សាដ៏អាក្រក់បំផុត ដែលយើងអាចទុកបានថា ជាអំពើភេរវកម្មក្នុងស្រុក»។
ក្នុងការថ្លឹងថ្លែងពីទំហំនៃការងាររបស់ FBI លោក Wray បាននិយាយថា ចំនួននៃការស៊ើបអង្កេតភេរវកម្មក្នុងស្រុកបានកើនឡើងពីប្រមាណ ១ ០០០ នៅពេលដែលលោកឡើងកាន់តំណែងជានាយកនៅឆ្នាំ ២០១៧ ដល់ប្រហែល ១ ៤០០ នៅចុងឆ្នាំមុនដល់ប្រហែល ២ ០០០ នាពេលឥឡូវនេះ។ លោកបាននិយាយថា ចំនួននៃការចាប់ខ្លួនមេដឹកនាំក្រុមរើសអើងពណ៌សម្បុរ និងក្រុមជ្រុលនិយមផ្សេងទៀតបានកើនឡើងជិតបីដង។
សំណួរភាគច្រើនរបស់សមាជិកព្រឹទ្ធសភាកាលពីថ្ងៃអង្គារ គឺផ្ដោតលើការចែកចាយរបាយការណ៍ថ្ងៃទី ៥ ខែមករា សរសេរដោយការិយាល័យ FBI នៅទីក្រុង Norfolk រដ្ឋ Virginia ដែលក្នុងនោះ បានដាស់តឿនឱ្យភ្នាក់ងារអនុវត្តច្បាប់មានការប្រុងប្រយ័តអំពើហិង្សារកើតឡើងនៅថ្ងៃ ៦ មករា ដោយសារពួកគេបានរកឃើញការបង្ហោះតាមអ៊ីនធឺណិតជាច្រើនដែលអះអាងថា នឹងមាន «សង្គ្រាម» នៅទីក្រុងវ៉ាស៊ីនតោននៅថ្ងៃបន្ទាប់។
ថ្នាក់ដឹកនាំប៉ូលិសវិមានកាពីតូលបាននិយាយថា ពួកគេមិនបានដឹងអំពីរបាយការណ៍នេះ រហូតដល់កុបកម្មបានកើតឡើងទៅ ហើយអតីតស្នងការបាននិយាយថា លោកមិនបានទទួលព័ត៌មានពី FBI ជាមុន ដែលបង្ហាញថា នឹងមានអំពើហិង្សានៅថ្ងៃនោះ។
លោក Wray បាននិយាយថា FBI បានចែកចាយរបាយការណ៍នេះ តាមក្រុមការងារប្រឆាំងភេរវកម្មពិភាក្សានៅប៉ុស្តិ៍បញ្ជាការមួយទីក្រុងវ៉ាស៊ីនតោន បង្ហោះទៅបណ្ដាញទំនាក់ទំនងភ្នាក់ងារអនុវត្តច្បាប់ទូទាំងប្រទេស ប៉ុន្មានម៉ោងបន្ទាប់ពីបានទទួល។ តែលោកបាននិយាយថា មានការសោកស្ដាយណាស់ដែលអំពើហិង្សាបានកើតឡើង ហើយ FBI កំពុងពិនិត្យទៅលើអ្វីដែលពួកគេអាចធ្វើបានខុសពីមុន។
យ៉ាងណាមិញ កុបកម្មថ្ងៃ ៦ មករា បានសម្លាប់មនុស្សចំនួន ៥ នាក់ ដែលក្នុងនោះមានប៉ូលិសមួយរូប និងបាតុករ ១ រូប ដែលត្រូវប៉ូលិសបាញ់ស្លាប់។ ក្រុមបាតុករបានវាយសម្រុកចូលអគារកាពីតូល ខណៈពេលដែលសមាជិកសភាទាំង ២ កំពុងធ្វើការបញ្ជាក់លទ្ធផលការបោះឆ្នោត ដែលលោក Joe Biden បានឈ្នះ។
១ សប្ដាហ៍ក្រោយមកសភាតំណាងអាមេរិកបានបោះឆ្នោតចោទប្រកាន់លោកប្រធានាធិបតី Donald Trump ពីបទញុះញង់ឱ្យមានកុបកម្ម ដោយនិយាយថា កុបកម្មនេះត្រូវបានបង្កដោយការអះអាងរបស់លោក Trump ថាការបោះឆ្នោតត្រូវបានគេក្លែងបន្លំឱ្យលោកចាញ់ និងការជំរុញក្រុមអ្នកគាំទ្ររបស់លោកឱ្យទៅតវ៉ានៅវិមានកាពីតូល។ កាលពីថ្ងៃទី ១៣ កុម្ភៈ ព្រឹទ្ធសភាបានបោះឆ្នោតលើកលែងទោសលោក Trump៕