ក្រុងហាណូយៈ និស្សិតជនជាតិអាមេរិកម្នាក់ ដែលត្រូវបានចាប់ឃុំខ្លួននៅក្នុងប្រទេសវៀតណាមពីបទ«បង្កអសណ្តាប់ធ្នាប់សាធារណៈ»នៅកន្លែងតវ៉ាហិង្សានាខែនេះ បានលេចមុខនៅលើទូរទស្សន៍រដ្ឋដើម្បីនិយាយថា គាត់សោកស្តាយចំពោះការបំពានច្បាប់ ហើយនឹងចៀសចេញឆ្ងាយពីការប្រមូលផ្តុំតវ៉ាណាមួយនាពេលអនាគត។
លោក William Nguyen ត្រូវបានចាប់ខ្លួនកាលពីថ្ងៃទី១០ ខែមិថុនា នៅក្នុងក្រុងហូជីមិញ បន្ទាប់ពីចូលរួមមហាបាតុកម្មប្រឆាំងនឹងសំណើបង្កើតតំបន់សេដ្ឋកិច្ចពិសេស ដែលនឹងផ្តល់ការជួលរយៈពេល៩៩ឆ្នាំដល់វិនិយោគិន។
រូបភាពវីដេអូបង្ហាញថា បុរសជនជាតិអាមេរិកអាយុ៣២ឆ្នាំរូបនេះ ដែលកើតនៅរដ្ឋតិកសាស(Texas) ដែលមានរបួសឈាមក្បាល កំពុងត្រូវបានគេអូសដោយក្រុមបុរសស្លៀកពាក់ស៊ីវិលតាមផ្លូវ មុនពេលត្រូវបានយកទៅឃុំខ្លួន។
ប៉ូលិស បានចាប់ផ្តើមស៊ើបអង្កេតទៅលើលោក Nguyen ពីបទ«បង្កអសណ្តាប់ធ្នាប់សាធារណៈ» និងបានចោទប្រកាន់គាត់ថា បានព្យាយាមបង្កការខូចខាតដល់របងមួយ និងលើករំលំរថយន្តប៉ូលិសនៅលើផ្លូវធំទៅព្រលានយន្តហោះ។
លោក Nguyen ដែលជានិស្សិតបញ្ចប់ការសិក្សាពីសាកលវិទ្យាល័យ Yale បានលេចមុខនៅលើទូរទស្សន៍កាលពីយប់ថ្ងៃចន្ទ ដើម្បីនិយាយថា លោក បានបំពានច្បាប់៕ PS